Parei 6
6
Avv'lair dui isaru apavan parei arna sas
1Arna naran lera, naran m'ertuan a Iesu avrama kavnelnal ihuadau, m'ertu a Isrel la avv'ana a v'nenar ardu a Kris ha avuv'anr m'ertu a Isrel, sena ti ahavp'aur mamh tvtanuar naran avtutu sei arna napn udlani. 2Laha, apusel arnal lman iru (12) avv'ara a m'ertuan a Iesu udlani kavvr ti a, “Iap'as a ti kam'em' p'vln parei na v'nen p'asan Atua kavan parei asn tiv'. 3Sena si lera, tv'elm'em', pavv'lair dui ipasaru asnm'i, la m'ertu udlani avla ti avp'as kavlini a M'im'iln P'as kavrndu sei ha. Kam'em' p'vtaur ti hir apavan pari lera. 4V'eti kam'em' p'vlak kavtu tamat ipel kavvrp'ep'a v'nenan Atua nakl.”
5M'ertu udlani avrn ip'as a v'nenar apusel kavv'lair a Stivn, ilini a v'ahien p'as m'a M'im'iln P'asan Atua, m'ei a P'iliv', a Prukurus, a Nikanur, a Timun, a Parmenas m'ei a Nikulas iv'i dui Antiuk iv'ah Atuar arm'ertu a Isrel. 6Kavlav'r kavuirv'a asnr apusel. Laha, hir avtu tamat kavtu lm'ar aranar.
7Laha, v'nenan Atua ivrvr kaier nut istudau. Arna nut a Serusalem, m'ertu avv'ah a Iesu avrama kavnelnal ihuadau. Laha, pris istudau avrama kavsapa v'nen p'as.
Avuadei a Stivn kavuirv'a arna nah Kaunsel
8A Stivn ilini a v'ahien p'as m'a nut huan Atua kan pari lilil m'ertu avtah ani, m'a pari lilil iv'iv'en sei. 9V'eti m'ertu kinkin avp'tir avv'i m'ertu na sas iamk avr ti iv'i sas na m'ertu ahavv'i m'ertu na m'akarien ml, m'er m'ertu kinkin avandan a Sairini, m'er m'ertu kinkin Aleksadria. Hir m'er m'ertu uraur a Silisia m'a nut a Esia avrama kavv'lv'al m'ei a Stivn. 10V'eti hir ahavhua kavsiv' v'nenan, sena ti hin ilini a M'im'iln P'as karndu sei. 11Sarei, avul m'ertu kinkin kavani ti avvr ti a, “Kam'em' nvrn ti aulera iv'ana stu kamlen a Musis m'ei Atua.” 12Laha, avuha m'ertu udlani, arelta m'er ardu na v'nen hua, kavrav'a asnn kavuadei kavuirv'a arna nah Kaunsel. 13Kavlev' m'ertu kinkin kavuirma a ti apavhap'il kavvr ti a, “Iel aulaha isip'len nutet laha kamlen v'nen huan a Musis. 14Sena ti nvrn ti hin ivr ti a Iesu, iv'i Dui a Nasaret, ipakapr nmah laha, kavav p'kld la a Musis ittu sarei a nakd ha.” 15Laha, hir udlani avlak arna Kaunsel avp'ei ihua kavla ti nahn inep'a sera nah ensel.
Արդեն Ընտրված.
Parei 6: nmb
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2023 Presbyterian Reformed Church of Australia