Parei 5
5
Ananaias m'ei a Savaira arhap'il m'a M'im'iln P'as
1V'eti dui iamk, nahan iv'i Ananaias, m'ei a naun, nahan iv'i a Savaira, hin iulul a nadep'an kinkin. 2Kauada pna nav'et nen iv'i nkan. A naun ip'lt m'ei arna si lera. Laha, iuirv'a pnen ml kataui asn tlr apusel. 3V'eti a P'ita ivr ti a, “?Ananaias, inap'i hin a Sitan ilinkar nlm a ti khap'il m'a M'im'iln P'as, kauada pna uliena nadep'? 4Naran kdaulul ani idv'i nkam uam. Naran ktulul sarei ani, nav'et nen iv'i nkam uaki. ?Inap'i hin kv'ahuri arna nlm a ti pan si stu lera? Nakm kaahap'il m'a m'ertu, v'eti khap'il m'ei Atua.”
5Naran Ananaias irn v'nen lera, irs a nadep' karhap'ni. Laha, m'ertu udlani avrn si lera avdedrn ani istudau. 6V'eti malakal avp'tir kavnpei kavrmani iv'a av'aran, kavtini.
7Sarei, ihih m'etaneiel itl iv'siau, a naun ima eim, v'eti iarndu sei ittu sera hin. 8Laha, a P'ita ivr ani, kavr ti a, “Pavr a kana. ?Nav'et laha iv'i nav'et udlani krlav'i arna nadep'am'i krulul ani?”
Ivr ti a, “Aau, inap'i lera.”
9Laha, a P'ita ivr ani ml kavr ti a, “?Inap'i hin kam'i krru krp'lt a ti parandina M'im'iln a Mlin Eia arna hap'ilienam'i? Parn, tna tlr m'ertu atvtin sarei a naum, hilaha avier a karliu ra. Hilaha apavrmanh pav'a av'aran.” 10Ilahml sarei, hin irs asn tln a P'ita karhap'ni. Laha, malakal avrama eim kavla ti itam'a sarei, kavrmani iv'a av'aran, kavtini asn a naun dui. 11Laha, m'ertu udlani arna sas, m'er nelnal udlani avrn si lera avdedrn istudau.
Arapusel avan pari lilil istudau iv'iv'en sei m'a pari lilil istudau m'ertu avtah ani arna sas
12Laha, arapusel avan pari lilil istudau iv'iv'en sei, m'a pari lilil istudau m'ertu avtah ani, arna lm'ar. Laha, hir udlani avamk arna v'ahienar kavlak nakl arna Vradan Sulumun. 13M'ertu av'aran avdedrn a ti apavp'lt m'er, v'eti nelnal avani nahar iv'a eia. 14V'eti a Mlin Eia itup'ltanr m'ertu istudau mau, avrama kavv'ah a Iesu, dui m'a tav'et. 15Sena si lera udlani, arman m'ertu si ianr, kataur a navanel arna pas m'a pap a ti m'lkn a P'ita ipaiarr uaki naran ipav'siau. 16Nelnal avstudau avandan arna v'anu itertalu a nut a Serusalem kavuirma m'ertu si ianr m'er m'ertu m'im'iln stu iutakm anr. Laha, hir udlani avrama kavp'as ml.
Avtaur arapusel al p'resin v'eti ensel ilev'lar
17Sarei, mlinar pris udlani ip'tir m'er m'ertu udlani avsapei. Hir avlak arna pati iamk avr ti iv'i Satiusi. Nlr iprr apusel istudau. 18Kavuadar kavtaur al p'resina kavman. 19V'eti enselan a Mlin Eia ima arna lihat lera, kaiela pn liu na p'resin udlani kav'av'ar avrav'a av'aran, kavr ti a, 20Pavrav'a kavp'tir al nmah tamat kavvrp'ep'a v'nen udlani na silv'ien laha anr nelnal.
21Sarei, naran avrn v'nen lera, avrav'a al nmah tamat kavvrp'ep'a v'nen p'as arna m'etav'aran nrnren. Laha, pris lil m'er m'ertu udlani avlak m'ei, avrama kavv'ara anr elta udlani a Isrel avlak arna Kaunsel, a ti apavrama kavp'lt, katep'a v'nen iv'a arna p'resin kavr ti apavuirma apusel udlani arna Kaunsel.
Arapusel avp'tir a nah Kaunsel ml
22V'eti naran ptm'iel avrav'a ahavpaslar al p'resin. Laha, avm'alet, kavvr ti a, 23“Naran nvier asn p'resin nvla ti liu nen avp'leskari ihua, kavla ti dui avp'aur p'resin avp'tir asn pn liu nen udlani, v'eti naran nviela liu, navpasla m'ertu kinkin eim ml.” 24Naran mlinar pris, m'a mlinar ptm'iel na nmah tamat, m'er pris lilil avrn si lera, ahavrndu nut ipanap'i ml. 25Laha, m'ertu iamk ima kavr ti a, “Pavrni, ardu la kvtaur al p'resin ha, hir avp'tir al nmah tamat kavvrp'ep'a sei anr nelnal.”
26Sarei, mlinar ptm'iel na nmah tamat iv'el m'er m'ertuan kavlav'r. V'eti ahavrpr, sena ti avdedrn a nelnal, imahei apavmhrp'nr. 27Avlav'r laha, kavtaur avp'tir arna nahr m'ertu udlani arna Kaunsel. Sarei, pris lil imiman anr kavr ti a, 28#Mat 27:25.“Kam'em' ntvvrkar sera kam'i ihua a ti mavvrp'ep'a v'nenam'i arna nahan Aulera ml. V'eti pavrni, kvani ti nut a Serusalem ilini a v'nenam'i, kavrn ti m'ertu apavv'ah ti kam'em' nvani ti din Aulera irarev'.”
29V'eti a P'ita m'er apusel uraur avvrprani, kavvr ti a, “Kam'em' nkvsapa v'nenan Atua pr ipasiv' v'nenar m'ertu. 30Kam'i kvtau a Iesu arna su lamu kavrpep'ni, v'eti Atuar a tetiad iani ti ithal ml arna m'ienen. 31Hin Atua iani iv'a eia kalak arna m'ldaun, a ti ipav'i Mlin Lil kav'i Dui ipalev'la m'ertu, katau anr arm'ertu a Isrel a ti apavvav nlr, kamhmah anr arna si stuar. 32Kam'em' nvla si lera kavvrp'ep'ei asnm'i, kam'em' m'a M'im'iln P'as, la Atua itau anr m'ertu avsapei ha.”
A Kamaliel iv'ana m'er ardu na Kaunsel
33V'nen lera, naran avrni, ishs nlr istudau, laha, avvrur nut apavrpep'nr ipanap'ei. 34V'eti Varisi iamk, nahan iv'i Kamaliel, ip'tir arna Kaunsel. Hin iv'i tisa lil na v'nen hua. M'ertu udlani avv'ah ti iv'i dui lil iamk. Itu v'nen a ti apavtaur apusel udlani av'aran ipasusupa. 35Sarei, ivr ti a, “Kam'i udlani kvv'i m'ertu a Isrel, pavv'ah kam'i sena sei pavan anr ardu lera. 36Sena ti tituei dui iamk ip'tir, nahan iv'i a Tutas, kavr ti iv'i dui lil kinkin iamk. Laha, m'ertu avnelnal iv'av'a (400) avp'lt m'ei, v'eti arpep'ni. Laha, m'ertu udlani avsapei avruh kavamkma kavunanut, pariar udlani ihiris. 37Itauatah a dui lera, a Sutas, iv'i dui a Kalili, ip'tir naran kavman ispanr m'ertu udlani. Hin irv' m'ertu istudau avsapei, v'eti arpi ml. Laha, m'ertu udlani avsapei avamkma kavunanut. 38Sena si lera, nvr a kam'i hilaha, mavan si ipamk anr m'ertu laha, v'eti pavlnr uaki, sena ti ipavr ti v'ahienar m'a pariar ipandan asn m'ertu uaki, ipars uaki. 39V'eti ipavr ti ipandan asn Atua, mkavkasri, imahei ti pavan naur m'ei Atua.”
40Laha, avm'ahu a v'nenan. Sarei, avv'ara anr apusel avrama eim kavrpr kavvrkarr a ti amavv'ana ml arna nahan a Iesu, sarei, avm'ahu anr a ti apavruh. 41Laha, avruh arna Kaunsel kavrn ip'as sena ti Atua ila ti avviviln a ti mamihien ipaiarr sena nahan. 42Arna napn udlani avlak al nmah tamat m'a nmah udlani, kavv'iv'en sei kavvrp'ep'a v'nen p'as, kavvr ti a Iesu iv'i a Kristu, ahavrnrn hir aranan.
Արդեն Ընտրված.
Parei 5: nmb
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2023 Presbyterian Reformed Church of Australia