Parei 8
8
A Sul imlen sas
1V'eti a Sul im'ahu a ti apavnesp'n a Stivn.
Laha, arna naran lera avtp'ev' sas iter arna nut a Serusalem ihuadau. Laha, avamkma kavunanut kavrav'a arna nut a Sutia m'ei a Sameria. Arapusel uaki avlak a Serusalem. 2Laha, ardu kinkin avv'ah Atua avlev' a Stivn kavtini kavtakal ani istudau.
3 #
Parei 22:4,5; 26:9-11. V'eti a Sul itp'ev' sas kadav'a al nmah udlani karv'titah dui m'a tav'et kasranr al p'resin.
A P'iliv' ivrp'ep'ei a Kristu arna nut a Sameria
4Sena si lera, m'ertu avamkma kavvrp'ep'a v'nenan a Iesu arna nut udlani. 5Laha, a P'iliv' iv'el dav'a auei arna v'anu lil a Sameria kavrp'ep'ei a Kristu anr. 6Laha, hir udlani avv'rn mamh a v'nen a P'iliv' ivri, naran avrn v'nenan kavla pari lilil iani. 7Sena ti m'ertu istudau m'im'iln stu iuadar, m'im'iln stu nen avruh a nlr kavv'ara eia a nadl lil, m'ertu istudau nki p'akr im'em'a, nki ivalasih, avrama kavp'as ml. 8Laha, avrn ip'as istudau arna v'anu lera.
Tiet iamk ivr ti iv'ah a Iesu
9V'eti arna nut lera, dui iamk iak, nahan iv'i a Saimun. Hin tituei ien paria tiet arna v'anu lera kani ti nelnal a Sameria avtah ani istudau kavr ti iv'i dui lil kinkin iamk. 10Hir udlani, m'ertu papa m'a m'ertu lilil avv'ahi kavvr ti a, Aulera iv'i nut huaduan Atua. 11M'ertu udlani avv'rn ani sena ti tituei dav'a ier naran lera iani ti avrdus nlr sena paria tiet iani. 12V'eti naran a P'iliv' ivrp'ep'a v'nen p'as kavrur v'anuan Atua kavrp'ep'a nahan a Iesu Kristu, hir avv'ahi kavpaptais, dui m'a tav'et. 13Hin a Saimun lera ima kav'ahi. Laha, naran aten sera paptais ani, hin ilak mima asn a P'iliv' nakl, katah a pari lilil ilei, m'a parei iv'iv'en sei, la a P'iliv' iani nakl ha.
Si stuan a Saimun
14Dav'a, naran apusel udlani a Serusalem avrn v'nen a ti m'ertu a Sameria atvv'ah sera v'nenan Atua, laha, avtap'er a P'ita m'ei a Sun a ti aparv'a asnr. 15Naran arv'a asnr, artu tamat a ti apavlev' M'im'iln P'as. 16Sena ti arna naran lera, M'im'iln P'as idahma aranar, v'eti atvan sera paptais anr, arna nahan a Mlin a Iesu uaki. 17Laha, naran artu lm'ar arna ptr, M'im'iln P'as ima aranar.
18A Saimun ila ti Atua itu M'im'iln P'as anr, naran apusel artu lm'ar arna ptr, laha, ilev' nav'et a ti ipatau anr, kavr ti a, 19“Partu nut hua lera a kana, sena ti naran p'etu lm'ak arna pt m'ertu kinkin, M'im'iln P'as ipama aranan ipanap'i lera.”
20V'eti a P'ita ivr ani, kavr ti a, “Ip'as a ti nav'etam ipasapah, pamln m'ei, sena ti kv'ah ti pul sei Atua ituvn a m'ertu, 21Nakm kaaviviln a ti pama kap'lt arna pariam'em' laha, sena ti nlm iaviviln arna nahn Atua. 22Pavav nlm sena si stuam lera, katu tamat asn Atua. Nsarei Hin ipamhmah anh sena v'ahien stu lera iter a nlm. 23Sena ti kana nla ti nlm ipr tv'alm istudau, si stu iuadah ihuadau.”
24Laha, a Saimun ivrprani, kavr ti a, “Kam'i partu tamat asn Atua sanak, a ti si udlani la krvri ra imaier kana.”
25Sarei, naran atrvrp'ep'a sera sei arlei katrvrp'ep'a sera v'nenan a Mlin Lilad, karm'alet ml a Serusalem, karvrp'ep'a v'nen p'as arna v'anu inelnal a Sameria.
A P'iliv' ivrp'ep'a v'nen p'as a dui lil iamk a Itiupia
26Arna naran lera, enselan a Mlin Lilad iamk ivr an a P'iliv' kavr ti a, “Pap'tir kav'el kadav'a arna navanel iendan a Serusalem kadav'a arna Saut arna nut a Kasa.” Navanel lera iter arna nut kaka. 27Sarei, ip'tir kav'el. Laha, pavrni, ier asn dui a Itiupia iamk, iv'i dui lil kav'i kavmanan a Kuin a Itiupia. Hin nut huan ilil istudau, kap'aur nav'eta tav'et lahara udlani, naha tav'et lera iv'i a Kades. Itav'a sarei a Serusalem a ti ipapatei Atua atlera. 28Hilaha, ihum'alet ml kalak arna kat p'asan kav'ana arna pukan Aisaia, iv'i pruvet tituei. 29Laha, M'im'iln P'as ivr an a P'iliv' kavr ti a, “Pav'el kav'iv'a asn kat lera.”
30Laha, a P'iliv' ivrvr kadav'a asnn karn ti iv'ana arna pukan Aisaia, iv'i pruvet. A P'iliv' ivr ani, kavr ti a, “?Inap'i? ?Nakm kv'ana arna puk lera? ?Krndu mamh sei ivri?”
31Laha, ivr ti a, “?P'erndaui ipanap'i, ipavr ti m'ertu kinkin ikavrp'ep'ei a kana?” Sarei, imiman a P'iliv' a ti hin ipama eia arna kat kalak asnn. 32#Aisaia 53:7,8.V'nen arna Paivul la iv'ana aranan ra, ivr ti a, “Hin inep'a sera sivsiv alav'i a ti aparpep'ni, kanep'a sera net sivsiv kinkin iavalau naran akas niln. Hin ip'n hin uaki. 33Naran atu mamihien ani, av'ana hua m'ei arna navanel iaviviln. M'ertu ikavrp'ep'a ti a natn iak asnn, sena ti alev'la silv'ienan arna nadep' ka.”
34Laha, dui lil lahara ivr an a P'iliv' kavr ti a, “?Pavr a kana, hin ak la hin pruvet ivruri ha? ?Ivrur hin uaki, v'aha ivrur dui uraur?” 35Sarei, a P'iliv' iv'ana kavr an aulahara kav'iv'endina sei Paivul lera ivruri kavrp'ep'ei a Iesu ani. 36Arru arna kat karsapa navanel karier arna nut iamk nauei iter. Laha, dui lil lahara ivr ti a, “Palei, nauei ha. ?V'ata itukar kana ml a ti pan paptais a kana?”
37A P'iliv' ivr ti a, “Ipavr ti pav'ah a Iesu arna nlm udlani, iviviln a ti papaptais.” Laha, ivrprani, kavr ti a, “Kana nv'ah ti a Iesu Kristu iv'i a Natn Atua.”
38Katu v'nen a ti kat ipap'tir. Laha, a P'iliv' m'a dui lil lahara arv'el karv'a auei al nauei. Laha, a P'iliv' ien paptais ani. 39Sarei, naran arma aut, M'im'iln P'asan a Mlin Lilad ilev'lei a P'iliv' kauiruh. Dui lil lahara ialei ml, laha, hin iv'el kasapa navanel karn ip'as istudau. 40V'eti avlei a P'iliv' ml arna nut Asutas. Hin iv'el kadav'a arna v'anu lilil udlani kavrp'ep'a v'nen p'as dav'a kaier a Sisaria.
Արդեն Ընտրված.
Parei 8: nmb
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2023 Presbyterian Reformed Church of Australia