Kiyes Jezi ye?Egzanp

Yon Wa Oubyen Yon Pyon?

Yon twazyèm kesyon nou bezwen poze sou Jezi ki gen rapò ak otorite Li nan monn sa a. Èske Jezi se vrèman Wa tout wa yo jan Li te di a? Oswa èske Li jis yon pyon nan lit pou pouvwa yo nan istwa pase yo? Èske Jezi chita “adwat [Bondye] nan wayòm selès la” (Efezyen 1:20 NIV)? Oswa èske li menm jan ak lòt moun nan listwa ki te vini epi ale?

Bib la revele nou atravè listwa Izrayèl, Bondye te pèmèt moun ki vin gen pouvwa emèje pou akonpli objektif Li nan tan ak nan letènite—gason ak fi tankou Jozèf, Moyiz, Jozye, David, Estè ak Rit. Li te leve nasyon etranje an grann-pisans tou, tankou Babilonyen yo ak Pès yo, pou yo te ka fè volonte l sou tè a. Pafwa, tout bon vre, pèp Bondye a te rive mande si Bondye te bliye yo pandan yo te ann egzil la. Men, lè w gade dèyè nan listwa, li klè pou nou ke Bondye te toujou gen plan ak objektif pou chak bagay ki rive pèp Li a.

Lè w gade evènman ki te pase pandan arestasyon Jezi a, jijman an ak jan yo te kloure Li sou kwa a, sa ka fè w mande tèt ou si Bondye te gen kontwòl sa k t ap pase yo. Lè w gade bagay yo ak sèlman ak de (2) nawè w, se tankou Jezi t ap pase anba men yon pouvwa a yon lòt — soti nan otorite jwif yo tonbe nan gouvènman Women an — tankou lè y ap deplase pyon sou tab moun ap jwe damyen. Epi li vin difisil pou imajine yon bagay ki pi mal pase yon evènman konsa: Bondye, ki vin viv nan kò moun, yo trayi L epi klouwe L sou kwa Women yo. Antouka Sa a pa sonnen ditou tankou Bondye ki gen tout pouvwa a nou tande pale de Li a nan Pawòl la. Èske li te an kontwòl vre?

Ankò, lè nou gade dèyè nan istwa, nou wèBondye t ap sèvi ak pouvwa yo sou tè a pou reyalize plan li. Bondye te bezwen yon pouvwa ak enfliyans anndan fanmi Jwif—lidè Jwif yo—pou trayi Pitit Bondye a. Li te bezwen yon pouvwa ak enfliyans deyò fanmi Jwif yo—otorite Women yo—pou klouwe li sou kwa a. Bondye te fè sa pou pwofesi yo te ka akonpli kote li di : Kris la ta pral soufri epi mouri pou peche nou yo (gade Ezayi 53:1-12). Epi, Li ap kapab leve Jezi soti vivan nan lanmò sou twazyèm jou a—epi fè legliz li a vin tounen yon fòs ki genyen epi ranpòte viktwa jouk jounen jodi a.

Gen moman kote nou santi lavi tankou yon jwèt echèk kote nou menm nou se yon pyon. Li ka sanble kèk fwa se tankou lòt moun yo gen tout pouvwa epi yo ap detwi plan Bondye genyen pou nou yo. Men, toujou sonje, lè ou soumèt devan Wa a, avni ou nan men li. Ou pa bezwen pè lòt moun ki ap eseye chanje plan Bondye genyen pou ou, paske Li toujou gen kontwòl sou tout bagay.

Reponn:

Ki sikonstans ki fè ou santi ou pa gen kontwòl lavi ou?Poukisa li ka difisil pou ou, pou wè kijan Bondye ap travay nan sitiyasyon sa yo epi nan lòt sitiyasyon yo tou?
Kijan ou te wè Bondye itilize yon sitiyasyon difisil pou pwoche ou pi pre Li? Kijan ou konnen Bondye toujou gen kontwòl pou ede ou reponn nan mitan advèsite w yo?
Kisa w ap viv kounye a ke ou ta renmen Bondye sèvi ak li pou glwa Li? Ki espwa ou wè pou lavni ou? Ki sa ki baz espwa ou?