GrangouEgzanp

Se pou grangou ou la pouse w vle plis

Tout moun ka santi yo grangou nan diferan moman nan jounen an. Gen kèk moun ki manje twa fwa pa jou. Gen kèk moun ki fè ti goute ant repa yo. Grangou se yon pati nan sa ki nòmal lavi yon moun. Nou tout bezwen manje. E verite a se grangou fizik nou an reflete yon reyalite espirityèl ki pi pwofon: nou fèt pou nou grangou pou Bondye.

Relijyon Kretyèn nan chita sou yon relasyon ak Bondye atravè Jezi, kidonk li lojik pou anvi konnen Bondye plis tankou yon moun ki grangou ap grandi chak jou epi pou nou vle rete nan prezans li. Jezi te di moun ki grangou epi swaf pou jistis se moun ki beni yo ye paske yo pral jwenn sa yo bezwen. Petèt ou byen okouran de ki tip de grangou espirityèl ou ap soufri ak li. Petèt gen pati nan lavi ou ki bezwen ranpli ak jistis Bondye.

Lè Jezi te vini nan mond lan, li te montre moun yo kisa ki priyorite orijinal Bondye. Priyorite Bondye se yon relasyon reyèl avèk Li. Depi nan kòmansman an, Bondye te vle fòme yon pèp ki grangou pou Li ak Peyi Wa Li a ki depase tout lòt bagay ki egziste. Jezi te montre reyalite sa a lè Li te di zanmi li yo, manje Li se fè volonte Papa Li ki anwo nan syèl la, epi ke nenpòt moun ki swaf kapab vin jwenn Li pou bwè lib e libè nan rivyè dlo vivan an.

Grangou pou Bondye – Se santiman sa a ki pouse w pou pwoche bò kote Li epi fè eksperyans bèl bagay nan jan ou va konnen Li – se yon faktè komen pou tout moun, se sa ki ini pèp Bondye a pandan tout listwa. Epi lè nou konnen Li, sa pouse nou antre nan plan Li genyen pou lavi nou. Konnen Li vle di nou gen chans pou patisipe nan avansman Wayòm Li selon lè ak dat li menm planifye pou sa toupatou nan mond lan.

Premye disip Jezi yo te konprann ke lavi sou tè a pa gen anpil valè sòf si yo te konplètman devwe pou viv pou Bondye. Pòl ekri, lanmou Kris la fè nou pa vivpou tèt nou ankò men pou Li menm ki te mouri pou nou. Nenpòt moun ki viv san yo pa grangou pou Bondye se laviwonn dede y ap fè ak pwòp tèt yo nan gade sa yo panse ki reyalite lavi a ap disparèt devan je yo. Yon lavi konsa pa kapab patisipe nan bèl festen an ak Bondye ki ban nou pozisyon epi ranfòse nou pou nou kapab patisipe nan etabli Wayòm Li sou tè a.

Pandan grangou nou pou Bondye ap pran volim chak jou pi plis, nou vin reyalize, nan zafè konnen Bondye pa gen fen. Pran yon ti tan pou evalye nivo grangou pa w la. Se pou Bondye ogmante dezi w pou konnen Li, fè Li konnen ou, epi antre nan plan ak objektif Li genyen pou lavi w. Se pou Li file konsyans ou, pou anyen nan mond sa a pa rive satisfè nanm ou. Epi se pou ou gen kouraj viv sèlman pou Jezi.