GrangouEgzanp

Grangou kòm senbòl lafwa nou

Mwen sèten ou ka nonmen non moun ou toujou kontan pase tan avèk yo. Nou pa fèt pou viv lavi poukont nou. Nou fèt pou gen relasyon ak lòt moun, paske nou fèt nan imaj yon Bondye ki gen relasyon zanmitay tou. Prensipal entansyon Bondye lè Li kreye nou, se te pou nou gen relasyon avèk Li. Li te vle nou konnen Li, vin tankou Li, epi fè glwa Li parèt nan mond lan. Natirèlman, peche limanite a te kraze relasyon sa a Bondye te vle nou jwi avèk Li a, men Bondye te deja gen yon plan pou nou ki se: Jezi.

Ou pwobableman gen istwa pou rakonte sou zanmi oswa manm fanmi ou ki asepte Jezi, e ki te viv yon transformasyon radikal akoz dezi pwofon yo pou pase tan avèk Bondye. Ou ka te fè eksperyans sa tou. Ranfòse relasyon ak Bondye se repons ki nesesè pou yon moun ki gen swaf anpil pou prezans Bondye. Yon lòt fason nou ka di sa: swaf nou pou gen relasyon ak Bondye – pase tan nan lapriyè, adorasyon, ak nan Pawòl Li – se esans lanmou nou pou Li. David te eksprime sa konsa: "Men yon sèl bagay m’ap mande Seyè a, men sa m’ap chache: se pou m rete nan kay Seyè a pandan tout lavi m, pou m gade bèlte Seyè a epi chache L nan tanp Li a." (Sòm 27:4)

Chak moun gen yon swaf natirèl pou manje paske li bay kò a nouriti ki kenbe sante a. Espirityèlman, nou gen nan nou yon swaf natirèl pou prezans Bondye, ki ka satisfè lè nou pase bon jan tan nan lapriyè ak etid Biblik. David te viv antyèman pou Bondye. Pasyon li te gen pou Bondye a se rezon ki fè yo dekri li kòm yon moun ki selon kè Bondye. Imajine enpak lavi nou ta genyen si nou te viv avèk kalite pasyon David te montre pou Bondye a. Imajine ki jan nou ta ka chanje mond lan si nou te toujou kenbe flanm lanmou nou pou Bondye, voye jete distraksyon, epi konsantre nou totalman sou Jezi.

Lik chapit 10 rakonte istwa de sè, Mari ak Mat, ki t ap resevwa Jezi lakay yo. Mari chita bò pye Jezi, pandan Mat okipe tèt li ap fè aranjman pou manje pou Li. Jezi di: "ezi reponn li: Mat, Mat. W'ap trakase tèt ou, w'ap bat kò ou pou yon bann bagay. Men, se yon sèl bagay ki nesesè. Se li Mari chwazi, yo p'ap janm wete l' nan men li." Jezi pa t reyèlman ap reprimande Mat, men li te envite l nan prezans Li. Li ap envite ou tou. Se pou ou konsyan ou bezwen gen yon swaf k ap grandi pou konnen Bondye nan yon fason ki pi entim. Se pou ou jwenn enspirasyon pou w kreye tan nan prezans Bondye, e se pou Li transfòme ou chak jou pi plis, pou lòt moun ka kòmanse swaf pou Li tou.