Rasis epi Repons Pa NouEgzanp

Ale epi Fè Yon Bagay

Konesans se tankou penti: li efikas sèlman lè w itilize li. Nou tout konnen nou dwe renmen pwochen nou jan nou renmen tèt nou, men sof si nou itilize konesans sa a, anyen pa p chanje. Jezi se pi gwo egzanp nou sou sa Li vle di, lè Li di nou, nou pa dwe sèlman konnen sa pou n fè, men ale epi fè li tou.

Wòl nou nan istwa rekonsilyasyon ak delivrans Bondye pote a pa oblije gwo pou l enpòtan. Nou ka fè pou yon moun sa nou ta vle fè pou anpil lòt moun. Sa ki pi enpòtan se ke nou fè yon bagay. Jezi fini parabòl bon Samariten an lè li di, ‘Ale epi fè menm jan an.’ Pou nou, kòmandman sa a vle di viv yon fason ki reflete kè Jezi epi ki etabli Wayòm Bondye a sou tè a. Lè nou pale sou rasis, sa vle di nou apresye chak moun, konprann ke chak moun fèt nan imaj Bondye. Sa vle di aprann wè moun jan Bondye wè yo: enpòtan, diy, aksepte, epi kreye pou fè yon bagay enpòtan epi ki mache ak yon objektif.

Samariten an pa t sèlman sispann lè li te wè vwayajè blese a; li te depanse anpil tan, lajan, efò, ak enèji pou pran swen tout bezwen fizik moun blese a tou. Fè yon estimasyon rapid sou kantite moun ki kounye a nan sèk enfliyans ou. Kisa sa ka koute w – demen, oswa pandan mwa k ap vini an – pa sèlman fe yon ti kanpe pou ede yon moun ki sibi enjistis, men pou ede li nan bezwen pratik oswa fizik li yo tou? Kijan lè w konnen w fè pati de plan Bondye pou restore tè a fè w wè epi koute moun yon lòt jan?

Li pa fasil ni popilè, men nou dwe swiv chemen bon Samariten an. Apre nou fin kalkile konbyen nou ka peye chè pou sa, nou dwe pran angajman pou reflete Jezi nan mond sa a. Nou gen chans renmen moun ki kanpe sou kote w la, louvri je nou pou nou wè moun ki bezwen favè, epi louvri bra nou pou konstwi pon pou atire moun ladan, olye de bati baryè pou mete moun deyò. Si nou vle chanje mond lan, nou dwe premye moun ki dispoze chanje tèt nou. Yon pati nan pri pou peye pou renmen pwochen nou se gen imilite ase pou rekonèt kote nou te fè erè. Ann egzaminen kè nou, repanti si sa nesesè, lapriyè pou èd Bondye, epi aji: ‘Ale epi fè menm jan an.’

Ke Bondye ba ou fòs ankò pou w ka fè pati bèl solisyon Li ap pote kont dega rasis ap fè sou planèt tè nou an. Pandan Li fè w pran yon tan osnon fè w fè yon ti kanpe sou chemen ou pou wè epi antre nan soufrans lòt moun, ke Li ba w konpreyansyon, kouraj, detèminasyon, ak yon kè kontan ki pa janm febli nan jan w ap tann Wayòm Li a vin etabli. Se pou nou kòmanse eksperimante transfòmasyon total sa a nan kilti ak sosyete a pandan nou ap simaye lanmou ak respè sou chak moun nou gen privilèj rankontre.