Rasis epi Repons Pa NouEgzanp

Eske Rasis se yon pwoblèm Spirityèl?

Mond lan fè fas ak twomatis ak trajedi san parèy sou plizyè aspè pandan kèk ane ki sot pase yo. Anpil nan sa yo te gen rapò ak rasis, epi konsekans yo te pote anpil chagren. Kit ou te temwen sa oubyen ou te fè eksperyans li, rasis kapab afekte nou tout. Li difisil pou konprann kote rasis soti, oubyen poukisa moun panse li nòmal pou mal trete lòt moun. Epi san dout, eksperyans ak opinyon chak moun sou sijè sa a diferan. Pou konprann rasin pwoblèm sa a, nou bezwen mete sou kote pèspektiv pèsonèl nou epi retounen nan Pawòl Bondye a – Nan kòmansman tout bagay se yon bèl kote pou nou kòmanse.

Se nan imaj Li Bondye te kreye moun. Paske chak moun fèt vre nan imaj Bondye, yo pote epi reflete sanblans Li, nou tout gen valè ak enpòtans natirèl. Nou tout merite respè, diyite, lanmou, favè, akseptasyon, ak enklizyon. Nou dezumanize moun lè, klèman oswa an silans, nou inyore yo kòm moun ki pote mak imaj Bondye. Rasis kòmanse lè nou sispann wè Bondye nan moun ki pa sanble ak nou. Okontrè, lòt moun yo pa t janm te sipoze sanble ak nou. Nou tout te sipoze sanble ak Bondye. Se sa k fè rasis pa sèlman yon pwoblèm moral, men yon pwoblèm espirityèl tou.

Pandan divès apwòch pou ranje ak rekonsilye pwoblèm rasis itil epi nesesè, li enpòtan tou pou nou adrese rasis nan yon nivo espirityèl. Nou bezwen aprann wè moun ak yon je ki gen favè ak lanmou, jan Bondye fè sa. Liv Revelasyon an montre nou yon imaj ak kisa tout sa ki nan syèl la sanble: plen ak pèp Bondye a ki sòti nan chak tribi ak nasyon, yo ini men yo pa gen sèl fòm. Nou bezwen kòmanse lapriyè jan Jezi te anseye nou – pou Wayòm li vini pami tout pèp sou tè a menm jan ak nan syèl la.

O final, Jezi ap siye chak gout dlo nan je nou, epi pap gen lanmò, lapenn, kriye, oswa doulè ankò. Imajine pou yon moman kijan lavi ou ta diferan demen, si tout enjistis, diskriminasyon, rayisman, prejije, ak mepri ta disparèt sou tè a yon sèl kou. Pandan n ap tann Jezi fè tout bagay nouvo, n ap kontinye viv jan Bondye te vle nou viv la, nan chèche fason pou bati pon pou inite, lanmou, ak favè ki va mete tout moun nan nivo. Nou fè pati de gwo plan renouvèlman ak restorasyon Bondye a, epi sa ta dwe motive nou pou n pi entansyonèl nan sa ki gen pou wè ak jistis rasyal.

An rezime: rasin rasis la se yon pwoblèm espirityèl. Nou sispann wè Bondye nan moun ki pa sanble ak nou. Ann mande Bondye ouvè je nou pou nou wè bèlte chak moun n ap rankontre nan lari, nan travay, nan lekòl, oswa nan legliz kote n ap sèvi ansanm. Ann chèche opòtinite pou nou renmen, onore, ak respekte yo kòm moun ki pote imaj gran Bondye nou an, ki montre glwa li atravè divèsite tout sa li kreye.