Rasis epi Repons Pa NouEgzanp

Rasis : Pwoblèm Pou Ki Moun?

Eske ou konnen non tout moun k ap viv nan katye kote w rete a? Nou ta dwe fè efò pou renmen moun k ap viv toupre nou oswa lòt bò riyèl kote nou rete a. Men, Jezi fè nou konprann ‘vwazen’ vle di plis pase moun nou pataje yon katye oswa yon blok ak yo, epi responsablite nou depase senpman souri ak salye yo.

Rasis soti nan enkapasite pou nou rekonèt imaj Bondye nan moun ki pa sanble ak nou. Petèt ou di ou menm, 'Wi, men ki sa sa gen pou wè avè m?' Lè moun yo te mande Jezi kisa ki pi gwo kòmandman an, li te reponn ak de (2) kòmandman sa yo: renmen Bondye, epi renmen pwochen ou lan. De (2) kòmandman sa yo mare youn ak lòt. Nou pa ka renmen Bondye san nou pa renmen moun tou. E lè yon moun te mande Jezi, 'Kiyès ki pwochen mwen?' Li te reponn avèk parabòl bon Samariten an. Istwa sa a te kapte atansyon moun Jwif Jezi t ap pale ak yo a, paske te gen yon long istwa ostilite ant Jwif ak Samariten yo. Petèt ou te deja santi w mal alèz lè w nan menm espas ak yon moun ki soti nan yon lòt ras, kilti, oswa klas ekonomik ki diferan de ou menm. Petèt ou konnen tout bagay sou konfli rasyal istorik ki egziste ant kominote pa w la e lòt kominote a. Petèt gen moun ou gen tandans evite, kit se konsyaman oswa enkonsyaman. Kisa Bondye ap di w sou reyaksyon ak konpotman ou w yo? Ki pwochen etap ou?

Nan parabòl Jezi a, moun ki te sanble mwens ak yon pwochen se li ki te aji plis tankou yon bon pwochen. Jezi montre kijan nan Peyi Wa Bondye a, pa gen okenn divizyon rasyal, etnik, oswa kiltirèl. Samariten an pa t soti nan menm zòn ak Jwif ki te blese a sou wout la. Li pa t konnen l, li pa t viv toupre l. Men, Samariten an te montre zafè bon pwochen depase baryè. Fè yon bon vwazen fasil lè n ap pale ak moun nou renmen, moun ki sanble ak nou, oswa moun nou konnen. Men, nan definisyon Jezi de yon bon pwochen, resanblans, abitid, ak senpati pa gen anyen pou wè ak sa.

Nou gen opòtinite pou demontre kòmandman Jezi yo atravè jan nou renmen Bondye ak jan nou renmen lòt moun nan kominote legliz nou yo. Pòl te eksplike kwayan Korent yo kijan Bondye te kreye legliz mondyal Li a, kò Kris la: pa ta dwe gen okenn divizyon nan kò a, men tout pati yo ta dwe pran swen youn lòt egal-ego. Si yon pati ap soufri, tout lòt pati yo soufri avè l; si yon pati onore, tout lòt pati yo rejwi avè l. Imajine nou tout sa ki t ap chanje si tout moun nan kominote w oswa sèk zanmi w ta kòmanse di, 'Rasis se pwoblèm pa m tou.'

Jezi li menm te montre nou egzanp sou fason pou nou depase baryè sosyal sa yo ki separe nou yo ak kijan nou ka renmen moun ki diferan. Li te kite syèl la pou L vin manje ak pèseptè enpo, fè zanmi ak pechè, pale ak lepre, epi montre konpasyon ak gras pou pechè yo. Pran yon ti tan pou kite verite sa a penetre nan kè w: rasis se pwoblèm pa nou tou, epi nou ka rezoud li lè nou obeyi kòmandman Jezi yo atravè jan nou renmen Bondye epi renmen moun. Ann pwofite de chak opòtinite nou genyen pou nou montre nan lavi tout kalite moun nou kontre sou chimen nou gras, lanmou, ak respè.