Nouvo KwayanEgzanp

Grandi nan lafwa

Kòm kwayan, nou dwe toujou ap grandi nan konesans pawòl Bondye. Nou pa ka rete kote nou te kòmanse a, men nou dwe chèche grandi epi devlope relasyon nou ak Kris la. Sa vle di li pawòl la, priye, epi vin manm ak patisipe nan aktivite yon legliz lokal, pou nou kapab jwenn ankourajman ak sipò nou bezwen sou chemen an.

Mwen sonje lè m te fenk asepte Kris, mwen te renmen al legliz kote m te mache a chak fwa te gen aktivite, mwen te toujou ap chache rete konekte ak Bondye, men m te plis al legliz pase m te pase tan pou m te li pawòl la. Pastè mwen te toujou ap di m pou m li Bib la, men m pat souvan fè sa, m te panse se sèlman al nan aktivite legliz, priye epi sa te sifi. Yon jou, pandan m t ap li Istwa David ak Golyat la, mwen te dekouvri kijan avèk lafwa nan Bondye, pa gen anyen ki enposib. Lè m te kòmanse ap grandi nan lafwa, mwen te komanse tou fè fas ak anpil difikilte. Te gen moman kote m te santi m pou kont mwen epi m te dekouraje. Men, chak fwa m te sonje istwa David devan Golyat la, epi m priye m te jwenn fòs ak kouraj pou m kontinye avanse.

Kwayans se yon vwayaj, yon chemen nou mache chak jou, e youn nan fason ki pi pwisan pou kwayans nou ka grandi se atravè sa nou tande. Women 10:17 di nou, « Se konsa, lafwa soti nan sa nou tande, e sa nou tande a soti nan pawòl Bondye a.» Lè nou koute Pawòl Bondye, kit se atravè prèch, lekti Bib la, oswa temwayaj lòt moun, grenn lafwa plante nan kè nou. Nan ka sa a nou ka konsidere yon grenn semans ki plante nan yon bon tè. Li ap kòmanse jèmen tankou yon ti bagay ki parèt fèb. Men lè li jwenn dlo, limyè solèy, ak bonjan tan, li grandi pou l vin tounen yon gwo pyepwa solid k ap fleri kote tout kalite ti zwazo ka vin repoze. Lafwa nou se menm jan an. Chak fwa nou tande Pawòl Bondye, se tankou n'ap wouze grenn semans sa a.

Ann reflechi sou istwa fanm pèt de san an nou jwenn nan Mak 5:25-34. Li te soufri pandan anpil ane, men lè li te tande pale de Jezi, lafwa li te limen. Li te kwè vrèman si li te kapab jis manyen bò rad li, li kapab geri. Sa li te tande yo te fè Lafwa pran dife, e sa te mennen a mirak gerizon li.

Jodi a se yon jou pou lafwa nou grandi, sonje se nan sa n tande, sa n li, sa n wè Bondye fè lafwa nou ap gardi. Se pou nou pa neglije chèche aplike prensip sa yo nan lavi nou.

Ann priye:

« Seyè, nou remèsye Ou pou kado Pawòl Ou a, ki nouri ak ranfòse lafwa nou. Ede nou pou nou kontinye chèche ak koute verite Ou la, kite l pran rasin nan kè nou epi grandi. Se pou lafwa nou toujou ap ogmante, gide nou atravè chak sezon lavi a. Amèn. »