Pran aplikasyon anNouvo KwayanEgzanp
Lafwa nou ak zèv nou yo.
Lafwa nou ak zèv nou yo. Lafwa san zèv ap mouri. Se vre nou ka gen lafwa nan Kris la, men se nan aksyon nou yo li dwe manifeste. Zèv nou yo pa sove nou, men yo montre ke lafwa nou reyèl. Bondye te kreye nou pou fè bon travay, e nou dwe viv yon fason ki reflete lafwa nou nan Kris la.
Lafwa san zèv se tankou yon pyebwa ki pa pote fwi. Li pa ka ede okenn moun. Konsa, li enpòtan pou nou fè zèv ki montre nou gen lafwa. Si nou di nou gen lafwa, men nou pa fè zèv, lafwa sa a pa gen valè. Nou dwe kite lafwa nou pouse nou fè bòn zèv tankou ede lòt moun, epi viv yon vi ki fè Bondye plezi.
Nan parabòl Bon Samariten an nan liv Lik 10:25-37, Jezi anseye nou yon leson pwisan sou lafwa ak bòn zèv. Yon nonm te bat, vòlè pase sou li, epi kite l pou mouri bò wout la. Yon prèt ak yon Levit, ki se de figi relijye respekte, pase san yo pa pote èd ya bay nonm nan. Men, yon Samariten, ki konsidere kòm yon etranje pou Izrayèl, te kanpe pou ede nonm blese a. Li panse blesi li yo, mennen l nan yon otèl, epi peye pou yo ka ba li swen. Samariten an te demontre yon konpasyon ak bonte anvè nonm sa a ki te kouche atè bò wout la malgre selon Jwif yo li pa t yon moun ki diy devan je Bondye, e Levit la ak prèt la se moun yo ki gen lafwa epi ki gen respè nan je pèp la.
Istwa sa a montre kijan lafwa se pa sèlman yon kesyon de kwayans oswa rit relijye, men se aksyon nou yo ak kijan nou trete lòt moun ki defini li. Aksyon Samariten an montre sa sa vle di pou renmen pwochen nou tankou tèt nou (Matye 22:39).
Nan lavi nou chak jou, nou jwenn anpil okazyon pou demontre lafwa nou. Lè nou ede yon moun ki nan bezwen, lè nou bay yon bon konsèy ki ede yon lòt moun, lè nou fè yon jès ki montre jantiyès nou, se lafwa nou, nou ap montre. Aksyon sa yo se prèv vivan lafwa nou pa dwe sèlman chita nan pawòl, men nan zèv yo tou.
Se sak fè, sa pa ase pou nou di nou gen lafwa, men nou dwe viv li tou. Lafwa ak zèv dwe mache ansanm. Nou dwe fè tout sa nou kapab pou nou sèvi lòt moun epi montre ke lafwa nou nan Kris la se yon bagay ki vivan epi ki aktif. Se konsa n ap rive glorifye Bondye e fè yon diferans pozitif nan mond lan.
Konsènan Plan sa a
Gid lekti biblik sa a se yon bon zouti pou nou menm ki apèn asepte Kris. Dokiman sa a va ede nou konprann kijan pou nou grandi nan lafwa nan Kris la. Pou chak jou yo w ap jwenn pasaj biblik ki akòde ak istwa yo pou ede w byen konprann epi aplike yo nan lavi w.
More
Nou ta renmen remèsye Joseph Vassa paske li bay plan sa a. Pou plis enfòmasyon, tanpri vizite: https://www.instagram.com/josephjeanmarcvassa/
