Nouvo KwayanEgzanp

Nouvo Idantite nan Kris la

Nan Kris la, nou vin yon nouvo kreyati. Nouvo idantite nou an pa baze sou sa nou te ye avan, men sou sa Bondye fè nou vin ye. Nou pa viv pou nou ankò, men se Kris la k ap viv nan nou. Konsa lavi nou chanje direksyon, nou vin genyen yon objektif ki nouvo.

Lè nou pran konsyans kijan nan Kris la, nou se yon nouvo kreyati, tout vye fason nou te genyen, tout vye abitid nou yo, tout vye panse nou yo, tout bagay sa yo nou kite yo nan lavi pase nou. Sa pa vle di nou p ap janm fè peche ankò, oubyen nou tounen moun san defo, men sa vle di lè nou ta tonbe nan peche Sentespri a ap redrese nou. Nou pa mare nan chenn peche yo ankò, men nou libere gras a san Kris la. Sa vle di jounen sa a Bondye kreye a ou kapab kòmanse li avè yon kè ki plen ak kontantman paske ou gen yon lespri nouvo.

Nan nouvo idantite sa a, nou gen yon misyon pou nou ranpli. Nou pa t kreye pou nou viv pou selon pwòp plan pa nou, men pou nou sevi yon pi gwo objektif: sèvi Bondye epi renmen pwochen nou. Kris la k ap viv nan nou an, atravè Sentespri a ap travay nou pou nou ka rive mache nan plan sa a. Chak aksyon nou pran, chak desizyon nou fè, yo dwe reflete prezans Kris la nan lavi nou.

Viv kòm yon nouvo kreyati nan Kris la se yon pwosesis ki mande devouman chak jou. Nou dwe fè efò pou nou grandi nan lafwa nou, pou nou etidye Pawòl Bondye, epi pou nou lapriyè san rete. Pandan n ap fè sa, n ap santi prezans Bondye ap grandi nan lavi nou, epi n ap vin pi plis tankou Kris la chak jou.

Annou pran moman sa a pou reflechi sou nouvo idantite nou an nan Kris la. Annou mande Bondye pou li kontinye renouvle lespri nou, pou li ranpli kè nou ak lanmou li pou nou kapab rive tout bon vre renmen Bondye epi renmen pwochen nou. Amen.