LanmouEgzanp

Lanmou pou Lòt Moun

Jezi fè nou konnen pi gwo kòmandman yo se renmen Bondye epi renmen lòt moun tankou nou renmen tèt nou. Li fè nou konnen tout lwa nan Bib la ak tout sa pwofèt yo di repoze sou de kòmandman sa yo. Lanmou pou Bondye dwe premye priyorite nou, epi lanmou sa a dwe reflete nan jan nou trete lòt moun.

Lanmou pou pwochen se yon prèv ki montre nou konnen Bondye. Yon moun ki vrèman konnen Bondye, lap demontre lanmou li natirèlman atravè aksyon li yo. Lè nou renmen lòt moun, nou montre se nan volonte Bondye n ap viv e nou gen relasyon sere avèk Li. Lanmou pa janm fè mechanste. Li toujou chèche byen lòt moun. Li montre mizèrikòd, bonte, ak pasyans menm lè se pa yon bagay ki fasil.

Si nou renmen Bondye, nou dwe renmen lòt moun menm jan li renmen nou. Lanmou Bondye pa gen limit. Li renmen nou malgre feblès nou ak defo nou. Nou dwe fè efò pou nou renmen lòt moun avèk menm kalite lanmou sa a. Nou pa ka pretann renmen Bondye si nou gen rayiman nan kè nou pou frè nou ak sè nou.

Lanmou se baz fondamantal relasyon nou ak frè n ak sè nou yo. San lanmou, relasyon nou yo ap vid, konfliktyèl, epi frèt. Lanmou bati pon, li geri blesi, epi li kreye inite nan fanmi, nan legliz, nan sosyete kote n ap evolye yo. Lè nou renmen, nou viv nan egzanp Jezi Kris ki se modèl lanmou ak sèvis san defo a.

Lanmou Bondye chanje kè nou, li fè nou pi sansib devan bezwen lòt moun, epi li fè nou dispoze kè nou pou ede epi pataje sa nou genyen. Lanmou sa a egzije pou nou padone, pou nou bay san nou pa tann anyen an retou. M swete pawòl sa yo chanje lide ou sou sa w konprann sou lanmou epi aprann ou viv nan lanmou reyèl la. Bondye beni w !!