ARING KELESING 34
34
Daha' Sikhem ngivah té' Dina
1Té' nah ji hangun, tei nah Dina anak Lea aleng doh, anak dawa' Yakub, panau tei nyineng anak doh daha' daléh atih. 2Tegu iha' tei atih kitan Sikhem anak Hemor aleng laja' daha' bengsa' daléh Hewi atih nah iha', pelalau en na' livoh nah Dina dahin meté' nulung iha', pelalau peji dahin na'. 3Kenep na' pah pelalau malei dahin Dina anak Yakub anan, iha' pah kelalé' ngenep té' doh uk atih dahin meté' nyua-nyua iha'. 4Avin ha' nunan, kuma' nah Sikhem men Hemor taman na' nan, “Amei, en ala nah nyemdoh anih hawak.”
5Kelenghen Yakub nah dengah Sikhem meté' peji dahin Dina. Bi dalo' anak aké' Yakub té' ha' padang puboh hulung, nusi' Yakub kaséh nira daho' atih men ji-ji la'ung ateng dalo' nei uli. 6Tei nah Hemor taman Sikhem nan pala Yakub, ja tengaran dahin na'. 7Alem nunan dih nei nah dalo' anak Yakub uli men padang, kelenghen dalo' nah daho' atih, dalo' pah heléh lelan, pelalau dalo' bunget, avin Sikhem uh na barik aleng em teneng té' hang daha' Israel, avin meté' peluvat anak doh Yakub nutih, avin barik aleng nutih nusi' peletu ha' sayu. 8Tengaran nah Hemor dahin dalo', “Kenep Sikhem anak kui nih tangen lelan kenep na' té' anak ka', sayu nah kelo' ma'uk iha' ja ha' hawan na' ji'ek bareng. 9Bei nah itam em pekelukung tua pehawa', sayu ikam ma'uk doh kam men kamé', nurei pah kamé' ma'uk doh amé' men ikam lahuh. 10Sayu nah ikam té' murip dahin amé' hinih, daléh anih ia', iha' daléh kam kah anih lahuh, murip nah ikam té' alem daléh anih tua. Piah nah telo' mejen daléh anih, murip nah telo' lim hinih.”
11Ken Sikhem men taman doh anan dahin men dalo' harin aké' na anan lahuh, “En kelo' masi nah akui ji'ek amei, arin, akui pah seng ma'uk ket men kelo', nun-nun aleng kenep kelo' akei, 12iha' kelo' pah akei kuri-kuri kahum bareng aleng kenep kelo' jei hawa' kui na'a, adang ek uk kah tua ket aleng en kelo' akei atih, bi sukun nah kelo' ma'uk doh anan hawak.”
13Pelalau dalo' anak Yakub nyu'ei Sikhem dawa' Hemor taman na' dahin daho' awi peluvat dih, avin Sikhem atih uh tei peji lan dahin harin doh dalo' nan. 14Ken dalo' men iha', “Nusi kamé' deng na nunan, seng ma'uk harin amé' men ji laké' aleng em payan sunat, avin em sunat atih, atek ji'ek lan atih té' kamé'. 15Iha' nunih uréh kamé' seng deng ala dahun kua' nan, iha' tih, ikam tekep na awi kamé', lim-lim ikam laké' tekep kam sunat. 16Em iha' nunan uréh nah kamé' deng ma'uk doh amé' men ikam, kamé' pah deng ala doh kam lahuh, kamé' pah seng té' murip dahin kam, itam pah seng jadi' ji bengsa' tua. 17Bi tana' ikam em kaséh kelenghi dahun amé' nih, iha' ikam em sunat, adang kamé' seng nei ala harin doh amé' anih uli, pelalau tei leka' lap.”
18Pelalau Hemor dawa' Sikhem anak na' anan piah kenep ngioh dahun dalo' atih. 19Laké' nyemaké' atih pah em peletu nyura' dahun dalo', pelalau iha' na awi dahun dalo' atih, avin iha' kelalé' ngenep anak Yakub atih, ji pah lahuh laké' atih ji kelunan aleng kelalau sayu men hang daha' alem amin na'.
20Pelalau tei nah Hemor dawa' Sikhem anak na' atih ha' ketamen aya' daléh daha' atih,#34:20 KETAMEN AYA' DALÉH DAHA' iha' atih ngavan daha' aleng dekaya' melo' na tengaran daha' dahin mutet daho'. dawa' pah tengaran dahin daha' huang daléh dawa' atih, ken dawa', 21“Daha' kelunan atih ngenep murip sayu dahin tam, bei nah daha' ji'ek em té' murip dahin tam, bei nah daha' em peji dahin tam mejen daléh anih. Tana anih layang kah anih, deng ngavan tam lim kah anih keta'? Sayu nah itam ala doh daha' hawan tam, daha' pah ala doh tam lahuh. 22Bi nunih tam na', iha' daha' kaséh peji murip dahin tam jadi' ji bengsa' tua, iha' tih sukun nah itam sunat lahuh awi daha'. 23Hulung daha' dahin daven daha' atih, jadi' anun tam lim nah atih baya keta'? Bi sukun nah itam ngioh aleng dahun daha' tua, ja daha' té' murip teneng dahin tam.” 24Lim-lim kelunan aleng tei pepeng ha' ketamen daléh atih pah ngioh dahun Hemor dawa' Sikhem anak na' atih. Pelalau en daha' sunat nah lim laké' aleng uh dekaya' té' alem daléh atih.
25Alem ketlo' dau na', alem daha' na té' katé' perah na' loh kah, nei nah dua' la'ung anak Yakub, iha' tih Simeon dawa' Lewi, harin aké' Dina, dawa' pah ala malat dawa' tei nekjet daha' daléh atih aleng tebau tua, dawa' pah lematei lim-lim daha' laké' daléh anan. 26Hemor dawa' Sikhem anak na' anan pah en dawa' lematei lahuh, palalau dawa' ala Dina men alem amin Sikhem, pelalau geri iha' uli. 27Uh anan tei nah dalo' anak Yakub nyilé' lim-lim ket alem daléh atih, avin dalo' heléh daha' tei peluvat harin doh dalo' aleng da'uk atih nunan dih. 28Lim-lim kading, duba, sapi', keledei daha' dahin lim-lim ket aleng alem daléh dahin hulung aleng ha' padang daha' lahuh, en daha' ala lim. 29Lim daven daha' en daha' ala, nurei pah doh dahin anak daha' en daha' ala salut, lim-lim ket aleng alem uma daha' en daha' hilé' lim-lim.
30Ken Yakub men Simeon dawa' Lewi, “Kua' uh petusah kenep kui tua dahin na aran kui ji'ek té' hang kelunan huang daléh anih, iha' tih dahin kelunan Kanaan dahin kelunan Feris. Bi itam nih, kanya tua la'ung tam. Awi daha' piah kenep nei melawan itam, adang itam em deng kenan daha', itam lim pah seng en daha' nasa', akui dahin lim telo' panak nih ké'.”
31Bi ken dawa' nyu'ei, “Nun kenan daha' na harin alo' aleng da'uk anih awi na doh pedayang dih tua nunih.”
Trenutno odabrano:
ARING KELESING 34: TDK1990
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible in Today's Dahun Kayan Version © Bible Society of Malaysia, 1990.