ARING KELESING 33
33
Yakub pepsuk dahin Esau
1En Yakub kayeng nah hineng na' nyineng su, beka' kitan na' nah Esau nei ateng dahin pat atuh la'ung daha' aleng dahin na'. Pelalau en na' uk nah dalo' anak na' anan men dalo' doh na', balei na' en na' uk men Lea, balei en na' uk men Rahel, balei pah en na' uk men dawa' doh nyam-amin na' atih. 2Dawa' doh nyam-amin na' anan dih en na' tei una' dahin dalo' anak dawa'. Lea dahin anak na' ngebaya dalo', Rahel dahin Yusuf dawa' aleng baya loh. 3Batung na' dep aleng panau una' ha' unan dalo'. Iha' nukem tusu hangun ateng ha' tana, ateng-ateng iha' tei jeleng harin na' atih. 4Bi Esau pah tepurung pala iha' tei gem iha', pelalau ngelameng keran na' dahin meté' marek iha', dawa' ji'ek pah hi'en tua nangih. 5Esau nyineng pah ké' té' pah dalo' doh dahin anak dalo' lahuh kitan na', pelalau iha' meteng, “Hi kelunan aleng dahim anih du?” Ken Yakub, “Anan nah anak aleng uh en Allah uk men akui ji'ek pa.” 6Uh anan tei nah dawa' doh nyam-amin anan jeleng dahin anak dawa' lahuh, dalo' pah nukem ha' unan na'. 7Tei pah Lea dahin anak na' jeleng lahuh dahin nukem ha' unan na', tei pah Rahel dawa' Yusuf jeleng, nukem ha' unan na'.
8Kuma' nah Esau, “Nuno' tuk kenep ka' marung tuk lim peng hulung aleng pepsuk akui men'a dih?” Ken na' nyu'ei, “Anan nah akui ilau halam harik.”
9Bi ken Esau, “U arin, meng tusah, kahum kah anuk, im puboh nah aleng anum anan tua.”
10Bi ken Yakub, “Jan, nusi' ha' nunan arin. Tana' ika' masi akui lan, im ala nah ket aleng ek uk anih, avin akui nyineng neng ka' awi jam tuk kui nyineng neng Allah dih, ika' pah uh sayu kenep ala akui lahuh. 11Im ala nah ket aleng ek uk anan, avin Allah uh ma'uk lim-lim ket anan men akui, iha' kah iha' té' nunan nan.” Iha' pah meté' ngepden-ngepden Esau nyihu iha' ala na', iha' nah Esau ala na'.
12Ken Esau, “Sayu nah itam pelalau tei leka' kerei nih, ja akui té' puboh kelo' panau si'.”
13Bi Yakub kuma' men iha', “U arin, akei asi kui, meng im pekwat, avin dalo' anak anih nusi' payan dalo' tu'a, lan, té' pah kading dahin duba, sapi' aleng nganak uk lahuh, awi ita' panau timah-timah geri-geri daha' alem ji dau nih tua, adang lim daha' hulung anih seng matei. 14Sayu nah im tei una' tua, baya kah kalo', avin seng pelihei tua kui ngioh-ngioh anau daha' hulung kui anih, dahin pukui-pukui anau dalo' anak anih lahuh. Nei kah kalo' pelihei-pelihei ateng ika' ha' Seir nan.”
15Lun ken Esau pah, “Tana' ha' nunan sikah, sayu nah akui melo' daha' balei kelunan aleng dahik anih men ika'.” Bi ken Yakub pah, “Nusi' pekwat ha' nunan, itu' uh pejam nah anih pa.” 16Men'uh anan dih uli nah Esau dau anan tei ha' Seir. 17Bi Yakub leka' tei ha' Sukot, hitih nah iha' na uma dahin na kelahen avan hulung na' lahuh. Atih nah tavit daha' na aran titih Sukot.
18Alem anau Yakub leka men Padan-Aram, nusi' té' nun-nun tusah na' tei ateng ha' Sikhem, ha' tana Kanaan, pelalau ha' na lepau na' men pedah matan dau pa'un té' daléh atih. 19#Yos 24:32; Yoh 4:5 Iha' pah melé' ji tana té' anak-anak Hemor aleng taman Sikhem, ngavan na' uh na lepau na' anan, legah tana atih ji atuh li'ap pirek. 20Tinan nah iha' na avo' ngavan na' ma'uk bun usu na' men Tuhan, dahin na aran na' “Allah Israel, iha' nah Allah.”
Trenutno odabrano:
ARING KELESING 33: TDK1990
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible in Today's Dahun Kayan Version © Bible Society of Malaysia, 1990.