ARING KELESING 35
35
Allah ma'uk asi Na' men Yakub ha' Betel
1 #
Ar Kel 28:11-17
Ken Allah men Yakub, “Petmei nah im, leka' nah tei ha' Betel, hinan nah im té'. Im na nah ji avo' ngavam ma'uk bun usu ka' men Akui, avin Akui nah aleng petula batung Kui men ika' tegu ika' lap Esau harim dau arei dih.”
2Lun kuma' nah Yakub men lim daha' aleng huang uma na' dahin men lim daha' aleng dahin na' atih lahuh, “Sau nah lim takeng kelunan aleng em nginah aleng té' té' hang tam anih, ngem'ang nah batung kelo', en ngalui nah kanan kelo'. 3Sayu nah itam tei ha' Betel, avin akui seng na ji avo' ngavak ma'uk ket aleng bara bun usu kui men Allah aleng uh kelenghi dahuk tegu kui ga' katé', dahin aleng uh puboh akui té' lim alan aleng avak uh panau.” 4Daha' pah ala lim takeng kelunan aleng em nginah aleng uh kelan daha' atih, en daha' uk nah men Yakub, dahin ma'uk iseng aleng té' té' iling daha' atih lahuh. Yakub pah pelalau nanem na' té' ida ji iung kayo belavan#35:4 KAYO' BELAVAN alem Bahasa Kebangsaan “kayu tarbantin”. jeleng té' Sikhem.
5Men'uh anan leka' nah daha'. Pelalau nei nah ji akut aya' alem lim daléh atih, nusi' nah té' daha' deng tei livoh anak Yakub anan dih.
6Ateng nah Yakub ha' Lus, iha' tih Betel, aleng ha' tana Kanaan, dahin lim-lim daha' aleng dahin na' atih lahuh. 7Iha' nah iha' na ji avo' ngavan na' ma'uk ket aleng bara bun usu na' men Tuhan tinan, dahin na aran na' El-Betel, avin titih nah aleng ngavan Tuhan uh petula batung Na' men iha', tegu iha' lap men harin na' Esau dau arei dih. 8Tegu anan pah Debora aleng tinak Ribka atih matei, iha' pah en daha' tanem ha' Betel ha' oh té' ida ji kayo' belavan. Avin anan daha' na aran na', Belavan Angih.
9Tegu Yakub nei men Padan-Aram, Tuhan Allah pah tula té' iha' la'an, dahin muak asi Na' men iha'. 10#Ar Kel 32:28 Ken Tuhan men iha', “Nusi' nah aran ka' Yakub la'an, men dau anih Israel nah aran ka'.” Iha' nah Allah na aran na' Israel. 11#Ar Kel 17:4-8 Ken Tuhan Allah men iha' la'an, “Akui nah Allah Aleng Hipun Tingan. Nganak nah im kahum dahin nei katan. Ji bengsa', dahin kuri-kuri bengsa' pah seng nyemau men alem ka', dahin men alem ka' pah laja'-laja' seng nei nyemau. 12Nurei pah daléh aleng uh Ek uk men Abraham dawa' Ishak seng Ek uk men ika', dahin men pahu-pahu ka' baya pah lahuh.” 13Pelalau peju nah Allah men ngavan Na' tengaran dahin na' anan. 14#Ar Kel 28:18-19 En Yakub kelungun nah ji bato' na tada', ngavan na' hituk Tuhan uh duan iha' tinan, iha' pah muak ket dui' atih té' ujung bato' atih, bara bun usu na' men Tuhan, dahin mesoh kenyu lahuh té' bato' tada' anan. 15Iha' nah Yakub na aran ngavan na' tengaran dahin Tuhan anan Betel.
Rahel matei
16Men'uh anan leka' nah dalo' men Betel. Nusi' nuno' aru la'an dalo' seng ateng ha' Efrata, Rahel pah nei nganak, pekaté' lelan ha' ji'ek nganak. 17Alem-alem ha' pekaté' menei anak na' anan, kuma' nah bidan men iha', “Meng im ngihau, avin ji hangun anih laké' loh kah anak ka'.” 18Tegu ha' ji'ek mejat hengan na' jeleng-jeleng ha' seng matei, en na' ji'ek na nah aran anak atih Benoni, bi taman na' na aran na' Benyamin.
19Nunan nah tuk Rahel matei. En daha' tanem nah patei na' masah alan aleng tei ha' Efrata, iha' tih Betlehem. 20Yakub pah na ji tada' ujung tanem na', atih nah aleng ngavan daha' hituk pa'en té' tanem Rahel ateng kerei inih. 21Leka' nah Israel men inan, pejoh anau na', dahin na lepau na' ha' dipah ji Migdal-Eder.
Anak-anak laké' Yakub
1 Tuk 2:1-2
22 #
Ar Kel 49:4
Tegu Israel té' alem daléh atih, beka' Ruben tei peji tudu dahin Bilha hawa' apit taman na' anan, tula kah dengah atih kitan Israel. Lim dalo' anak aké' Yakub pulu-dua' la'ung. 23Aleng anak Lea, iha' nah Ruben anak una' Yakub, uh anan Siemon, Lewi, Yehuda, Isakhar, dahin Zebulon. 24Aleng anak Rahel, iha' nah Yusuf dawa' Benyamin. 25Aleng anak Bilha nyam-amin Rahel, iha' nah Dan dawa' Naftali. 26Aleng anak Zilpa nyam-amin Lea, iha' nah Gad dawa' Asyer. Anan nah lim dalo' anak aké' Yakub aleng anak na' ha' Padan-Aram.
Ishak matei
27 #
Ar Kel 13:18
Yakub pah ateng ha' Ishak taman na' ha' Mamre, ha' Kiryat-Arba, atih nah aleng Hebron, aleng ngavan Abraham dahin Ishak taman na' aleng uh murip awi nyakei tua. 28Arun urip Ishak nan, ji atuh saya'-pulu duman. 29Ishak pah matei tei pala sepun na' aleng uh lalau aleng hu'uh em té' men'a. Iha' matei anan, iha' uh muku aya'-aya' nah. Esau dawa' Yakub anak na' atih aleng nanem iha'.
Trenutno odabrano:
ARING KELESING 35: TDK1990
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible in Today's Dahun Kayan Version © Bible Society of Malaysia, 1990.