ARING KELESING 30
30
1Tegu Rahel jam iha' em té' anak na' dahin Yakub, mi'en nah iha' té' harin na' aleng dekaya' anan, iha' ha' kuma' men Yakub, “Sayu im ma'uk akui anak. Iha' ika' em ma'uk akui anak, adang akui seng matei.”
2Bunget nah Yakub na Rahel. Iha' ha' kuma', “Akui aleng kalui Allah aleng na ika' em mali nunan iah?”
3Ken Rahel men iha', “Sayu nah im ala Bilha nyam-amin kui, sayu nah im tei tudu dahin na', ja iha' na anak men akui, ja men iha' nah akui té' pahu.” 4Iha' nah iha' ma'uk Bilha nyam-amin na' men iha' itung hawan Yakub. Yakub pah tei tudu dahin nyam-amin Rahel nan. 5Bilha pah nei mali, iha' nah iha' nganak ji anak aké' men Yakub. 6Kuma' nah Rahel, “Allah uh petneng marung tuk akui ji'ek, Iha' uh kelenghi dahuk, ma'uk ji anak aké' men akui.” Atih nah tavit na' iha' na aran anak atih Dan. 7Mali pah Bilha nyam-amin Rahel atih la'an, nganak nah iha' ji anak aké' la'an men Yakub, aleng kedua' anak na'. 8Kuma' nah Rahel, “Akui uh la'ei peté' dahin harik aleng dekaya', akui nah aleng maneng.” Iha' ha' na aran anak atih Naftali.”
9Tegu Lea jam iha' uh em nganak la'an, en na' ala nah Zilpa doh nyam-amin na'a atih, ma'uk iha' men Yakub itung hawan na'. 10Zilpa nyam-amin Lea anan pah nei mali, nganak nah iha' ji anak aké' men Yakub. 11Kuma' nah Lea', “Sayu lan nah anih.” Iha' na aran anak atih Gad. 12Zilpa nyam-amin Lea anan pah nganak ji anak la'an aleng kedua' men Yakub. 13Iha' nah Lea kuma', “Sayu lan nah kenep kui la'an! Adang lim-lim daha' doh na ja'bei akui.” Iha' nah iha' na aran anak atih Asyer.
14Tegu jaka' ngelunau tei nah Ruben panau-panau, iha' ha' pesuk bua tumo' ha' luma', pelalau ha' geri na' men Lea hinan na'. Ken Rahel men Lea, “Im uk kui uk bua tumo' aleng kelan anak ka' nan.”
15Ken Lea nyu'ei iha', “Nusi' payan lema kenep ka' ala laké' kui nan iah? Na' nun pah ika' akei bua tumo' anak kui nih la'an?” Ken Rahel, “Tana' ha' nunan sikah, bei nah iha' em nei tudu dahim malem naih, itung kalui bua tumo' anak ka' nan.”
16Tegu Yakub nei uli men luma' avin dau uh levi, tei nah Lea pala iha', iha' ha' kuma' men iha', “Nusi' deng ka' em nei nyangei ha' tilung kui malem anih, avin akui uh nibah ika' té' bua tumo' kelan anak kui.” Avin anan tudu nah Yakub dahin Lea malem anan.
17Allah pah kelenghi dahun Lea marung ket aleng en na akei, Lea pah nei mali, nganak ji anak aké' men Yakub, iha' aleng kelima' anak na'. 18Ken Lea, “Allah uh ma'uk tibah men akui, avin akui uh ma'uk doh panyin kui men laké' kui.” Iha' ha' na aran anak na' atih Isakhar. 19Men'uh anan nganak pah Lea la'an ji anak aké' aleng kenem na' men Yakub. 20Kuma' nah Lea, “Allah uh ma'uk tibah aleng lalau sayu men akui, kerei inih laké' kui seng kaséh akui ji'ek avin akui uh nganak nem anak aké' men iha'.” Iha' nah iha' na aran anak atih Zebulon. 21Men'uh anan la'an iha' nganak ji anak doh, aran na' Dina.
22Hituk nah Allah té' Rahel, en Allah kelenghi nah dahun na', en Na' nemei nah buko' anak na'. 23Iha' nah Rahel nei mali, iha' nah iha' nganak ji anak aké'. Iha' ha' kuma', “Uh en Allah bet nah ha'éh kui ji'ek nih.” 24Iha' ha' na aran anak atih Yusuf, ken na' pah lahuh, “Sayu nah Tuhan menei ji anak aké' la'an i'at anak anih.”
Yakub tengaran dahin Laban
25Men'uh Rahel nganak Yusuf, kuma' nah Yakub men Laban, “Im koh nah akui ji'ek tei leka', ja akui tei uli ha' daléh avan kanak kui dih. 26Im nei nah doh-doh kui dahin lim anak-anak kui ji'ek, aleng itung tibah kui jarun dara kui ji'ek uh nyadui dahim nih, ja akui tei uli. Ika' ji'ek pah aleng uh jam, kuri-kuri nah katé' kui uh nyadui men ika'.”
27Bi ken Laban men iha', “Akei asi lelan kui té' ika'. Uh tula lan nah té' akui, Tuhan uh té' masi akui ji'ek kenam.” 28Té' pah ji dahun na' lahuh, “Im bara nah men akui, ket nun aleng seng ek uk tibah ka', ju atih kah ek uk ika'.”
29Ken Yakub nyu'ei iha', “Ika' pah aleng uh jam nuno' tuk hadui kui dahim, nuno' kah jam tuk urip hulung ka' jarun dara kui ji'ek uh puboh daha', 30avin daven ka', nusi' ha' kahum nunan em payan akui nei, bi kerei inih ké' uh kelalau katan lelan nah daha'. Tuhan uh masi ika' jarun-jarun kui uh té' dahim anih. Seng hiran nah akui ji'ek tei na hadui ha' amin kui dep kurim?”
31Ken Laban nyu'ei, “Ket nun aleng seng tekep ek uk ika' lo?” Ken Yakub nyu'ei, “Meng pekwat ma'uk ket nun-nun men akui, akui pah aleng seng puboh kading dahin duba ka' la'an, sukun nah ika' mekoh akui té' tuk aleng kurik anih. 32Bei nah akui em tei dau anih ha' peng kading dahin duba, ja mukéh men alem peng daha' lim duba aleng kalung turek-turek dahin aleng pulau, lim-lim anak duba aleng pitem, nurei pah kading aleng pulau dahin aleng kalung, atih nah aleng tibah kui, 33ja ha' tula telana' daha' pa'en baya tih, awi ka' nei nesek aleng anuk ké', no'-no' daha' aleng em kalung aleng em pulau-pulau men hang daha' aleng anuk tih, tula nah atih akui té' nakau aleng anum.”
34Iha' nah Laban kuma', “Sayu kah ké', petneng nah awi aleng kurim anan.” 35Bi dau anan, pelalau nah Laban tei peken'an kading laké' aleng dirau dahin aleng pulau dahin lim kading doh aleng kalung dahin aleng pulau, nurei pah lim aleng puti lah daha', nurei pah aleng pitem men hang lim anak duba dahin ma'uk lim atih men anak-anak na', en dalo' puboh. 36Uh anan Laban petneng nah su na' men avan Yakub melo' anan, su na' anau telo' dau. Yakub pah puboh hulung kading dahin duba Laban aleng la'an anan.
37En Yakub ala nah ji da'an aleng murip, da'an kayo' hawar, nurei pah da'an kayo' badam dahin kayo' tumo' en na' meka' nah kun da'an anan pulau-pulau ateng lutang na' tih. 38Iha' ha' metei da'an aleng en na' meka' kun na' anan alem bungan avan daha' du'i, tino' tua tatah avan daha' kading dahin duba atih du'i, tei marung-marung tatah unan kading dahin duba tih. Daha' kading dahin duba atih nei du'i, ngenep seng mayun lalau daha. 39Tegu kading dahin duba tei payun té' béh da'an atih, anak daha' pulau kalung dahin dirau-dirau lahuh.
40Men'uh anan en Yakub peken'an nah anak duba atih, en na' telunga' nah neng kading dahin duba atih pala aleng dirau dahin ha' unan lim aleng pitem men hang lim-lim kading duba Laban. Nunan nah aring iha' hipun kahum hulung. En na' ukéh nah anun na', nusi' nah iha' pekelet anun na' dahin kading dahin duba Laban.
41Tegu daha' kading dahin duba atih aleng tu'a atih ngenep seng payun, en Yakub tei nah da'an-da'an atih alem bungan té' unan kading duba atih, ja daha' payun-payun nutih té' béh da'an atih. 42Bi tegu kading dahin duba aleng em tu'a nei, nusi' ha' metei da'an atih halem na'. Daha' kading duba aleng em tu'a atih, daha' nah anun Laban, aleng tu'a-tu'a jam daha', daha' nah aleng anun Yakub. 43Sa' kahum nah daven Yakub, iha' pah hipun kahum kading dahin duba, nurei pah hulung unta dahin keledei, té' pah daha' doh dahin laké' nyam alem amin na' lahuh.
Trenutno odabrano:
ARING KELESING 30: TDK1990
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible in Today's Dahun Kayan Version © Bible Society of Malaysia, 1990.