ARING KELESING 31
31
Yakub lap men Laban
1Kelenghen Yakub nah dahun dalo' anak Laban kuma' nunih, ken dalo', “Uh en Yakub ala lim nah daven tamei nih, té' daven na' anan nah iha' nei kaya' nan ké'.” 2Adang kitan Yakub pah neng Laban em nuno' sayu té' iha' awi jam tuk sayu neng na uh men'a. 3Lun ken Tuhan men Yakub, “Tei nah im ji'ek uli pala daléh sepum, ha' daha' amin ka', Akui pah seng té' dahim,” ken Na'.
4Men'uh anan en Yakub nyihu nah duan Rahel dawa' Lea, tei pala iha' ha' padang kading dahin duba na' atih. 5Pelalau ha' kuma' men dawa', “Akui nyineng neng tamei nusi' nah iha' awi neng na' aleng uh dih té' akui ji'ek, bi Allah tamak té' puboh akui. 6Kua' pah aleng uh jam, akui ji'ek pa'en nyadui tangen lelan dahin taman kua'. 7Bi taman kua' uh pamoh peluvat akui, iha' meté' masan tibah kui ateng pulu hangun, bi nusi' Allah mun iha' na ji'ek té' batung kui. 8Tegu ha' kuma' men akui, marung tibah kui, ‘Aleng kalung turek-turek iha' nah aleng tibah ka',’ daha' kading dahin duba anan pah nei nganak, petgu turek lim-lim pah anak daha'. Kuma' pah iha' la'an, ‘Anak aleng pulau iha' aleng tibah ka',’ nganak pah daha' kading dahin duba anan, petgu pulau lim-lim pah anak daha'. 9Nunan nah tuh Allah ala hulung taman kua', dahin ma'uk na' men akui.
10“Té' pah ji hangun, tegu jaka' kading dahin duba atih ngenep payun, ngenyupé' nah akui, beka' akui nyineng daha' aleng laké' tei mayun kading dahin duba doh anan dih, kalung lim-lim daha', té' aleng pulau té' aleng turek. 11Beka' kuma' nah Meliket Allah men akui alem nyupé' anan, ‘Yakub!’ ken Na'. ‘Nun Tuhan?’ kek nyu'ei Iha'. 12Pelalau Ha' kuma' men akui, ‘Keju'au im, nyineng im, lim aleng laké' tei mayun kading dahin duba doh anan, dirau dahin turek dahin pulau lim-lim daha', avin uh Ek nyineng lim nah tuk-tuk hadui Laban men ika'. 13#Ar Kel 28:18-22 Akui nah Allah aleng ha' Betel dih, té' ngavam mesoh kenyu té' bato' aleng im na tada' arei dih, té' ngavam na jaji Dahik dih. Kerei inih sayu nah im petmei, tei nah im leka' men daléh anih, tei uli pala daléh daha' panak ka'.’ ”
14Nyu'ei nah Rahel dawa' Lea iha', ken dawa', “Seng té' kah daven aleng tulan awa' ha' uma taman awa' la'an iah? 15Iha' kah iha' kuma' kawa' ji'ek itung kelunan daméh tua anih, avin iha' uh muéh kawa' ji'ek aleng nunih. Nurei pah lahuh daven tulan awa' uh en na' pekpah lim-lim nah. 16Bi lim-lim kaya' aleng uh en Allah ala té' taman awa', anan nah jadi' ketanun awa' dahin ketanun anak awa'. Kerei inih, na nah ngioh lim aleng uh en Allah bara men ika'.”
17Pelalau petmei nah Yakub, en na' tei nah daha' anak-anak na' dahin dalo' doh na' hujung hulung unta na', 18en na' geri nah lim-lim hulung-hulung dahin lim daven aleng uh kelan na', iha' tih hulung na' aleng uh kelan na' ha' Padan-Aram, iha' seng ngenep tei pala Ishak taman na' ha' Kanaan. 19Té' pah Laban, taman dalo' anan dih, uh tei nguting bulun duba na' nah iha'. Tegu anan pah Rahel nakau takeng taman na'. 20Yakub pah tei leka' nyilem tua em kaséh bara Laban kelunan Aram atih, iha' leka' lap ngenuh tua té' iha'. 21Nunan nah tuk Yakub tei lap geri lim daven na'. Iha' tei leka' anan lawat hungei Efrat, tei panau pala ngalang Gilead.
Laban livoh Yakub
22Ketlo' dau na', en daha' bara nah men Laban Yakub uh tei lap. 23Pelalau en na' geri nah lim dalo' panak tei livoh Yakub, tusu dau su anau na' dalo' livoh Yakub, iha' nah dalo' behi'a iha' ha' ngalang Gilead. 24Malem anan nei nah Allah pala Laban kelunan Aram anan té' alem nyupin na', ken Na' men iha', “Hituk sayu-sayu im, meng im peletu na daho' nun-nun men Yakub.” 25Yakub uh na lepau na' hujung ngalang Gilead tegu Laban behi'a iha', Laban dahin dalo' panak na' anan pah na lepau dalo' hujung ngalang anan lahuh.
26Kuma' nah Laban men Yakub, “Nuno' kah tuk hadui ka' na nunih, ika' nei lap nyilem tua nunih, nei geri dalo' anak-anak doh kui nih awi geri kelunan aleng kelan daha' salut dih tua nunih? 27Na' nun ka' lap nyilem nei ngenuh tua té' akui nunih du? Na' nun ka' em bara akui, ja akui maten kelo' dahin sayu kenep, ja ngelu'an nyanyi dahin dak tuvung dahin dak sapé'? 28Ji pah lahuh ika' em bara akui nunan nusi' nah akui ji'ek havah nei marek dalo' sau kui aleng laké' dahin dalo' anak-anak doh kui. Adang em teneng lan kah barik ka' na nunih. 29Akui nih, haman kah akui na aleng ji'ek dahim, bi Allah tamam uh nebara akui malem dih, ken Na', ‘Hituk sayu-sayu im, meng im peletu na daho' nun-nun men Yakub.’ 30Lan pah ika' ngenep lan-lan tei leka' nunih avin ika' liveng té' tamam dalo' ha' uma ka' atih, beka' na' nun pah kelo' ngenep nakau takeng kui dih?”
31Pelalau Yakub nyu'ei Laban, “Takut kui di pa, avin akui pelemana' bahi ika' nei nyilé' anak ka' anih té' akui. 32Bi té' hi-hi ika' tei pesuk takeng ka' anan, sayu pulang kelunan anan em té' murip tua. Ilau nah ketanum nan té' hang lim-lim telo' peharin tinih ké', tana' ha' té' ketanum nan dahik ia', im ala nah tua ketanum nan.” Avin nusi' Yakub jam Rahel aleng nakau takeng atih.
33Pelalau tei nah Laban alem lepau Yakub dahin tei alem lepau Lea lahuh, tei pah iha' alem lepau dawa' doh nyam-amin na' anan, bi nusi' ha' tei pesuk takeng atih. Men'uh ha' musang men alem lepau Lea, tei nah iha' ha' lepau Rahel. 34Bi Rahel kah aleng ala takeng atih, bi iha' metei na' alem balun hamak daha' melo' ujung la'ung unta, iha' pah aleng melo' té' ujung na' lahuh. Laban pah meté' ngering na' lan-lan té alem lepau dalo', bi nusi' ha' tei pesuk takeng atih. 35Rahel kuma' men taman na', “Meng im bunget amei, avin akui em nei biti nih, avin akui alem na awi kamé' doh dih anih.” Laban pah meté' pelugat ilau na' lelan, bi nusi' ha' tei pesuk na'.
36Nei lasu nah kenep Yakub, en na' hakat nah Laban. Iha' ha' kuma' men Laban, “Ket nun ji'ek kui, nun sala kui, nun ja ka' heléh nei livoh akui nunih? 37Ika' uh meté' pelugat ilau-ilau alem ketu-ketu ketanuk nunih, nuno' kah, té' kah ika' tei pesuk nun-nun bareng aleng men uma' ka' iah? Tana' ha' té', sayu im melo' na' hinih ha' unan daha' harik nih dahin ha' unan daha' harim lahuh, ja daha' petneng na' té' hang tu' nih. 38Jarun dara dua'-pulu duman anih akui té' dahim, duba dahin kading doh ka', nusi' peletu té' aleng payan tei lahut ali daha', nurei pah kading dahin duba laké', nusi' peletu té' payan kui kuman daha'. 39Aleng en tulan hatan ala, nusi' té' kui geri na' men ika', akui dep kah aleng ngalui na', aleng en daha' nakau ngedau dahin en daha' nakau malem, ika' pah pa'en ilau anan té' akui. 40Akui ji'ek pah la'ei ga' perah dau ngedau, nurei pah malem akui pah katé' na té' nyingem, dahin em teneng loh kui tudu. 41Jarun dara dua'-pulu duman anih akui té' dahim, akui ji'ek pah nyadui aya'-aya' lelan dahim pulu-pat duman ala dawa' anak doh ka' nih, alem dara nem duman akui nyadui gaji' ala hulung, ika' pah uh pulu hangun meté' masan tibah kui. 42Awi ha' em Allah tamak, iha' tih Allah Abraham aleng en Ishak ju atih, em té' puboh akui, adang ika' kelung akui nei leka' halah tua em té' nun-nun ket im uk men akui. Bi Allah aleng uh pelemana' katé' kui dahin la'ei kui ji'ek, iha' nah Allah pekatuk ika' malem dih nan.
Yakub dahin Laban na jaji
43En Laban nyu'ei nah Yakub, “Dalo' doh anih anak kui, nurei kah dalo' anak aké' anih sau kui, nurei kah daha' hulung anih hulung kui, lim-lim ket aleng im nyineng tinih anih, ketanuk lim anih. Bi kerei inih, nun nah aleng tekep ek na men dalo' anak kui dahin dalo' nyam aleng sau kui anih? 44Nunih nah tua, sayu nah itam nageng jaji té' hang tu', ja jaji atih jadi' ji tada' té' hang tu'.”
45Iha' nah Yakub ala ji bato', en na' kelungun nah jadi' tada'. 46Iha' nah Yakub kuma' men dalo' panak-panak na', “En kelo' peng nah bato'.” Iha' nah daha' pelalau mepeng bato' dahin petudun-petudun na', men'uh anan, kuman nah daha' té' béh peng bato' anan dih. 47En Laban na nah aran peng bato' atih Yegar-Sahaduta, bi Yakub na aran na' Galed. 48Iha' nah Laban kuma', “Men dau anih nah peng bato' anih jadi' ji teksi' tu'.” Iha' nah iha' na aran peng bato' anan Galed, 49té' pah ji aran na' kenan na' lahuh, Mizpa, avin iha' kuma', “Sayu nah Tuhan nyineng ika' dahin nyineng akui lahuh, jarun-jarun telo' petat. 50Tata' ika' peluvat dalo' anak kui, awi ika' tei ala doh aleng ha' béh ngelua' kah, hituk nah, pulu hangun pah em té' kelunan dahim bi Allah aleng jadi' teksi' kui dahim.”
51Ji pah la'an dahun Laban men Yakub, “Anih nah peng bato' dahin tada' aleng uh ek ju té' hang tu'. 52Peng bato' anih dahin tada' anih jadi' ji teksi' men itu', akui, nusi' kui seng lalau peng bato' anih ala ika', nurei pah ika', nusi' ka' seng lalau peng bato' anih dahin tada' anih nei ala akui dahin kenep aleng ji'ek. 53Allah Abraham dahin Allah Nahor, Allah aleng Allah taman dawa' pah, sayu nah Iha' aleng petneng nyineng té' hang tu'.” Pelalau Yakub tevah dahin Allah aleng en Ishak taman na' atih ju. 54Uh anan en Yakub tevek nah hulung ma'uk bun usu na' men Tuhan té' ujung ngalang atih, en na' uvui nah daha' panak na' pahlung, daha' pah té' tinan dahin melo' ujung ngalang anan pah malem anan. 55Jihima dau uh malah, Laban pah marek dalo' anak na' dahin dalo' sau na' atih lahuh, dahin akei asi men dalo', men'uh anan iha' nah Laban leka' tei uli ha' daléh avan na'.
Trenutno odabrano:
ARING KELESING 31: TDK1990
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible in Today's Dahun Kayan Version © Bible Society of Malaysia, 1990.