ARING KELESING 29
29
Yakub ateng ha' uma Laban
1Men'uh anan leka' nah Yakub men inan tei ha' tana daha' aleng men béh matan dau pa'un. 2Tegu iha' nyineng teliling na', iha' ha' jam ji lesung té' té' tana anan, té' telo' peng kading dahin duba miri béh na', avin men lesung anan daha' ma'uk ata' en daha' kading dahin duba ana du'i Bato' ben lesung anan dekaya'. 3Tegu daha' geri lim kading dahin duba tinan, kelunan aleng pian hulung nan uvin nah bato' aleng té' hungun lesung anan, iha' nah daha' ma'uk daha' du'i, uh daha' du'i, en daha' tei pah bato' atih la'an té' hungun lesung anan.
4Iha' Yakub mateng daha', “U arin, men ino' kelo' ni du?” Ken daha' nyu'ei, “Kalo' anih nei men Haran.”
5Ken na' pah men dalo' la'an, “Nelana' kah kelo' Laban, sau Nahor dih iah?” Ken daha' nyu'ei, “Jam kah kamé' nelana' iha'.”
6Ken na' men dalo' la'an, “Nuno', magéh kah iha' ji'ek iah?” Ken dalo' nyu'ei, “Magéh! Tih kah Rahel anak doh na' nei geri kading dahin duba ti pa.”
7Pelalau Yakub kuma', “Bau loh kah dau ni, nusi' payan jaka' mepeng hulung nih. En kelo' uk nah ata' du'i men kading dahin duba kelo' nan arin, uh anan tei nah kelo' makan-makan daha' la'an.”
8Bi dalo' nyu'ei, “Nusi' kalo' deng na nunan em payan lim kading dahin duba atih uh tei pepeng. Tegu daha' uh pepeng uréh kamé' muéh bato' ben lesung anan, iha' nah kamé' ma'uk ata' du'i men kading dahin duba amé'.”
9Alem ha' tengaran dahin dalo' nunan, nei nah Rahel geri kading dahin duba na', avin iha' aleng puboh hulung. 10Tegu Yakub nyineng Rahel anak Laban harin hinan na' anan dih, dahin kading dahin duba Laban tih, tei nah Yakub jeleng iha', pelalau muvin bato' aleng té' hungun lesung atih, ma'uk ata' du'i men kading dahin duba atih. 11Men'uh anan en na' marek nah Rahel, pelalau nah iha' ji'ek nei nangih aya'-aya'. 12Pelalau Yakub bara men Rahel iha', anak Ribka harin taman na'. Tepurung nah Rahel tei bara men taman na'. 13Tegu Laban kelenghi dengah marung Yakub anak harin na' té' nei, tei nah iha' tepurung ala iha', pelalau ngelameng iha' dahin marek iha', pelalau geri iha' huma na'. Iha' nah Yakub na'lung-na'lung tuk-tuk na' men Laban. 14Kuma' nah Laban men iha', “Ika' ji'ek nih ji sin ji daha lelan ka' dahik.” Melo' nah Yakub dahin na' ji bulan halum.
Yakub nyadui men Laban, ala Rahel dawa' Lea
15Men'uh anan kuma' nah Laban men Yakub, “Lan pah ika' nih harik lelan, bi nusi' tekep ka' masi akui tua-tua. Sayu im bara men akui nun aleng tekep seng tibah ka'.” 16Laban pah té' dua' anak doh na', aleng dekaya' Lea, aleng da'uk Rahel. 17Lea atih nusi' ha' sayu matan na', bi Rahel tih sayu lan layan na, kajau pah jam neng na' lahuh.
18Yakub nan nyalam lelan ha' té' Rahel, avin anan iha' ha' kuma', “Bei nah akui em nyadui men ika' tusu duman dara na', ja kui ala Rahel anak ka' aleng da'uk atih.”
19Ken Laban nyu'ei, “Lan, pulang sayu kui ma'uk iha' men ika' men'uh akui ma'uk iha' men daha' ha' béh. Sayu nah im melo' dahik sikah.” 20Nyadui nah Yakub alem tusu duman dara na' ja iha' ala Rahel atih, henoh na' nyadui alem tusu duman anan, awi jaki dih tua henoh na' té' iha', avin kenep na' lalé' nyalam té' Rahel tih.
21Men'uh anan kuma' nah Yakub men Laban, “Im petneng nah kawa' doh kui, avin uh halum nah dau kui nih, ja akui pehawa' dahin na'.” 22Iha' nah Laban muvui lim-lim kelunan daléh anan dahin na ji pahlung men daha'. 23Beka' malem anan en na' ala nah Lea anak una' na' anan, pelalau geri iha' men Yakub, Yakub pah tei tudu dahin na'. 24En Laban uk pah Zilpa doh nyam-amin na' men Lea anak na' anan ja ha' nyam-amin Lea. 25Bi jihima en Yakub ineng ké' beka' Lea sikah. Pelalau ha' kuma' men Laban, “Na' nun hadui ka' nunih na-na akui ni du? Té' pah akui kaséh nyadui men ika' anih dih, avin té' Rahel nih kah kurim di. Na' nun ka' peluvat akui nunih?”
26Nyu'ei nah Laban iha', “Nusi' kamé' hinih malei na nunan petneng hawa' daha' aleng da'uk una' té' harin daha' aleng dekaya'. 27Im pehalum nah tusu dau una' pehawa' dahin anak kui anih arin, uh anan anak kui aleng anan pah ek uk men ika', itung tibah ka' nyadui, bi sukun ka' nei nyadui la'an tusu duman ngelua'.”
28Yakub pah ngioh dahun na' anan, iha' nah iha' pehalum tusu dau anan pehawa' dahin Lea', men'uh anan iha' nah Laban ma'uk Rahel anak na' atih tei hawan na'. 29En Laban uk nah Bilha nyam-amin na' men Rahel anak na' atih, jadi' nyam alem amin na' men Rahel anak na' atih. 30Yakub pah ngehawa' Rahel lahuh, bi iha' kelalé' nyalam té' Rahel men'uh Lea. Nunan nah tuk iha' nyadui tusu duman la'an men Laban.
Anak-anak Yakub
31Tegu Tuhan nyineng Yakub em té' halam na' té' Lea ji'ek, en Tuhan na nah iha' nei nganak, bi Rahel atih nyalun ha'. 32Lea pah nei mali, iha' ha' nganak ji anak aké', iha' na aran na' Ruben, avin ken na', “Lan Tuhan uh pelemana' katé' kui ji'ek. Kerei inih adang laké' kui seng nyalam té' akui.” 33Nei mali pah iha' la'an, nganak nah iha' ji anak aké', iha' ha' kuma', “Adang Tuhan uh kelenghi marung tuk akui ji'ek. Hawak ni em té' halam na' té' akui, iha' nah Tuhan ma'uk akui ji anak anih nekulah nih.” Iha' ha' na aran anak atih Simeon. 34Mali pah iha' nekulah, nei nah iha' nganak ji anak aké', iha' pah iha' kuma', “Ji hangun anih adang laké' kui seng tangen kenep na' té' akui, avin akui uh nganak telo' anak aké' men iha' nunih.” Atih nah tavit iha' na aran anak atih Lewi. 35Nei loh kah iha' mali la'an, iha' ha' nganak ji anak aké', ken na' pah, “Ji hangun anih akui ngenep meju aran Tuhan.” Atih nah tavit na' iha' na aran anak atih Yahuda. Men'uh anan nusi' nah iha' nganak la'an.
Trenutno odabrano:
ARING KELESING 29: TDK1990
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible in Today's Dahun Kayan Version © Bible Society of Malaysia, 1990.