ARING KELESING 28
28
1Men'uh anan en Ishak uvui nah Yakub, pelalau akei asi té' Tuhan men iha' dahin nebara iha', ken na' men Yakub, “Meng im peletu ala doh daha' Kanaan hawam. 2Petmei nah im, tei nah im leka' tei ha' Padan-Aram, ha' uma Betuel taman hinam nan, hitih nah im ala ji doh men ika' hawam, anak Laban harin hinam nan. 3Sayu nah Allah Aleng Hipun Tingan atih muak asi Na' men ika', na anak-anak ka' nei katan dahin na ika' nei kahum, ateng ika' jadi' ngahum pahu ka'. 4#Ar Kel 17:4-8 Iha' pah muak asi aleng Na' uk Abraham atih men ika' dahin men pahu-pahu ka', tuken-tuken ika' nyengayan daléh anih aleng avam awi murip daméh dih tua, aleng uh en Allah uk men Abraham.” 5Nunan nah tuk Ishak nyihu Yakub tei leka'. Yakub pah pelalau tei leka ha' Padan-Aram, tei ha' Laban anak Betuel kelunan Aram atih, aleng harin Ribka hinan Yakub dawa' Esau.
Esau ngehawa' ji doh la'an
6Kitan Esau nah Ishak taman na' uh akei asi men Yakub dahin nyihu iha' tei ha' Padan-Aram ala doh hitih hawan na', tegu iha' akei asi men Yakub atih, iha' pah nebara Yakub, “Meng im ala doh daha' Kanaan hawam.” 7Yakub pah ngioh lim tebara taman dawa' hinan na', iha' pah tei leka' ha' Padan-Aram. 8Tegu Esau jam kenep Ishak taman na' em ngenep daha' doh Kanaan atih, 9lun leka' pah Esau lahuh, tei pala Ismael anak Abraham, iha' pah pehawa' dahin Mahalat aleng harin doh Nebayot dawa' aleng anak Ismael arei dih. Ketlo' hawan Esau nah Mahalat atih, peging dua' aleng uh té' dahin na' pa'en.
Nyupin Yakub ha' Betél
10Lun leka' nah Yakub men Bersyeba tei ha' Haran. 11Ateng nah iha' té' ji ngavan, tinan nah iha' san malem anan, avin dau uh levi. En na' ala nah ji bato' tinan, en na' helen, iha' nah iha' tei miri tudu. 12#Yoh 1:51 Malem anan iha' pah ngenyupé'. Iha' jam ji san nesut men usun tana tei ateng ha' langit, iha' pah nyineng meliket Allah ma'un ngiléh liwet-liwet té' san atih. 13#Ar Kel 13:14-15 Nekring nah Tuhan té' ujung na', dahin kuma' men iha', “Akui nah Allah Abraham sepum, dahin Allah Ishak. Té' tana aleng avam miri anih, Akui seng ma'uk na' men ika' dahin men pahu-pahu ka'. 14#Ar Kel 12:3; 22:18 Pahu ka' pah seng awi pup tana dih kahum daha', ika' pah seng katan ha' pedah matan dau pa'un, nurei pah ha' matan dau uli, nurei kah pedah ulei dahin pedah ta'o matan dau uli. Men alem ka' dahin men alem pahu ka' lim na'an bengsa' té' ji usun tana anih seng ala asi. 15Lan, Akui nah aleng puboh ika' dahin nyingau ika', hino'-hino' ika' tei. Akui pah seng geri ika' uli la'an ha' daléh anih, avin nusi' kui seng melek ika', bi Akui seng pela'ung lan ket aleng uh Ek pejaji dahim anih.”
16Tegu Yakub ma'un tudu, kuma' nah iha', “Adang lan Tuhan té' tinih, akui aleng em jam nih.” 17Iha' pah takut dahin kuma', “Melak lelan kui té' ngavan anih! Anih nah uma Allah, tinih nah aleng ketamen aya' Surga.”
18Jihima pesun-pesun en Yakub ala nah bato' aleng en na' helen atih dih, en na' kelungun nah na tada' aleng pehituk, dahin mesoh kenyu té' ujung bato' atih. 19En na' na nah aran titih, Betel. Aran titih menuna', Lus.
20Yakub pah pelalau na jaji, “Tana' Allah seng puboh akui dahin nyingau akui té' alan aleng ngavak seng tei anih dahin ma'uk kanen ek kani dahin kanan aleng ek té', 21ateng kui uli la'an ha' uma tamak dahin em té' nun-nun tusah, adang Tuhan nah aleng jadi' Allah kui. 22Bato' aleng uh ek kelungun anih, seng jadi' Uma Allah. Men lim nun-nun ket aleng Im uk men akui, u Tuhan, akui pah seng ma'uk ji tulan ket aleng kelak, men ha'ut-ha'ut pulu na'.”
Trenutno odabrano:
ARING KELESING 28: TDK1990
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible in Today's Dahun Kayan Version © Bible Society of Malaysia, 1990.