Matyiu 22
22
1Ka Jisus a yavwana ka Mâ‐a kala pě na bâ na mekanakâdi, na, 2Ipangiya ja Hěvěn i te ona upolo mua momo u hakidi diba ja mwan‘ ’aju. 3Ka mâ‐a loma bahayi baju ka ndiya ba langwakudwě na ba vak‘ o diba: ndi baa vahe o viya. 4Ka mâ‐a loma pě bahayi bapâkwě, na, Langwakiyani ba langwakudwě, na, Mbi kenjiděndi huma ’amě; nyati jamě na tito j‘ ivângâ i weyudwěndi, belombo beěhěpi be kokindi: Vakani o diba. 5Ndi ba pějěkindi, ka bâ‐ba ’la pělě n‘ ijabu, ’mbâkâ o mwanga muaju, upâkwě o ihamba jaju: 6ndi bapâkwě ba bweya bahayi baju, ba ka jongolakidě bâ, ka bâ‐ba weya bâ. 7Nd‘ upolo a yokaki yâ, ka mâ‐a linguwa: ka mâ‐a loma ndumb‘ ’aju, ka jilidě baweyani těbaně, na tumba mbok‘ ’abu. 8Jâ nd‘ ijaju ja vâ na bahayi baju, na, Diba i kokindi, ndi ba ndakudwě bu diyaka weyango. 9Ndi kěkěni o njey‘ iněně, ibanyu ba ka duwě ndakiyani o diba. 10Ka bato těbaně ba vala o njey‘ iněně, ka bâ‐ba yolě ibabu ba duwakidi běhěpi ta, na babe na bayamu: ka diba ja koka na bangi. 11Upolo a viyi ka yěně bangi, ka mâ‐a yěně omě moto a ha bâtâkudwě ibâtâ ja diba: 12ka mâ‐a vâ na mâ, na, Mbweyi ’amě, o ma viya lě okava o diye n‘ ibâtâ ja diba, na e? 13Au diyaka na ndaga. Jâ ndi j‘ upolo ja vâ na bato, na, Kataki mâni benâ na beko, wa ’lani mâni, wa ’hwi mâni o ivititi via yaviděngo; omě o ka diyandi mbembe n‘ ikalidě ja mahonga. 14Ikabojana baitě ndi ba ndakudwě, ndi nyěvâ te pânâkwě.
15Jâ ndi ja Farisi ja vala ka lata ’hoka ya nyang‘ ’abu e ka jukě Mâ o ndaga jaju. 16Ka bâ‐ba loma beyokwedi beabu o Mâ‐a jadi na Hěrodian, na, Uyokwidi, ho yowuděte na O ndi pâkwěpâkwě, na nâvě o yokwakidě njeya ya Anyambě pâkwěpâkwě, o ’bě tepě n‘ isâlâ na moto: ’kabojana wa yěněkě meoho mea bato pivi. 17Langwakiya hwě nandi ka âvě‐o pikilakiyě, E ndi hohonganěngo na ho věkě Sisar pago, ipě ho věke? 18Ka Jisus a yowě bobe boabu, ka Mâ‐a vâ, na, O yějěkiyě li Mbi nande, inyěni menoki? 19Levakidi ’Mbani hika ya pago, ka bâ‐ba vana Mâ fura. 20Ka Mâ‐a vâ na bâ, na, U lě uvela na dina ja nja ’kadi? 21Ka bâ‐ba vâ na Mâ, na, Ja Sisar. Jâ ndi jaju ja vâ na bâ, na, Věkěni Sisar belombo be jadi beaju: věkě tepěni Anyambě be jadi ibeaju. 22Ba mamakindi o bâ‐ba yoki ndaga těkadi, ka bâ‐ba dika Mâ, ka bâ‐ba ’la pělě n‘ ijabu.
23Sajusi ba pâkindi o Mâ‐a jadi buhwa tě, i vâkě na o ’bě n‘ ipumbuwa, 24ka bâ‐ba uwa Mâ, na, Uyokwidi, Mosěs a vâki, na, Oningě moto a wa aa diye na bana, mwana nyangwě a bake mwad‘ ’aju, na mâ‐a ka těkidě mwana nyangwě ibângâ. 25Ba diyaki na hwě nyangwě pâkâ hěmbwědi: ua bohoboho, o mâ‐a běkidi mwajo bango, ka mâ‐a wa au diyaka na ibângâ, ka mâ‐a dika mwad‘ ’aju na mwana nyangwě. 26Yâ nyanga tě tepě ya ua babale, yâ tepě ya ua balalo, kwanga na ua hěmbwědi. 27Na mbuhěmbuhě ka mwajo a wa tepě. 28Ndi o ’pumbuwa, a ka diya lě mwada ’a nja o hěmbwědi těkaně? ’kabojana bâ běhěpi ba bakite mâ. 29Ka Jisus a timbwana ka Mâ‐a vâ na bâ, na, O lemakěndini, wa ’wěni Malěndwě, tombe na ngudi ya Anyambě. 30Ikabojana o ipumbuwa baa baye, na bâ‐ba věwě pě o maba, ndi ba ka diyate ona enjěl ja Anyambě i jadi o Hěvěn. 31O pělě ya ipumbuwa ja ba wewe, o ha langeteni ka Anyambě a kalaki n‘ inyěni, 32na, Umba ndi Anyambě ya Ebraham, na Anyambě ya Aisak, na Anyambě ya Jekâb? Anyambě e ’bě Anyambě ya ba wewe, ndi ya ba di mihâ. 33O bebimba be yokidi ekae, ba mamakindi iyokwanidi viaju.
34Nd‘ o Farisi ba yokidi na A kubidi Sajusi, ka bâ‐ba lataniya ta. 35Jâ ndi j‘ umbâkâ a diyakidi uyowi mua belekanako, a kâtâ. Mâ, boyějěkiyě, na, 36Uyokwidi, elekanako eněně o belekanako e lě nde? 37Ka Jisus a vâ na mâ, na, Tândâkâ Upangiyi Anyambě ’âvě n‘ ulema muâvě muěhěpi, n‘ ilina jâvě jěhěpi, n‘ ipikiliya jâvě jěhěpi. 38Elekanako ya bohoboho na ’něně nd‘ ekae. 39Ya bebale e tepě ona ekae, Tândâkâ bato bapâkwě ka ’vě mětě. 40Belekanako beěhěpi na basâki ba yâdâkândi na bebale ekabe.
41O Farisi ba diyaki ba lataniya, Jisus a uwaki bâ, 42na, O pikilakiya li na e, o pělě ya Kraist? A lě mwan‘ ’a nja? Ka bâ‐ba vâ na Mâ, na, Ua Devid. 43Ka Mâ‐a vâ na bâ, na, E lě nde ya Devid e tubakě Mâ n‘ Ilina, na, Upangiyi, na,
44Jěhova a vâki na Upangiyi muamě, na, Diyaka o ’nâ ’amě ’yomi, kabo Mba ta panga baloni bâvě ebong‘ ’âvě e pitakiyě?
45Oningě Devid a tubaka Mâ na Upangiyi, nd‘ A lě mwan‘ ’aju na e? 46U diyaka na moto a yâlâkidě o timbwana Mâ ndaga; na moto ka moto au jijakiya pě o uwa Mâ nyuwe ’pâkwě oviya buhwa těboně.
Trenutno odabrano:
Matyiu 22: BNG1895
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Published by the American Bible Society in 1895.
