Matyiu 21
21
1Ka bâ‐ba pâ o Běthpaje o ukodi mua Âlivěs, o bâ‐ba bakami na Jěrusalěm, jâ ndi ja Jisus ja loma beyokwedi bebale; 2mâ na bâ, na, Kěkěni o ibâkâ i jadi o boho boanyu, o ka hunganandini o duwa buru tingwěngo na mwana na yâ; unjuwaki jâni, n‘ inyěni wa vanani o Umba‐mbi jadi. 3Oningě moto a vâ n‘ inyěni elombo, o ka vâkâni, na, Upangiyi a na mala na jâ; vâkâna a hunganindi o huludě jâ. 4Ekae yěhěpi e hamakindi, na ovaně nd‘ o ya usaki e kalakidi e ka timwě, na,
5Langwakiyani mwa mwajo ua Zaion, na, Umbwakiya, Upolo muâvě u vakand‘ o âvě o jadi hwěi, diyango o buru na o etumbě ya mwana ua buru.
6Ka beyokwedi bea vala, na bâ na haka ka Jisus a langwaki bâ. 7Kâ bâ‐ba vana buru na mwana, ka bâ‐ba nangidě jâ menamba meabu, ka bâ‐ba diyidě Mâ omě. 8Ka ebimba eněně ya wanja menamba meabu o njeya: bâkâ ba lenaka paha ja bele, na bâ‐ba ka takidě jâ o njeya. 9Ka bebimba be kěkidi o bohoboho, na be vitakidě bya yama, na, Hosana na Mwana Devid! Ibâtâ na a vakě na dina ja Upangiyi; Hosana oba mětě! 10Ka mboka yěhěpi ya ’muwa, o Mâ‐a pâkidi o Jěrusalěm, na, Ekaně a lě nja? 11Ka bebimba bea vâ, na, Ekaně ndi Jisus, usâki mua Nazarěth ya Galili.
12Ka Jisus a vala o těmpěl ya Anyambě, ka Mâ‐a pumě ba hambakidě na ba ma hambaka omě běhěpi, na Mâ‐a ka hovaka tagulu ja bapepengani ba dâlě, na bediya bea ba hambakidě mbenga; 13ka Mâ‐a vâ na bâ, na, E lěndwěngo na, Ndabo ’amě e ka tubwi na ndabo y‘ ikaliya; nd‘ o ndi yâni pangango eboboka ya meyibi. 14Pâgu na bebokě be vakindi o Mâ‐a jadi o těmpěl, ka Mâ‐a yongě bâ. 15Ka prist ja meolo na Balěndi ba bina nangudi, o bâ‐ba yěněkidi belombo beaju be hakidi be mamanakwě, na bana ba yamanakidě o těmpěl, na, Hosana na Mwana Devid, 16ka bâ‐ba vâ na Ju, na, O yokakate ka ’kaba ba vâkě? Na Jisus na vâkâ na bâ, na, E; o ’běni langango, Oviya ndaga i vakiyě o medumbu mea mekěkě na ba nyangakě, o hânjâbiděngo ibendwě? 17Na Mâ na dikaka bâ, ka Mâ‐a věngěmě o mboka na vala o Běthani; na Mâ na yěngěkidě omě.
18Nd‘ o Mâ‐a timbakidi o mboka n‘ ubwa, A yokaki nja. 19Ka Mâ‐a viya o ele ya itâla, o Mâ‐a yěněki yâ o njeya, ndi Au duwaka elombo ’mě, kabo bekai dipâ, na Mâ na vâkâ na yâ, na, Wa jaye pě bebuma oviya egombe těkae na vala egombe yěhěpi. Ka ele tě ya itâla ya hungana o vivilaniya. 20O beyokwedi be yěněkidi, ka bâ‐ba mama, na, Ele ya itâla e vivilaniyete piělě! 21Jisus a yavwanakindi, ka Mâ‐a vâ na bâ, na, Mbi vâki n‘ inyěni pâkwěpâkwě, Oningě o diyingěni n‘ ikamidě, n‘ inyěni o bomeni penda, wa hayeni kabo e ma hama na ele ya itâla ekae, nd‘ o ka vâteni n‘ ukodi těkamu, na, Věngěměkě, wa ’la ka kwa o manga, e ka hamate. 22Tepě o ka pahiyateni belombo beěhěpi ibeanyu be k‘ uwě n‘ ikaliya, o kamakiděni.
23O Mâ‐a ngakiyedi o těmpěl, ka prist ja meolo na batodu ba bato ba viya o Mâ‐a jadi, o Mâ‐a diyakidi a yokwanakidě, na, I lě nja ngud’ě eâvě e hanakě belombo těkabe? tepě nj‘ a věkid‘ âvě ipangiya těkadi? 24Ka Jisus a yavwana, ka Mâ‐a vâ na bâ, na, Mbi k‘ uwa tepě ’nyěni ndaga pâkâ, e jadi oningě wa languwi ’Mbani vâkâna Mbi languwe tepě ’nyěni ngud’ amě e hanakě belombo těkabe. 25Baptisma ya Jân, e vaki ye lě onja pělě? oviya Hěvěn, ipě o bato ba jadi? Ka bâ‐ba hokolaniya bâ mětě na bâ mětě, na, Oningě hwa vâ, na, Oviya Hěvěn, A ka vwi na hwě, na, E lě nd‘ eanyu e ’nyakidě o kamidě mâ? 26Nd‘ oningě hoa vâ, na, Oviya bato; ho bangakandi ebimba; ’kabojana běhěpi ba yěněkindi Jân na a ndi usâki. 27Ba yavwanakindi ka bâ‐ba vâ na Jisus, na, Hoa yâlě o languwa. Ka Jisus a vâ na bâ, na, N‘ Umba‐mba languwe tepě inyěni ngud’ amě e hanakě belombo těkabe. 28Nd‘ o piviyaka li na e? Moto n‘ uhuhu a diyakindi bana babale; ka mâ‐a viya o ua bohoboho a jadi, na, Mwana, o kěkě ka ha o mwanga muamě o buhwa. 29A yavwanakindi, ka mâ‐a vâ na mâ, na, Mba vale: ndi kwěi, o mâ‐a viyi ka ’luwa ulema, a kěkindi. 30Ka mâ‐a viya ka vâ na ua babale tepě nyanga tě. Ka mâ‐a yavwana, na, Mb‘ ’alandi, Paia. 31Nd‘ a vale. A lě nja o babale baně a di hango upango mua hangwě? Ba vâki na Ju, na, Ua bohoboho. Jisus a vâki na bâ, na, Mbi vâki n‘ inyěni pâkwěpâkwě, Bayoli pago na bevove ba taki na vala o ipangiya j‘ Anyambě n‘ inyěni. 32Ikabojana Jân a vakindi‘ o inyěni o jadi na njeya ya bwamu, ndi wu kamakidi mâni: kabo bayoli pago na bevove ndi ba kamakidě mâ; ndi ’nyěni w‘ ulwaka pě ni, o ’nyěni o běkidi yěněngo, na ovaně nd‘ inyěni o ka kamidě mâ.
33Yokakani unkanakâdi upâkwě: O diyakindi na hangwě ndabo pâkâ, e liyaki mwanga, ka mâ‐a ha muâ ugomba ulwaniděngo, ka mâ‐a puduwa ibabo j‘ ivě omě, ka mâ‐a longo elongo, ka mâ‐a dikiya muâ baliyi, ka mâ‐a vala o ’hiki ya yaviděngo. 34Ka mâ‐a loma bahayi baju o baliyi ba jadi, o ’gombe ya bebuma e pâki piělě, ka nângâ bebuma bea omě. 35Ka baliyi ba bweya bahayi baju, ba boma umbâkâ, na bâ‐ba weya umbâkâ, ka bâ‐ba bweya upâkwě malale. 36Ka mâ‐a loma pě bahayi bapâkwě wa na ba bohoboho: na bâ na haka tepě bâ nyanga tě. 37Ndi o madikanido a lomakindi mwan‘ ’aju o bâ‐ba jadi, na, Ba ka dili mwan‘ ’amě. 38Ndi baliyi ba vâkindi bâ mětě na bâ mětě, o bâ‐ba yěněki mwana, na, Ujigi nd‘ ekamu: vakani, ho weyaki mâni, na hwě‐hwa patuwa ekuh‘ ’aju. 39Ka bâ‐ba bweya mâ, na uhwa mâ o mwanga, na weyaka mâ. 40Upangiyi mua mwanga a ka ha lě baliyi těbaně na, o mâ‐a ka viyě? 41Ba vâki na Ju, na, A ka jiliděndi bato tě ba be baně bojilakidě, na mâ‐a dikiya mwanga o baliyi bapâkwě ba ka věyě mâ bebuma o hongodi jabu. 42Jisus a vâki na bâ, na, O ha langeteni o Malěndwě,
Ilale ja balongi i kiyakidi jâ ndi diyakidi ja bě molo mu‘ itududu: ekavi vi ndi ’hadi via Upangiyi, na viâ vi ndi vi mamanakwě o mihâ mahu;
43Ovaně nd‘ Umba‐mbi vâkě n‘ inyěni, na, Ipangiya j‘ Anyambě i ka nângânwěndi inyěni na jâ ja věwě etomba e ka běkidě bebuma bea omě. 44Ndi a ka kwě o ilale těkadi a ka bukiyandi; ndi u‘ ilale těkadi i ka kwě i ka nyingi mâ. 45O prist ja meolo na Farisi ba yokakidi mekanakâdi meaju, ka bâ‐ba yěně na A kalakindi o pěl‘ ’abu. 46Ba bangakindi bebimba, o bâ‐ba butakidi o bweya Mâ, ’kabojana ba yěněki Mâ na A ndi usâki.
Trenutno odabrano:
Matyiu 21: BNG1895
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Published by the American Bible Society in 1895.
