Matyiu 23
23
1Jâ ndi ja Jisus ja kala na bebimba, na beyokwedi beaju, 2Na, Balěndi na Farisi ba diyakandi o diya ya Mosěs: 3Elombo yěhěpi eabu e ka languwě ’nyěni na, tatakani, tatakani na o ka haki yâni; nd‘ o vilinganakěni behadi beabu: ’kabojana ba vâkândi ndi baa haye. 4Ikabojana ba kataki maumba madilo makolo n‘ ibapwě, ba ka nangakidě mâ o maběkě ma bato; ndi bâ mětě baa vahe o ninganě mâ tombe n‘ upenjo muabu ’mbâkâ. 5Ndi ba haki behavu beabu beěhěpi nâ ovaně ndi o bâ‐ba ka yěněně na bato, ba haki failaktiri jabu upuju, na bâ‐ba ka kenakě sai ja ngâi jabu, 6ba tândâkândi loboko la betiyango o masango, na bediya beněně o sinegâg, 7na mahomu o mahambanido, na ka tubwě na bato, na, Rabbai, Rabbai. 8Ndi o tubakwěni, na, Rabbai: ’kabojana Utumbwani muanyu u te umbâkâ kabo Kraist: ’nyěni běhěpi o ndini nyangwě pâkâ. 9O tubakeni moto o he na Hangwě ’anyu; ’kabojana Hangwě ’anyu e te pâkâ, Mâ‐a jad‘ o Hěvěn. 10N‘ inyěni o tubakwě tepěni, na, Batumbwani; ’kabojana Utumbwani muanyu u t‘ umbâkâ, kabo Kraist. 11Ndi a did‘ uněně wa o njamb‘ ’anyu, mâ nd‘ a ka diyě uhayi muanyu. 12Uěhěpi a ka betidě nyolo ’aju mětě a ka hubudwěndi; uěhěpi a ka hubidě nyolo ’aju mětě a ka betudwěndi.
13Ndi maguga n‘ inyěni Balěndi na Farisi, inyěni menoki, ’kabojana o dibakiyandini bato ipangiya ja Hěvěn: inyěni mětě wa kěkěni omě, n‘ inyěni wa bâbâkâni ba mbakě o vala na ba kěkě omě. 14Maguga n‘ inyěni, Balěndi na Farisi, inyěni menoki! ’kabojana o pukulakandini ndabo ja mealika, na o hakani makaliya mayaba o iyaba ja bato: na tina těkaně o ka duwandini ivomudwě iněně wa.
15Maguga n‘ inyěni, Balěndi na Farisi, inyěni menoki! ’kabojana o ’luanakiděndini manga na ehiki ipanga j‘ umbâkâ a uluaka; o mâ‐a ’luwedi, wa pangi mâni nj‘ ibale mwan‘ ’a Hěl wa n‘ inyěni mětě.
16Maguga n‘ inyěni batumbwani ba pâgu, ba vâkě, na, A ka kaniyě těmpěl, i te naně; ndi a ka kaniyě gold ya těmpěl a kwango! 17Inyěni beboki na pâgu! eve lě eněně wa, gold, ipě těmpěl e nyěvěkidě gold? 18Na, A ka kaniyě âltar, i te naně; nd‘ a ka kaniyě ivěwě i jad‘ omě, a kwango. 19Inyěni beboki na pâgu! eve lě eněně wa, ivěwě, ipě âltar e nyěvěkidě ivěwě? 20Uěhěpi a ka kaniyě âltar, a kanakiyi yâ na belombo be jad‘ omě beěhěpi. 21Na a ka kaniyě těmpěl, a kanakiyi yâ, na A diyakě omě. 22Na a ka kaniyě Hěvěn, a kanakiyandi eka y‘ Anyambě, na A diyakě omě.
23Maguga n‘ inyěni, Balěndi na Farisi, inyěni menoki! ’kabojana o věkěndini ya jomu ja mint na anis na kummin, nd‘ o dikakani belombo beněně bea belekanako, ihohonganě, ngěbě, n‘ ikamidě; ekabe ndi beanyu be lukakidi o ha, ndi o dika tepě ni bepâkwě be hawě. 24Inyěni batumbwani ba pâgu, ba lěngěkě ipihi, ndi o miyakani kaměl.
25Maguga n‘ inyěni Balěndi na Farisi, inyěni menoki! o tanakěndini sěngě na ’pělě o bwebwe, ndi utema u jadi ti na mbabo na bobe. 26Âvě pâgu ngâvě ya Farisi! ta taně e jadi utema mua sěngě na ’pělě, ovaně vâkâna bwebwe ’abu e tani tepě.
27Maguga n‘ inyěni Balěndi na Farisi, inyěni menoki! ’kabojana o kwanakandini ka ndabo ja malonga itano i yěněněkě bwam‘ o bwebwe, nd‘ utema u jadi ti na bevehe bea bawewe na sěkě yěhěpi. 28Nonaně tepě ’nyěni o yěněněkěni hohonganěngo o bato ba jadi, o bwebwe, ndi o jadi ni utema ti na melango na bobe.
29Maguga n‘ inyěni Balěndi na Farisi, inyěni menoki! ’kabojana o longakandini malonga ma basâki, n’ inyěni o lukakěni ndabo ja njama ja bato bayamu, 30n‘ inyěni mâ, na, Ho jaka o hwi ja bahangwě bahu, te hu hâbâkâ na bâ o iweya ja basâki. 31Inyěni mětě o langwakiyandini na o ndini bana ba ma weyaka basâki. 32Londakěni yějâ ya bahangwě banyu. 33Inyěni mbamba, inyěni igona ja pe, o ka věngěmě lě ni yěkě ya Hěl na e? 34Yěněkěteni k‘ Umba‐mbi lomakě ’nyěni basâki na bato b‘ iyowě na Balěndi; o ka weyandini na o ka kâmâkidi bâkâ o krâs; bâkâ, o ka bomandi hâ ni o sinegâg janyu, na o ngongolakidi bâ ni oviya mboka nala mboka: 35makiya ma bato bayamu ma tâkudwě o he měhěpi ma ka kahamandi o ’nyěni o jadi, oviya ma moto uyamu Eběl nala ma Sakaraias mwan‘ ’a Barakaias uanyu a weyakidi o hanganě ya těmpěl na âltar. 36Pâkwěpâkwě Mbi vâki n‘ inyěni, na, Belombo těkabe beěhěpi be ka kahamandi o igona těkadi.
37Jěrusalěm! Jěrusalěm! âvě o weyakě basâki, na nâvě o bweyaka ba lomakwě o âvě‐o jadi malale, njo iitě ndi jamě i vahakidi o yolě bana bâvě ta, panika mwadi mua kuba u yolakě bana baju o mapěpu, ndi wu vahakani! 38Yěněkěte, ka ndabo ’anyu ya dikana o inyěni o jadi evâvâ. 39Ikabojana Mbi vâki n‘ inyěni, na, Oviya ’gombe těkae, wa yěne pi ’Mbani, kabo ’nyěni o ka vâyěni, na, Ibâtâ na A vakě na dina ja Upangiyi.
Trenutno odabrano:
Matyiu 23: BNG1895
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Published by the American Bible Society in 1895.
