HECHOS 2
2
Jucha Illaj Diospaj Espíritu shamushcamanda
1Pentecostés punlla chayamujpimi, tucuicuna shujllashnalla tandanajushca carca. 2Shina cajpimi, jahua pachamandaca, ninan shinlli huaira huacajshna, paicuna maipi tiyanajuj huasiman ñapash uyarimurca. 3Shinallata, nina rupajujshna paicunaman ricurishpami, tucuicunapaj uma jahuapi asha asha tiyarirca. 4Chaimandami paicunaca, Jucha illaj Diospaj Espíritu junda tucurca. Shina cashpami, Diospaj Espíritu rimachijpi, shuj shuj rimaicunata rimai callarinajurca. 5Chai punllacunapimi, Diosta yarishpa causanajuj judiocunaca, tucui llactacunamanda Jerusalenman shamushca carca. 6Shinlli huaira ninanda huacamujshna uyarijpimi, ashtaca gentecuna tandanajurca. Tucuicunallata paicunapaj shimi rimaipipacha villanajujta uyashpami, manllarinajurca. 7Shinamandami, ninandapacha manllarishpa, cashna ninajurca:
“¿Nachu Galilea llactamanda runacuna cashna rimanajun? 8¿Imashpata paicunataca, huahuamandapacha ñucanchi rimashpa viñashca shimicunapi rimanajujta uyanchi? 9Ñucanchica: Partia, Media, Elam, Mesopotamia, Judea, Capadocia, Ponto, Asia, 10Frigia, Panfilia, Egipto shuti llactacunamandami caipi canchi. Shinallata, Africapi tiyaj Cirene pueblota yalishca llactacunamandapash, Roma llactamanda, caipi causajcunapashmi canchi. Huaquingunaca, Israelcuna, shujcunaca Israelcuna yachachishcata catijcunami canchi. 11Shinallata, Cretamandapash, Arabia llactacunamandapashmi, Taita Dios juyailla rurashcataca, ñucanchi rimaicunapipacha villanajujta uyanajunchi” ninajurcami.
12Chashnata uyashpami, tucuicuna ninandapacha manllarishpa, caishuj chaishuj:
“Caicunaca, ¿imata ninajunyari?” ninajurca.
13Ashtahuangarin huaquingunaca:
“Llullu vinohuan machashcacunamari” nishpami asinajurca.
Pedro villai callarishcamanda
14Shina cajpimi Pedroca, villachun cachashca chunga shuj runacunandi shayarishpa, shinllita rimashpa cashna nijurca: “Judío runacunapash, cai Jerusalenbi causajcunapash, ñuca villajuj shimicunataca ali uyaichi. 15Cangunaca: ‘Paicunataca, machashcami’ yanguichimi, na chashnachu. Chairamari iscun pacha tucushca. 16Ashtahuangarin cashna tucunataca, profeta Joelmi cashna nishca:
17‘Taita Diosca, cashnami nijun:
Tucurimui punllacunapica, tucuicunamanmi
Ñuca Espiritutaca talijshna cachamusha.
Shina cachamujpimi, cangunapaj churicunapash,
ushicunapash Ñucamandaca villanajunga.
Shinallata, cangunapaj chairalla viñai huambracunapash, muscuipimi ricunajunga.
Cangunapaj rucucunapash, muscuicunapimi ricunajunga.
18Chai punllacunapica, Ñucapajta ruraj jaricunamambash,
huarmicunamambash, Ñuca Espiritutami talijshna cachamusha.
Shina cachamujpimi, Ñucamandaca villanajunga.
19Jahua pachapica, jatun manllarinacunata rurashpami ricuchisha.
Cai pachapica, pipash na rurai ushanallacunata rurashpami ricuchisha,
yahuarta, ninata, cushnitapashmi ricuchisha.
20Jatun Dios agllashca juyailla, jatun punlla nara chayamujpillatami,
indipash yana yana tucunga, lunapash yahuarman tigranga.
21Maijan cashpapash Jatun Diosta crishpa mañashpaca quishpiringami’ nijushcami.
22Israel runacuna, cai villashcacunataca ali uyapaichi: Taita Diosca, Nazaret pueblomanda Jesustami, cangunapurapica ninanda alicachirca. Taita Diosca, Jesucristohuanmi, imatapash juyaillacunata, jatun manllarinacunata, pipash na rurai ushanallacunata rurashpa ricuchirca. Chaitaca cangunallata alimi yachanguichi. 23Taita Diosca, shina tucunata pundamandapacha ali yachashpami Jesustaca cangunaman saquirca. Shina saquijpimi cangunaca, Jesusta prezu japishpa, na ali runacuna cruzpi chacatashpa huañuchinajuchun japichircanguichi. 24Paitami, Taita Diosca huañuchina nanaicunamanda cacharichishpa causachirca. Jesusca huañuita mishashpami causarirca. 25Davidpash, Jesusmanda villashpami, cashna nijushca:
‘Ñuca tucui causaipimi, Mandaj Diostaca yarishpa causani.
Can, ñucata shinllichijpimi, napacha pandashpa causasha.
26Shina cajpimi ñuca shungupipash, ninanda cushijurcani.
Shinallata, ñuca jalluhuambash, cushijuihuanmi candajurcani.
Ñuca cuerpopash, japinata shuyashpami samajunga.
27Ñuca almatapash, Hadespica na saquinguichu.
Shinallata, Cambajlla causajuj Runagupaj cuerpo ismuchumbash, na saquinguichu.
28Imashna ali causaita charina ñangunatami rijsichihuarcangui.
Can ñucahuan cashpami ñucataca, ninanda cushichihuangui’ nijushcami.
29Huauquicuna, ñucanchi ñaupa taita David huañushpa pambai tucushcataca, na manllashpami cangunaman villajuni. Paita pambashca utujupash, cunangamanmi ñucanchi llactapi tiyajun. 30Davidca profetami carca. Chashna cajpimi Taita Diosca: ‘Cristoca, cambaj miraimanda huacharimushpami can tiyajushcapi tiyarishpa mandaj shamunga’ nishpami juramentushca carca. 31Cristo causarinataca pundamandapacha ricushca cashpami Davidca cashna nijurca: ‘Paipaj almataca, Hadespica na saquishcachu. Paipaj cuerpopash na ismushcachu’ nijurcami. 32Chai Jesustami, Taita Diosca causachirca. Ñucanchica, tucuicunami chaita ricushcata villajcuna canchi. 33Taita Diosca, Jesusta jatumbi churashpami, Paipaj ali maquiman tiyachirca. Taita Diosca: ‘Carashapachami’ nishca Jucha illaj Espiritutami talijshna caramurca. Chaitami cangunapash ricunajunguichi, uyanajunguichi. 34David jahua pachaman rishcataca, na nijunllu. Ashtahuangarin paillatami, cashna nishca:
‘Jatun Diosca, ñucata Mandajtami:
Canga, Ñuca ali maquiman tiyajuilla.
35Canda fiñajcunata, Cambaj chaquihuan saruchun,
Ñuca churangacaman tiyajuilla’ nishcami.
36Tucuilla Israelcuna, caitaca aliguta yachanapachami canguichi. Canguna chacatashca Jesustallatami, Mandaj cachumbash, Quishpichij cachumbash, Taita Diosca churashca” nijurcami.
37Chashna villajujpimi, shungupi ninanda llaquirishpa Pedrotapash, caishuj apostolcunatapash:
“Shina cashpaca, ¿imatata rurana capanchi huauquicuna?” ninajurca.
38Shina nijpimi Pedroca, cashna nirca:
“Ninanda llaquirishpa Diospajman tigrarishpa, tucuicuna Jesucristopaj shutipi bautizarichi. Shina rurajpimi cangunapaj juchacunata anchuchishpa, Jucha illaj Espirituta cangunaman caramunga. 39Chaitaca, cangunamambash, cangunapaj huahuacunamambash, carupi tucui causajcunamambashmi, carasha nishca. Ashtahuangarin, ñucanchita Mandaj Taita Diosca, Pai cayashcacunamanllami carasha nishca” nircami.
40Pedroca, ashtahuan shuj shimicunatapash villashpami, shinllita rimashpa cashna nijurca:
“Jatun na alita rurashpa causanajuj cai miraicunamanda anchurishpa quishpirinami canguichi” nijurcami.
41Shina villajujta uyashpa chasquijcunami bautizarinajurca. Chai punllapica, quimsa huarangashna crijcunami mirarca. 42Apostolcuna yachachishcataca na saquishpami, aliguta catinajurca. Paicunaca, tandata chaupirishpa micungapapash, Diosta mañangapapash, tucuillami shujllashnalla tandanajuj carca.
Callari crijcuna imashna causanajushcamanda
43Apostolcunaman Dios ushaita carajpimi, imatapash juyaillacunata rurashpa, pipash na rurai ushanallacunata rurashpa ricuchinajurca. Shina cajpimi, tucuicuna ninanda manllarinajurca. 44Tucui crijcunami tandanajushpa, juyailla causanajurca. Shinallata, imata charishcapash tucuillapajmi carca. 45Paicunapaj alpata, imata charishcacunatapash jatushpami, piman imata cuna cajpipash, asha asha cunajurca. 46Diospaj huasipipash, punllandi tandanajushpami, shujllashnalla catinajurca. Shinallata, huasicunapipash tandata chaupishpa, ninan juyaihuan micunata carashpami, cushijushpa causanajurca. 47Shinallata, Taita Diosta ninanda alicachishpa causanajujpimi, paicunatapash tucui gentecuna alicachinajurca. Shinamandami Jatun Diosca, tandanajuj crijcunataca punllandi ashtahuan mirachishpa catijurca.
Trenutno odabrano:
HECHOS 2: QVI16
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.