HECHOS 1
1
Jucha illaj Espirituta cachamunapacha cashcamanda
1¡Ñuca juyashca Teofilolla! punda libropica, Jesús imatalla rurangapa callarishcata, imatalla yachachishcatami ña villarcani. 2Jesusta jahua pachapi chasquishca punllacamanmi villajurcani. Apostolcunata agllashca jipami, Jucha illaj Diospaj Espíritu yarichijpi paicuna imatalla ruranata mandashpa saquirca. 3Jesusca ninanda llaquichi tucushpa huañushpa causarishca jipami, causarishcapacha cashcata yachachun paicunaman ricurirca. Chuscu chunga punllacaman ricurishpami, Taita Dios mandajuj llactamanda paicunaman villajurca.
4Jesusca, paicunahuan cashpallatami, cashna nishpa mandarca:
“Jerusalenmandaca na maimambash rishpami, Ñuca Taita cachamushapacha nishcata chasquingacaman shuyana canguichi. Chaitaca, Ñuca villajujta ña uyarcanguichimi nirca. 5Juanga, yacuhuanllami bautizajurca. Ashtahuangarin cangunataca, asha punlla jipallami, Taita Diosca Jucha illaj Espirituhuan bautizanga” nircami.
Jahua pachaman Jesús rishcamanda
6Jesushuan tandanajushca cashpami, cashna tapunajurca:
“Apunchi Jesús, ¿Israel llactataca, cunan huatacunallatachu, mandana ushaita charichun cutin cugringui?” ninajurcami.
7Shina nijpimi paicunataca cashna nirca:
“Ima huatacuna, chashna tucunatapash, cangunapaj yachanaca na canllu. Ninan ushaita charij Ñuca Taitallatami chaitaca churarca. 8Ashtahuangarin, Jucha illaj Diospaj Espíritu cangunapajman shamujpimi, ushaita japinguichi. Chai ushaihuanmi, Jerusalenbi, tucui Judea llactapi, Samaria llactapi, cai pacha tucuri manñacaman Ñucamanda villagringuichi” nijurcami.
9Shina nijujpillatami, paicuna ricujta Jesustaca jahua pachaman vichai aparca. Paitaca, fuyu quilpajpimi, na ashtahuan ricui ushanajurca. 10Jahua pachaman Jesús rijujta vichai ricunajujpimi, yuraj churajunata churajushca ishcai runacunaca, ñapash paicuna shayanajuj pushtuman shayarimurca. 11Paicunapashmi cashna ninajurca:
“Galilea llacta runacuna, ¿imashpata cangunaca, jahua pachata ricunajunguichi? Cangunapaj chaupimanda jahua pachaman apai tucushca Jesusllatami, imashna canguna ricushcashnallata, jahua pachamanda cutin tigramunga” ninajurcami.
Judaspaj randi shujta agllashcamanda
12Chai jipami, Olivo lomamandaca, Jerusalenman tigranajurca. Chai lomaca, Jerusalenmandaca, samana punllapi#1:12 Judiocunapajca, samana punllapica, shuj kilometrotashnallami puri ushana carca. purinashnallami carca. 13Ña chai puebloman chayashpaca, paicuna causanajuj jahua altibajo huasimanmi rinajurca. Chaipica: Pedro, Jacobo, Juan, Andrés, Felipe, Tomás, Bartolomé, Mateo, Alfeopaj churi Jacobo, shinallata Zelote nishca Simonbash, Jacobopaj huauqui Judaspashmi, chaipillata causanajurca. 14Paicunaca, huaquin huarmicunandi, Jesuspaj mama Mariandi, Jesuspaj huauquicunandimi tandanajushpa, Diosta shujllashnalla yarishpa, ninanda mañashpa causanajurca. 15(Chai punllacunapimi Jesusta crijcunaca patsaj ishcai chungashna tandanajushca carca). Chaipimi Pedroca, paicunapaj chaupimanda jatarishpa cashna nijurca: 16“Tucui crijcuna, ñaupa punllacunapimi Judas runamandaca, Jucha illaj Diospaj Espíritu, Davidman villashpa quilcachishca. Chai villashca pactachunmi Judas runaca, Jesusta prezu japichingapa ñaupashpa shamujurca. 17Judas runaca, ñucanchipurami carca. Ñucanchishnallata villachun, paitapash agllashcami carca. 18Pai chashna na alita rurashpa jatushca culquihuanga, alpatami randirca. Chai alpapillatami Judasca, jahuamanda umahuan urmashpa, vijsa tugyajpi, tucuilla chunllulicuna talirishpa huañurca. 19Chashna tucushcataca, Jerusalenbi tucui causajcunami yacharca. Chaimandami chai alpataca, paicunapaj rimaipica, Acéldama nishpa shutichirca. Shina nishpaca, ‘Yahuar pamba’ nijunmi. 20Salmos libropica, cashna nishpa quilcashcami tiyajun:
‘Pai causajushca huasica, jichushca pambashna cachun,
chaipica pipash ama causachun’ nijunmi.
Shinallata:
‘Paipaj ruranataca, shujcuna rurachun’ nijunmi.
21Maiman cashpapash rishpa, shamushpa, Apunchi Jesús purijushca punllacunapimi, cai runacunaca ñucanchita cumbashpa purinajurca. 22Cai runacunaca, Juan bautizai callarishca punllamandapacha, Jesús jahua pachaman rishca punllacamanmi, ñucanchihuan purinajurca. Shinamandami, Jesús causarishcata ñucanchihuan villagrichunga, paicunapuramanda shuj runataca agllanapacha canchi” nijurca.
23Pedro shina nijpimi, ishcai runacunata agllangapa churarca. Shujca, Justo nishca José Barsabás shutimi carca. Shujca, Matías shutimi carca. 24Shina agllashpami, cashna nishpa mañanajurca: “Jatun Dioslla, canmi tucuicunapaj shunguta rijsipangui. Cai ishcaipuramanda maijanda can agllashcatapash, ñucanchiman ricuchihuailla. 25Cambajta rurashpa ñucanchihuan villagrichun agllapailla. Judas runaca, pai rina pushtuman ringapami, canda na cazurca” nishpami mañanajurca.
26Shina mañashpa, pipaj urmajta yachangapa rurajpica, Matías runapajmi urmarca. Chaimandami, villachun cachashca chunga shuj apostolcunahuan paica tandanajurca.
Trenutno odabrano:
HECHOS 1: QVI16
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.