Vakatekivu 22
22
Nai Vakaro me Vakacabori ko Aisake
1 #
Ipe 11.17-19
Sa oti na veika oqori, sa qai vakatovolei Eparaama na Kalou, a sa kaya vua, “I Eparaama!” A sa kaya ko koya, “Koi au saka oqo, noqu Turaga.” 2#2Vei 3.1A sa kaya ko koya, “Mo kauta mada na luvemu, na luvemu e dua bauga, ko Aisake ko sa lomana, ka lako ki na vanua mai Moraia, ka vakacabori koya kina mei soro kama e na dua na ulunivanua ka'u na vakatakila vei iko.” 3A sa sou e na mataka ko Eparaama, ka vauca nai vodovodo ki na nona asa, ka kauta vata kaya e le rua na nona cauravou, kei Aisake na luvena, ka taya na buka ni soro kama, ka ia, ka lako vaka ki na yasana ka vosa kina vua na Kalou. 4Ia e na kenai katolu ni siga sa ta cake ko Eparaama, ka raica na vanua ni sa tu vakayawa yani. 5A sa kaya ko Eparaama vei rau na nona cauravou, “Drau tiko ga eke kei na asa; ia ka'u na lako yani vata kei na gone ki na vanua ko ya me la'ki vakacaboisoro, ka qai lako tale mai vei kemudrau.” 6A sa taura na buka ni soro kama ko Eparaama, ka tauca vei Aisake na luvena, ka sa kauta e ligana na buka sa waqa kei nai sele. E rau sa qai lako vata ruarua yani. 7A sa vosa vei Eparaama na tamana ko Aisake, ka kaya, “I Ratu!” A sa kaya, “Koi au oqo, na luvequ.” A sa kaya ko Aisake, “Sa tu oqo na buka kei na buka sa waqa, ia sa evei ga na lami mei soro kama?” 8A sa kaya ko Eparaama, “Na luvequ, ena vakarautaka na Kalou na lami mei soro kama.” A rau sa qai lako ruarua vata yani.
9 #
Jeme 2.21
Ia ni rau sa yaco ki na vanua ka vosa kina vua na Kalou, a sa tara e kea nai cabocabo-ni-soro ko Eparaama ka sa tuva na buka. A sa vesuki Aisake na luvena, ka vakotora ki nai cabocabo-ni-soro e na dela ni buka. 10A sa dodoka na ligana ko Eparaama, ka taura nai sele, ka me vakamatea na luvena. 11Ia sa qai kacivi koya mai lomalagi ko koya na agilosi i Jiova, ka sa kaya, “I Eparaama, i Eparaama!” A sa kaya ko koya, “Koi au ga oqo.” 12Sa qai kaya ko koya, “Mo kakua ni dodoka na ligamu vua na gone, ia mo kakua ni kitaka vua e dua na ka; ni'u sa qai kila oqo ni ko sa rerevaka na Kalou, ni ko sa sega ni bureitaka vei au na luvemu, na luvemu e dua bauga.” 13A sa ta cake ko Eparaama, ka vakararai, ka sa raica sa tiko mai dakuna e dua na sipi tagane sa tacori e na taba-ni-kau na kenai leu. A sa la'ki kauta mai na sipi tagane ko Eparaama, ka vakacabora mei soro kama mei sosomi kei luvena. 14A sa vakatoka kina na yaca ni vanua ko ya ko Eparaama ko “Jiova-jaire”;#22.14 Se Ko Jiova e na vakarautaka; Kenai balebale vakamatanivola vakaIperiu Ko Jiova sa raica me vaka sa kainaki ka yacova na siga oqo, “Mai na ulunivanua ena vakarautaka ko Jiova.”#22.14 Se ena raica ko Jiova
15A sa kaci vakarua vei Eparaama mai lomalagi ko koya na agilosi i Jiova, 16#Ipe 6.13,14ka kaya, “Sa vaka ko Jiova, Au sa bubului ki na yacaqu: Ni ko sa cakava na ka oqo, ka sa sega ni bureitaka na luvemu, na luvemu e dua bauga, 17#Ipe 11.12au na vakalougatataki iko vakalevu, ka vakavuqataka vakalevu na nomu kawa me ra vaka na kalokalo ni lomalagi kei na nuku mai matasawa. Ia ena taukena na matamata-ni-koro ni nodra meca ko ira na nomu kawa, 18#Caka 3.25ena kalougata talega na veimatanitu kecega e vuravura mai vei ira na nomu kawa, ni ko a vakarorogo ki na domoqu.” 19A sa lesu tale vei rau na nona cauravou ko Eparaama; a ratou sa cavu tu ka lako vata ki Peri-sepa. A sa tiko mai Peri-sepa ko Eparaama.
Na Kawa i Neori
20Sa oti na ka oqo sa tukuni vei Eparaama, ka vaka, “Raica, ko Milika, sa vakasucu gone talega era luvei Neori na tuakamu: 21ko Usa na nona ulumatua, kei Pusa na tacina, kei Kemueli na tama i Erami, 22kei Kiseti, kei Eso, kei Pilitasa, kei Jetilafi, kei Pecueli.” 23Ia sa luve i Pecueli ko Repeka. Ko iratou na lewe walu oqo sa vakasucuma ko Milika, na tamadratou ko Neori na tuakai Eparaama. 24A watina lailai talega, na yacana ko Reuma, sa vakasucumi Tipa, kei Keama, kei Teasi, kei Meeka.
Trenutno odabrano:
Vakatekivu 22: FRV21
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj