Cakacaka 8
8
1A sa vinakata na nona mate ko Saula.
Sa Vakacacana na Lotu ko Saula
Ia e na gauna ko ya era sa vakacacani vakalevu kina nai soqosoqo lewe ni soro era sa tiko mai Jerusalemi; a ra sa veiseyaki kina ki na veiyasana i Jutia kei Samaria, ko ira ga nai apositolo e segai. 2A ra sa buluti Sitiveni eso na tamata daulotu, a ra sa cakava na somate levu e na vukuna. 3#Caka 22.4-5; 26.9-11Ia ko Saula, sa vakacacani ira vakalevu nai soqosoqo lewe ni soro, ni sa curu ki na veivale kecega, ka yarataki ira na tagane kei ira na yalewa, ka biuta ki na valeniveivesu.
Sa Vunautaki nai Tukutuku-vinaka e Samaria
4Ia ko ira era sa veiseyaki, era sa lako ki na veiyasana kecega ka vunautaka na vosa. 5Sa qai lako sobu ko Filipe ki na koro ko Samaria, a sa vunautaki Karisito kivei ira. 6Ia ko ira na tamata era sa lomavata me ra vakarogoca na ka sa tukuna ko Filipe, ni ra sa rogoca ka raica na veika-mana sa kitaka ko koya. 7Ni sa lako tani mai vei ira na lewe levu eso na yalo velavela sa curumi ira, ni ra sa qoqolou tiko e na domo levu; kei ira talega era lewe vuqa sa tauvi ira na mate sautaninini, kei na lokiloki, era sa vakabulai. 8A sa levu kina na marau e na koro ko ya.
Ko Saimoni na Daucakaisausau
9A sa dua na tamata, ko Saimoni na yacana, sa daucakaisausau makawa e na koro ko ya, a sa vakurabuitaki ira vakalevu kina na kai Samaria, ni sa dautukuni koya ni sa dua ka uasivi sara. 10A ra sa vakarogoci koya ko ira kecega, ko ira e lalai kei ira e lelevu, a ra sa kaya, “O koya oqo na kaukauwa levu ni Kalou.” 11A ra sa vakarogoci koya, ni sa vakidacalataki ira vakadede ko koya e na nona i sausau. 12Ia ni ra sa vakadinati Filipe ni sa vunautaka na veika ni matanitu ni Kalou, kei na yaca i Jisu Karisito, era sa qai papitaisotaki, ko ira na tagane kei ira na yalewa. 13Sa qai vakadinata talega ko Saimoni; ia ni sa papitaisotaki oti, erau sa dautiko vata kei Filipe; a sa kidacala ko koya, ni sa raica nai vakatakilakila kei na cakacaka mana levu sa caka tiko.
14Ni ra sa qai rogoca ko ira nai apositolo era sa tiko mai Jerusalemi, era sa vakadinata na vosa ni Kalou ko ira na kai Samaria, era sa talai Pita kei Joni vei ira. 15Ia koi rau, ni rau sa lako sobu, erau sa masulaki ira, me ra rawata na Yalo Tabu 16(ni sa sega ni yaco vua e dua vei ira ko koya; era sa papitaisotaki walega e na yaca ni Turaga ko Jisu). 17A rau sa tabaki ira e na ligadrau, a sa yaco kina kivei ira na Yalo Tabu. 18Ia ni sa raica ko Saimoni sa soli na Yalo Tabu e na veitabaki ni ligadrau nai apositolo, sa qai via solia vei rau nai lavo, 19ka kaya, “Solia talega mai vei au na kaukauwa oqo, me yaco kina na Yalo Tabu vei ira yadua ka’u na tabaka e na ligaqu.” 20Ia sa kaya vua ko Pita, “Mo drau rusa vata kei na nomu siliva, e na vuku ni ko sa nanuma sa voli rawa nai solisoli ni Kalou e nai lavo. 21Sa sega na nomu tikina se nomu i votavota e na ka oqo, ni sa sega ni dodonu na yalomu e na mata ni Kalou. 22O koya oqo mo qai veivutunitaka na nomu i valavala ca oqo, ka masu vua na Kalou, de sa rawa beka mo vosoti e na nanuma ni yalomu. 23Ni’u sa kunea ko sa tu ga e na ka gaga sara, ka ko sa vesuki e nai valavala ca.” 24Sa qai vosa ko Saimoni, ka kaya, Drau masulaki au vua na Turaga, me kakua ni yaco vei au e dua na ka drau sa vosa kina.
25Ia koi rau, ni rau sa tukuna oti ka vunautaka na vosa ni Turaga, erau sa lesu tale ki Jerusalemi, ka rau sa vunautaka nai tukutuku-vinaka e na veikoro lalai e vuqa mai Samaria.
Ko Filipe kei na Mata ni Eciopea
26A sa vosa vei Filipe e dua na agilosi ni Turaga, ka kaya, “Mo tucake ka lako vaka ki na ceva, e na sala sa lako sobu mai Jerusalemi vaka ki Qasa.” (Ko ya na gaunisala e na vanua dravuisiga.) 27Sa qai tucake ko koya ka lako. Ka raica, e dua na kai Eciopea, a mata, ka vakailesilesi levu i Kadasi na nodra ranadi na kai Eciopea, a sa nona dauniyau ko koya. A sa lako ki Jerusalemi me laki sokalou, 28ka sa lesu tale tiko, ka sa wilika nai vola i Aisea na parofita ni sa tiko e na nona qiqi vakaturaga. 29Sa qai kaya vei Filipe na Yalo Tabu, “Lako voleka, mo drau la’ki tiko kaya e na qiqi vakaturaga ko ya.” 30Sa qai cici yani ko Filipe, a sa rogoci koya ni sa wilika nai vola i Aisea na parofita; a sa kaya, “O sa kila na ka ko sa wilika, se segai?” 31A sa kaya ko koya, “Au sa rawata vakaevei, kevaka sa sega e dua me tuberi au?” A sa masuti Filipe me cabe cake me rau tiko kaya. 32#Aisea 53.7,8Oqo na tiki ni Vola Tabu sa wilika ko koya:
“Sa tuberi ko koya me vaka na sipi me vakamatei,
ia me vaka na lami sa galu e na mata i koya sa kotiva,
sa vakakina ko koya ni sa sega ni vosa.
33Ni sa malumalumu tiko ko koya, sa sega ni lewai vakadodonu.
Ia ko cei ena tukuna na nona kawa?
Ni sa kau tani e vuravura na nona bula.”
34Sa qai vosa vei Filipe ko koya na mata, ka kaya, “Au tarogi iko mada, se sa tukuni cei tiko na parofita e na vosa oqo, ko koya ga se dua tale?” 35Sa qai dalaga ko Filipe, ka sa vakatekivu e na tiki ni Vola Tabu ko ya, ka sa vunautaki Jisu vua. 36Ia ni rau sa lako tu e na sala, erau sa yaco ki na dua na wai, ka sa kaya ko koya na mata, “Raica, sa tu oqo na wai! A cava sa tarovi au me’u kua kina ni papitaiso?” 37A sa kaya ko Filipe, “Kevaka ko sa vakadinata e na yalomu taucoko, sa tara ga.” A sa vosa ko koya, ka kaya, “Au sa vakadinata ni sa Luve ni Kalou ko Jisu Karisito.” 38Sa qai kaya ko koya me tu vakadua mada na qiqi vakaturaga, a rau sa lako sobu ruarua ki na wai, ko Filipe kei koya na mata, ka sa papitaisotaki koya. 39Ia ni rau sa cabe cake mai na wai, sa kauti Filipe tani na Yalo ni Turaga; a sa sega ni raici koya tale ko koya na mata, ka sa lako ga e nona sala ko koya ka reki tiko. 40Ia sa kunei koya ko Filipe mai Asoto, ka sa lakova na veikoro kecega ka vunautaka kina nai tukutuku-vinaka me yacova ni sa yaco ki Sisaria.
Trenutno odabrano:
Cakacaka 8: FRV21
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj