Cakacaka 9
9
Na Veisau i Saula
(Cakacaka 22.6-16; 26.12-18)
1Ia ko Saula sa cavuta tiko na vosa vakacudrucudruya kei na veivakamatei vei ira sa lotu vua na Turaga, ka sa lako vua na bete levu, 2ka sa taroga vua nai vola ki Tamasiko ki na veivalenilotu, kevaka e kunea ko koya eso era sa muria na Sala, se ra tagane se ra yalewa, me vesuka ka kauta ki Jerusalemi. 3Ia ni sa lako tu, sa yaco voleka ki Tamasiko; a sa cila vakavolivoliti koya vakasauri e dua na rarama mai lomalagi. 4A sa bale sobu ki na qele, ka sa rogoca e dua na domo sa kaya vua, “I Saula, i Saula, ko sa vakacacani au e na vuku ni cava?” 5A sa kaya ko koya, “O cei koi kemuni, na Turaga?” A sa kaya ko koya, “Oi au ko Jisu, ko koya ko sa vakacacana.” 6A sa sautaninini ko koya ka kidacala, ka kaya, “Kemuni na Turaga, a cava ko ni sa vinakata me’u cakava?” A sa kaya vei koya na Turaga, “Cavu tu, ka lako ki na koro, ka na tukuni vei iko na ka e dodonu mo cakava.” 7Ia ko ira na tamata sa lako vata kaya era sa tu ka vagagalu ga; era sa rogoca ga na domo, a ra sa sega ni raica e dua. 8A sa duri cake mai na qele ko Saula, ka dina ga ni sa tadola tu na matana, sa sega ga ni raica rawa e dua na ka. A ra sa tuberi koya, ka kauta ki Tamasiko. 9A sa bogi tolu ka sega ni rai rawa, ka sa sega ni kana se gunu.
Ko Ananaiasa
10A sa dua na tisaipeli mai Tamasiko, ko Ananaiasa na yacana. A sa kaya vei koya na Turaga e na raivotu, “I Ananaiasa.” A sa kaya ko koya, “Koi au oqo, Turaga.” 11A sa kaya vei koya na Turaga, “Mo cavu tu ka lako ki na gaunisala ka yacana ko Dodonu, ki na vale i Jutasa ka taroga na kai Tarisu, ko Saula na yacana. Ia raica, sa masu tiko ko koya, 12ka sa raica e na raivotu e dua na tamata, ko Ananaiasa na yacana, ni sa curu mai ka tabaka e na ligana me rai rawa tale ko koya.” 13Ia sa qai kaya ko Ananaiasa, “Kemuni na Turaga, era sa lewe vuqa ka’u sa rogoca kina nai tukutuku ni tamata oqo, na levu ni ca sa kitaka vei ira na nomuni tamata yalosavasava mai Jerusalemi; 14e ke talega sa lesia ko ira na bete levu me vesuki ira kecega sa masuta na yacamuni.” 15Ia sa kaya vei koya na Turaga, “Mo lako ga, ko koya oqo na tamata digitaki vei au, me kauta na yacaqu kivei ira na kai veimatanitu tani, kei ira na tui eso, kei ira na luve i Isireli; 16ni ka’u na vakatakila vua na levu ni veika rarawa ena sotava e na vuku ni yacaqu.” 17A sa qai lako ko Ananaiasa, ka curu ki na vale, a sa tabaki koya e na ligana, ka kaya, “Na wekaqu Saula, na Turaga ko Jisu, ko koya ka rairai vei iko e na gaunisala ko a lako mai kina, sa talai au mai, mo rai rawa tale, ka mo vakasinaiti talega e na Yalo Tabu.” 18A sa lutu vakasauri mai na matana na ka e vaka na vari ni ika, ka sa rai rawa sara ko koya. A sa tucake, ka sa papitaisotaki; 19ia ni sa kana oti, sa kaukauwa mai.
Sa Vunau mai Tamasiko ko Saula
A sa tiko ko Saula bogi vica ga kei ira sa lotu mai Tamasiko, 20ka sa vunautaka sara e na veivalenilotu ni sa Luve ni Kalou na Karisito. 21A ra sa kurabui kecega era sa rogoca, ka ra sa kaya, “Sai koya beka oqo se segai ka vakacacani ira mai Jerusalemi era sa masuta na yaca oqo? Ka sa rairai lako talega mai ki ke me kitaka vakakina, me kauti ira vakavesu vei ira na bete levu?” 22A sa kaukauwa cake mai ko Saula, a sa vakataqayataki ira na Jiu era sa tiko mai Tamasiko, ni sa vakadinadinataka sara ni sa Karisito ko koya oqo.
Sa Dro Bula ko Saula mai na Ligadra na Jiu
23 #
2Kori 11.32,33 Ni sa oti mada na veisiga e vuqa, sa qai bosea ko ira na Jiu me ra vakamatea, 24ia sa kila ko Saula na nodra bukivere. A ra sa yadrava na veimatamata-ni-koro e na siga kei na bogi me rawa kina ni ra vakamatei koya, 25ia sa qai kauti koya e na bogi ko ira na nona tisaipeli, ka tukuca sobu e na dua na sova ki daku ni bai.
Sa Yaco ki Jerusalemi ko Saula
26Ni sa yaco ki Jerusalemi ko Saula, sa tovolea sara me la’ki tiko vata kei ira na tisaipeli; a ra sa rerevaki koya kecega, ka sa sega ni vakadinata ni sa tisaipeli ko koya. 27Ia sa qai kauti koya ko Panapasa, ka kauta vei iratou nai apositolo, ka sa tukuna vei ira na nona raica na Turaga e na gaunisala, ko koya sa vosa talega vua, kei na nona vunau doudou mai Tamasiko e na yaca i Jisu. 28A sa mani tiko vata ka lako voli kei ira ko koya mai Jerusalemi, 29ka sa vosa doudou e na yaca ni Turaga ko Jisu. Ka sa vosa ka veileti kei ira ka vulagi mai na veimatanitu tani; ia era sa segata me ra vakamatei koya. 30Ia ni sa kila ko ira na veiwekani, era sa kauti koya ki Sisaria, a ra sa qai vakatala ki Tarisu.
31Sa qai cegu nai soqosoqo lotu mai Jutia taucoko kei Kalili kei Samaria, a ra sa vakatataki cake; ka sa dau nodra i valavala me ra rerevaka na Turaga, ka sa vakacegui ira na Yalo Tabu, ka ra sa tubu kina me ra lewe vuqa.
Na Vakabulai nei Inia
32Ia ni sa lakova na veiyasana kecega ko Pita, sa lako sobu talega vei ira na tamata lotu era sa tiko mai Lita. 33A sa kunea kina e dua na tamata ko Inia na yacana, sa davo ga e nai mocemoce ka yabaki walu, ni sa tauvi koya na mate sautaninini, 34A sa kaya vua ko Pita, “I Inia, sa vakabulai iko ko Jisu Karisito; tucake ka viviga na nomu i mocemoce.” A sa tucake sara ko koya. 35A ra sa raica ko ira kecega era sa tiko mai Lita kei Sarona, ka ra sa saumaki mai vua na Turaga.
Ko Pita mai Lita kei Jopa
36A sa tiko mai Jopa e dua sa lotu ko Tapaica na yacana, a kenai balebale ko Tokasa. Sa dauoga sara na yalewa oqo e na cakacaka vinaka, kei na cakacaka loloma sa kitaka tiko. 37A sa yaco e na gauna ko ya, sa tauvi-mate ko koya, ka ciba. Ia ni ra sa vakasilima oti, era sa vakotora e na dua na rumu e nai taba-vale e cake. 38Ia ni sa veivolekati ko Jopa kei Lita, ka ra sa rogoca na tisaipeli ni sa tiko kina ko Pita, era sa tala e lewe rua na tamata vei koya me masuta me lako vakatotolo sara mai vei ira. 39Sa qai ia ko Pita ka lako vata kei rau. Ia ni sa tadu ko koya, era sa kauti koya ki na rumu e na taba-vale e cake. A sa tu voleka vua ko ira na yada kecega a ra sa tagi, ka vakatakila na kote eso kei nai sulu ka cula ko Tokasa, ni sa bula vata kei ira. 40A sa vakatalai ira kece yani ko Pita, ka sa tekiduru, ka masu; ka sa vuki vaka ki na yago, ka kaya, I “Tapaica, tucake.” A sa dolava na matana, ia ni sa raici Pita, sa qai duri cake ko koya. 41A sa dodoka vua na ligana, ka tuberi koya cake. Sa qai kacivi ira na tamata lotu kei ira na yada, ka vakaraitaki koya ni sa bula. 42A ka oqo sa kilai mai Jopa taucoko, ka ra sa lewe vuqa sa vakabauta na Turaga. 43A sa tiko bogi vuqa ko koya mai Jopa kei Saimoni, a daucaka kuli-ni-manumanu.
Trenutno odabrano:
Cakacaka 9: FRV21
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj