Bar 1
1
Okuramukya
1Nyowe Paulo, omuheereza wa Yesu Kristo, ayayesirwe kuba mukwenda, ayasoroirwe kurangirra Amakuru Amarungi agaaraganiziibwe Ruhunga. 2Abarangi be bakabanza kugarangirra ira omu Bihandiiko ebirukwera. 3Nugo Makuru Amarungi agarukubaza ha Mwana we ayazairwe omu mubiri ali mwijukuru wa Daudi, 4baitu habw'okwera kw'omwoyo gwe na habw'okuhumbuuka omu bafu akamanyisibwa nkooku ali Mwana wa Ruhanga ow'obusobozi bwona. Ogu nuwe Yesu Kristo MUKAMA waitu, 5ou twatungiiremu omugisa n'obukwenda obw'okurangirra ab'omu mahanga goona okworoba okurukuruga omu kumwikiriza. 6Na inywe muli omuli abo abaayesirwe kufooka ba Yesu Kristo.
7Inywe inywena abagonzibwa ba Ruhanga abali Roma, abaayesirwe kuba bantu ba Ruhanga.
Nimbagondeza omugisa n'obusinge ebiruga hali Ruhanga Isiitwe na hali MUKAMA waitu Yesu Kristo.
Naasiima Ruhanga habwabu kandi naabasabira
8Eky'okubanza ninsiima Ruhanga wange omu Yesu Kristo habwanyu inywena; habwokuba okwikiriza kwanyu nikuranganwa omunsi yoona. 9Ningira Ruhanga ou mpeereza n'omwoyo gwange gwona nindangirra Amakuru Amarungi ag'Omwana we, nuwe kaiso wange nkooku mbaijuka butoosa omu kusaba kwange. 10Obu, ninsaba Ruhanga kakuba akisiima, mbahikeho nambere muli. 11Habwokuba ningonza muno kubarora, nukwo nsobole kubaleetera ekisembo ky'omwoyo ekiraabagumya. 12Kandi na itwe tusobole kugumyangana omu kwikiriza kwaitu: okwange n'okwanyu.
13 #
Ebik 19:21. Bagenzi bange, ningonza mumanye nkooku nagondeze kwija nambere muli emirundi nyingi, mbatungemu abaikiriza nkooku nabatungire omu Banyamahanga abandi; baitu okuhika hati nkyaina ebintangire. 14Nyowe nkyaina ibanja ery'okuhikaho Abagiriiki n'ab'amahanga agandi agateegesiibwe, ab'amagezi omuli bo n'abadoma. 15Na inywe abali Rooma, nyina ekihika eky'okubarangirra Amakuru Amarungi.
Obuhikiriire obuleetwa okwikiriza
16 #
Mar 8:38. Kandi nyowe, Amakuru Amarungi tindukugakwatirwa nsoni: nugo maani ga Ruhanga aganyakujuna weena arukwikiriza, okubandiza ha Bayudaaya okuhika na ha Bagiriiki. 17#Hab 2:4.Habwokuba omu Makuru Amarungi omu, nuho harukusuukulirwa obuhikiriire oburuga hali Ruhanga, oburaba omu kwikiriza kandi nibuheebwa abarukwikiriza; nkooku kyahandiikirwe kiti: “Ogu anyakuhikiriire alyomeera habw'okwikiriza.”
Ebibi by'abo abatatiina Ruhanga
18Obukaya bwa Ruhanga butandikire kuzooka niburuga omwiguru, nibuhikaho abantu abatatiina Ruhanga kandi ababi ababuutikira amazima habw'obubi bwabo. 19Byona ebi basobora kumanyaho Ruhanga nibabyetegereza, habwokuba Ruhanga akabibooleka. 20#Ama 13:1-9; Sir 17:8.Okuruga ha kuhangwa kw'ensi, omulingo gwe ogutarorwa, nubwo busobozi bwe obutahwaho hamu n'obwaruhanga bwe, byetegererezibwa omu bintu ebi yahangire. Nahabweki tibaina ky'okwekwasa kyona. 21#Bef 4:17,18.Noobu baraaba baamanyire Ruhanga, baitu batamutemu kitiinisa kandi batamusiime nkooku asemeriire. Ebiteekerezo byabo bikabahabisa kandi amagezi gaabo agaturumu gaswekererwa omwirima. 22Abaayeyesire abanyamagezi, nubo bafookere badoma. 23#Bir 4:16-18; Ama 11:15; 12:24; 13:10-19.Bakaleka kuramya Ruhanga atafa, baatandika okuramya ebisisani ebirukusisana abantu abafa, rundi ebinyonyi, rundi ebisoro, rundi ebyekurra.
24Nikyo Ruhanga yabahweriiremu, emitima yabo ekeemaliza ha bubi, bakakora bonka na bonka ebihemura emibiri yabo. 25Ningira bakaleka amazima agarukumanyisa Ruhanga baatamu ebisuba, baaramya kandi baaheereza ebihangwa okukira Omuhangi, anyakuheebwa ekitiinisa ebiro byona! Amiina.
26Nikyo Ruhanga yabalekiire balemwe okwegomba okurukuswaza. Bakazi baabo bakaleka emibiri yabo eki yahangiirwe, baagikoza eki etarahangiirwe. 27Abasaija nabo bakaleka kuteerana n'abakazi baatandika kwanjukiranganaho, nibakora ebikorwa eby'obuhemu n'abasaija bataahi baabo, baayereetera bonka ekifubiro ekisemeriire obugwagwa bwabo.
28Habw'okwanga kwikiriza Ruhanga, nikyo nawe yabalekiire baikale n'omutima oguramaire n'engeso ez'obugwagwa. 29Baijura engeso embi zoona: obubi, okwegomba okubi, hamu n'itima. Baijwire ihali, obwisi, enkungani, obugobya, n'enobi. Baaba ngambigambi, 30bahangirizi, abanoba Ruhanga, beereme, abeekuliriza, abenyumiza, abaserra obubi, abatahurra bazaire baabo, 31badoma, abateesigwa, abataganyira, n'abatagira mbabazi. 32Abo noobu baraaba nibamanya ekiragiro kya Ruhanga ekigamba ngu, abakora ebintu nk'ebi basemeriire kufa, tibagarukira ha kubikora kwonka, baitu basagika n'abandi abarukubikora.
Trenutno odabrano:
Bar 1: BRR2008
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible in Runyoro/Rutooro Interconfessional Translation © Bible Society of Uganda, 2008.