Bar 2
2
Abayudaaya nabo tibalitabuka bukaya bwa Ruhanga
1 #
Mat 7:1; Luk 6:37. Muntu iwe, noobu oraaba noosisa ota, toina ky'okwekwasa kyona obu ocwera mugenzi waawe omusango. Obu omucwera omusango, oba noogwesingisa wenka, habwokuba iwe kicwa, ebintu ebi orukukora nibyo bimu mali. 2Tumanyire Ruhanga nkooku ahikya okusingisa omusango abantu abakora ebibi nk'ebi. 3Muntu iwe, obu ocwera omusango abo abakora ebintu nk'ebi, kandi kunu na iwe nibyo orukukora, noogira ngu, olitabuka encwa ya Ruhanga? 4#Ama 11:23.Rundi noogaya embabazi ze enyingi, okugumiisiriza kwe n'obukwata-mpora bwe? Tomanyire embabazi za Ruhanga nkooku zikuleetera okwegarukamu? 5Baitu habw'okukadadara n'okuteegarukamu okw'omutima gwawe, nooyeyahurra ekifubiro ekiribaho ha kiro kiri, nambere encwa ya Ruhanga ey'amananu eryolekerwa. 6#Zab 62:12; Nfu 24:12.Habwokuba alisasura buli muntu naarorra ha bikorwa bye. 7Abo abagonza kutunga ekitiinisa, okusiimwa, n'okutafa, nibagumiisiriza omu kukora ebirungi, Ruhanga alibaha obwomeezi obutahwaho. 8Abandi ab'empaka kandi abatoorobera mazima, baitu aboorobera obubi, alibooleka ekiniga n'obukaya. 9Buli muntu anyakukora ebibi alihikwaho omuhito n'enaku nyingi, okubandiza ha Muyudaaya okuhika na ha Mugiriiki. 10Baitu weena anyakukora ebirungi aliheebwa ekitiinisa, alisiimwa, kandi alitunga obusinge, okubandiza ha Muyudaaya okuhika na ha Mugiriiki, 11#Bir 10:17.habwokuba Ruhanga tasoroora.
12Boona abasiisire batarukumanya Biragiro, balihwerekerra batarukujunaanirwa ha Biragiro. Kandi boona abaasiisire nibamanya Ebiragiro, omu Biragiro numwo balicwererwa omusango. 13Abanyakuhurra Ebiragiro kwonka, tibali bo bahikiriire omumaiso go Ruhanga, baitu abanyakukora Ebiragiro ebi bigamba, nubo balyetwa bahikiriire. 14Abanyamahanga abataina Biragiro, obu baraaba bakora Ebiragiro ebi bigamba habw'amagezi gaabo, bbo bonka beefookera bakwasi b'Ebiragiro, noobu baraaba bataina Biragiro. 15Booleka Ebiragiro ebi birukuragira nkooku bihandiikirwe omu mitima yabo. Emitima yabo nayo eba neekigumya, kandi ebiteekerezo byabo ebitarukwikirraniza biba nibibanyegerra rundi nibibaihaho omusango 16ha kiro eki nambere Ruhanga alicwerraho abantu omusango gw'ebi baakozire omu nsita, naaraba omu Kristo Yesu, nkooku kisangwa omu Makuru Amarungi aganatumirwe kurangirra.
Ebiragiro tibiri nibyo ebijuna Abayudaaya
17Baitu iwe obu oraaba nooyeyeta Muyudaaya, nooyesiga Ebiragiro nooyenyumiza kuba wa Ruhanga 18noomanya ebi arukwenda kandi noosiima ebirukukira oburungi, habw'okwegesibwa Ebiragiro, 19iwe obu oraaba noogumya nkooku oli munanasi w'abafu b'amaiso, noomulikira abo abali omu mwirima, 20muhabuzi w'abataina magezi, mwegesa w'abaana, habwokuba noomanya amagezi n'amazima agali omu Biragiro, 21kandi iwe anyakwegesa abandi, toyeyegesa? Iwe anyakuteererra abantu okutaiba, oiba? 22Iwe anyakutanga abandi kusiihana, osiihana? Iwe anyakunuga embandwa, onyaga ota ebiri omu mabandiro? 23Iwe anyakwenyumiriza omu Biragiro, ogaya ekitiinisa kya Ruhanga noocwa Ebiragiro? 24#Is 52:5.Habwokuba kikahandiikwa kiti: “Ibara lya Ruhanga nirijumwa omu Banyamahanga habwanyu.”
Okusarwa tikulibajuna
25Kyamazima okusarwa nikugasa obu oraaba noohikiriza Ebiragiro; baitu obu orukucwa Ebiragiro, okusarwa kwawe kusisana n'okutasarwa. 26Nukwo nu omuntu atasazirwe, kakuba ahikiriza Ebiragiro ebi birukugamba, noobu araaba atasazirwe, baitu talibarwa nk'asazirwe? 27Habweki, abo abatasazirwe mubiri baitu nibahikiriza Ebiragiro, balisingisa omusango inywe abarukucwa Ebiragiro kandi kunu mwina ebyahandiikirwe omu Biragiro kandi musazirwe. 28Habwokuba Omuyudaaya nyakabara tali ogu arukurorwa ha bya haruguru, n'okusarwa kw'amazima tikiri kintu kya haruguru ha mubiri. 29#Bir 30:6.Omuyudaaya nyakabara nuwe Muyudaaya omunda; kandi n'okusarwa okw'amazima kuli omu mutima, kintu ky'omwoyo tikiri ky'Ebiragiro ebyahandiikirwe. Kandi omuntu ogu tasiimwa abantu, baitu asiimwa Ruhanga.
Trenutno odabrano:
Bar 2: BRR2008
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible in Runyoro/Rutooro Interconfessional Translation © Bible Society of Uganda, 2008.