Ebik 4
4
Petero na Yohaana nibatwarwa omu maiso g'Orukurato Rukuru
1Petero na Yohaana obu bakaba nibakyabaza n'abantu, banyakatagara baabaizira baina omulinzi omukuru w'Enju ya Ruhanga hamu n'Abasadukaayo. 2Bbo babihiirwe habw'okuhurra Petero na Yohaana nibeegesa kandi nibarangirra okuhumbuuka kw'abafu okwatandikire na Yesu. 3Baabakwata, baabalindira omu nkomo okuhika nyenkya, habwokuba bukaba bwizire. 4Baitu baingi omuli abo abaahuliire enyegesa yabu bakaikiriza; n'omuhendo gw'abaikiriza gwayeyongera, gwahika nk'enkumi itaano.
5Obu bwakiire nyenkya, abalemi baabo hamu n'abakuru b'enganda n'abeegesa b'ebiragiro bakeesorooleza Yerusaalemu, 6baina Annasi mukuru w'abanyakatagara, Kaayafa, Yohaana, Alekizanda, n'abandi boona ab'oruganda rw'omukuru wa banyakatagara. 7Obu baayemeriize abanyankomo hagati, baatandika kubakaguza bati: “Busobozi ki obubakoleze binu, rundi mubikozire omu ibara ly'oha?” 8Petero, aijwire Mwoyo Ahikiriire, yabagarukamu ati: “Inywe abalemi b'abantu n'abakuru b'enganda, 9obu muraaba nimutukaguza hati habw'ekikorwa ky'embabazi eki tukoliire omuntu ogu omulema kandi nkooku akiziibwe, 10inywe inywena hamu n'abantu ba Isirairi boona mumanye ngu, omu ibara lya Yesu Kristo owa Nazareeti ou mwabambire hamusaraba, Ruhanga ou yahumbwire omu bafu, habw'Ogu, omusaija onu nikyo ayemereriire omu maiso ganyu akizire. 11#Zab 118:22.Yesu ogu niryo ibaale inywe abombeki eri mwayangire, baitu niryo lyafookere bugumizo bw'enju. 12Tiharoho ondi asobora kutujuna, habwokuba busaho ibara lindi hansi y'iguru eryahairwe abantu erisobora kutujuna.”
Petero na Yohaana nibalekerwa
13Ab'orukurato obu baarozire obumanzi bwa Petero na Yohaana, kandi baabamanya nkooku bali bantu kwonka abateegesiibwe, baahunirra. Baabamanya nkooku bali nubo abakaba nibaikara na Yesu. 14Obu baarozire omusaija ayakiziibwe abeemeriire ha rubaju, baaburwa eki baraabahakaniza. 15Nukwo kubaragira kuturuka aheeru, bbo bahanule bonka, 16nibakaguzangana bati: “Abasaija banu tubakole ki? Habwokuba baakozire ekyamahano ekirangainwe kandi ekimanyirwe abantu boona abaikara Yerusaalemu, titukyasobora kukyehakana. 17Kyonka habw'okukiculeeza kireke kweyongera kurangaanwa hoona omu bantu ka tubakange; balekere aho kugambira omuntu weena omu ibara eri.”
18Nukwo kweta abakwenda, baabateererra kutagaruka kugamba rundi kwegesa omu ibara lya Yesu. 19Baitu Petero na Yohaana baabagarukamu bati: “Na inywe mukicwemu, obu kiraaba kihikire omu maiso ga Ruhanga itwe okubahurra okukira Ruhanga. 20Kyonka, ebi twarozire n'ebi twahuliire titusobora kubiculerra.” 21Ab'orukurato baayongera kubakanga, hanyuma baabalekera, habw'okuburwa obulyo obu baraabafubirraho. Kandi abantu boona bakaba nibakugiza Ruhanga habw'eki ekyabaireho. 22Bakamanya omusaija ogu ayakozirweho ekyamahano eki eky'okukizibwa, nkooku akaba ahingwize emyaka makumi ana ey'obukuru.
Abaikiriza nibasaba Ruhanga obumanzi
23Petero na Yohaana obu baalekiirwe, baagenda hali ab'ekitebe kyabu, baabamanyisa byona banyakatagara abakuru n'abakuru b'enganda ebi baabagambiire. 24#Kurug 20:11; Neh 9:6; Zab 146:6.Obu baabihuliire, boona baimukiza Ruhanga amaraka nibamusaba bati: “Ai Mukama Rutakirwa, niiwe ayahangire iguru n'ensi, n'enyanja, n'ebinyakubirumu byona, 25#Zab 2:1,2.niiwe ayayekonyiize Mwoyo Ahikiriire kugambisa isenkuru-itwe Daudi omuheereza waawe oti:
‘Habwaki amahanga geekoba kukora kubi,
habwaki abantu bahanurra busa ebitarumu?
26Abakama b'ensi nibeetekaniriza obulemu,
n'abalemi bakeesorooza hamu kurwanisa Atahwaho
n'okurwanisa MUKAMA we ou yayekomiire.’
27 #
Luk 23:7-11;
Mat 27:1,2; Mar 15:1; Luk 23:1; Yoh 18:28,29. Kyamazima omu rubuga runu, Herode na Ponsio Pilaato bakeeteeraniza n'Abanyamahanga n'abantu ba Isirairi kurwanisa omwana waawe ahikiriire Yesu ou wayekomiire abe Mukama. 28Nukwo bahikiriize bati ebi wategekere ira omu magezi gaawe n'omu busobozi bwawe ngu kibeho. 29Hati nu, Ai MUKAMA, rora nkooku barukutukangisa, okoonyere abaheereza baawe kubaza ekigambo kyawe n'obumanzi bwona. 30Gorra omukono gwawe, okize; kandi oikirize ebihuniriza n'ebyamahano bikorwe omu ibara ly'omwana waawe ahikiriire Yesu.” 31Obu baamazire kusaba, ekiikaro ha bakaba beesoroliize kyatengeeta; boona baijura Mwoyo Ahikiriire, baatandika kubaza ekigambo kya Ruhanga n'obumanzi.
Abaikiriza ab'okubanza baakorraga hamu
32 #
Ebik 2:44,45. Ekitebe kyona eky'abaikiriza bakaba baina omutima gumu n'omwoyo gumu. Hakaba hataroho n'omu omuli bo ayagizire ngu, byona ebi yatungire bye wenka; baitu byona bikaba biri by'abo boona.
33Abakwenda bakongera kujurra okuhumbuuka kwa MUKAMA Yesu n'obumanzi bwingi, kandi embabazi za MUKAMA zaikaraga hali bo.
34Omuli bo hakaba hatarumu n'omu ayaburwahoga ekintu, habwokuba boona abakaba baina ebibanja rundi amaju bakabitunda, baaleeta sente ezi baihiremu, 35baaziha abakwenda. Bbo baazigabira buli omu nkooku yayetaagaga.
36Hakaba haroho omusaija ow'oruganda rwa Leevi, enzaarwa ya Kipuro, arukwetwa Yosefu, abakwenda ou baayesire Baranaba (amakuru gaalyo: Mwekambisa). 37Uwe akatunda ekibanja eki akaba ainakyo, yaleeta sente, yaziha abakwenda.
Trenutno odabrano:
Ebik 4: BRR2008
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible in Runyoro/Rutooro Interconfessional Translation © Bible Society of Uganda, 2008.