Ebik 5
5
Obugobya bwa Ananiya na Safiira
1Hakaba haroho omusaija arukwetwa Ananiya. Uwe hamu na mukazi we Safiira bakatunda ekimu ha bibanja byabo. 2Baitu Ananiya yasigaza ekicweka kya sente ezaarugiremu, amazire kwikirraniza na mukazi we. Yaleetaho ekicweka ekisigaireho, yakikwasa abakwenda. 3Petero nukwo kumukaguza ati: “Ananiya, Sitaani ataahire ata omu mutima gwawe kubiiha Mwoyo Ahikiriire, okasigaza ekicweka kya sente ez'otunzire omu kibanja? 4Obu okaba otakakitunzire, kikaba kitali kyawe bweremera? Kandi obu wamazire kukitunda, sente zaakyo okaba otarukusobora kwikoza nkooku orukwenda? Ekiteekerezo eki kikaija kita omu mutima gwawe? Tobiihire bantu, baitu obiihire Ruhanga.” 5#Suz 1:55.Ananiya obu yahuliire ebigambo ebi, yagwa hansi, yakanguka. Kandi eki kyatiinisa muno boona abaakihuliire. 6Abasigazi baimuka, baazinga omutumbi gwe omu rugoye, baaguturukya, baaguziika.
7Obu haahingwireho esaaha nka isatu, mukazi we yaija atamanyire ekibaireho. 8Nukwo Petero kumukaguza ati: “Ngambira, omuhendo gunu nugwo mwatunzire omu kibanja?” Nandiki mukazi ati: “Ego, nugwo ogu.” 9Nubwo Petero yamukagwize ati: “Habwaki mwikirraniize kwohya Mwoyo wa Ruhanga. Emirindi egi noogihurra? Y'abantu abarukuruga kuziika baro, bali ha irembo; na iwe nibaija kukuturukya.” 10Ahonaaho omukazi ogu yagwa hansi ha bigere bya Petero, yakanguka. Abasigazi obu baataahiremu, baasanga afiire ira; baamuturukya, baamuziika ha rubaju rwa iba. 11Obutiini bwakwata ekitebe kyona eky'abaikiriza n'abandi boona abaahuliire ebigambo ebi.
Abakwenda nibakora ebyamahano bingi
12Omu kasumi ako abakwenda bakaba nibakora ebihuniriza n'ebyamahano bingi omu bantu. Abaikiriza boona baayesoroolezaaga omu kisasi ky'omulyango gwa Solomooni, baina omutima gumu. 13Baitu abandi abatali b'ekitebe kyabo, busaho n'omu ayayehoiremu kuteerana nabo, noobu baraaba basiimirwe abantu boona. 14Kandi omuhendo gw'abasaija n'abakazi abaikiriize MUKAMA gukeeyongera muno kukira kara. 15Baatwaraaga abarwaire baabo, baabata ha nguudo, baababyamya ha butabu na ha mikeeka, nukwo ekiituuru kya Petero kibahikeho obu araaba naahingura. 16Abantu baaruga omu byaro ebiherraine Yerusaalemu, baayesorooleza aho, baleesire abarwaire n'abakwasirwe emyoyo emibi, boona baakizibwa.
Malaika naiha abakwenda omu nkomo
17Omu kasumi ako, omukuru w'abanyakatagara akaimuka, hamu n'ab'ekitebe ky'Abasadukaayo aba akaba ainabo. Boona baijwire ihali, 18baakwata abakwenda, baabata omu nkomo ei baatamuga abantu boona. 19Baitu ekiro, malaika wa MUKAMA yakingura enyigi z'enkomo, yabaturukya aheeru, yagamba ati: 20“Mugende, mwemerre omunju ya Ruhanga, mugambire abantu ebigambo byona eby'obwomeezi bunu obuhyaka.” 21Obu baahuliire eki, baataaha omunju ya Ruhanga obwire nibukyanganyka, baatandika kwegesa.
Nubwo mukuru w'abanyakatagara yaizire n'abakonyezi be, yasorooza orukurato rukuru n'abakuru boona aba Isirairi, yatuma omu nkomo, abalinzi baleete abakwenda. 22Baitu abakuru b'abaserikale obu baahikire omu nkomo, baasanga batarumu, nubwo baagarukire baamanyisa orukurato bati: 23“Twasanga enkomo ekingirwe kurungi mali, n'abalinzi beemeriire ha miryango; baitu obu tukingwireho, omunda titwasangamu muntu.” 24Omukuru w'abalinzi b'Enju ya Ruhanga hamu n'abanyakatagara abakuru, obu baahuliire amakuru ago, baatuntura muno, batarukumanya ebigambo ebi nambere biraagarukira. 25Nubwo haizire omuntu ayabaleetiire amakuru naagamba ati: “Abasaija aba mwataire omu nkomo, hati beemeriire omunju ya Ruhanga nibeegesa abantu.” 26Omukuru w'abalinzi b'Enju ya Ruhanga n'abakuru b'abaserikale baagenda, baabaihayo mpora, nibatiina kubakwasa amaani, nukwo abantu batabateera amabaale.
27Obu baabaleesire, baabeemereza omu rukurato hagati, mukuru w'abanyakatagara yabakaguza ati: 28#Mat 27:25.“Tukabateererra kutagaruka kwegesa omu ibara ly'omuntu ogu, baitu hati Yerusaalemu mugiijwize enyegesa yanyu, kandi mwegesa nk'abarukugenderra kutukwasa omusango ogw'esagama y'omuntu ogu!” 29Petero n'abakwenda abandi baamugarukamu bati: “Itwe tusemeriire kworobera Ruhanga kukira kworobera abantu. 30Ruhanga wa baisenkuruitwe akahumbuura Yesu, inywe ou mwaisire nimumuhanika ha muti. 31Baitu Ruhanga akamunyumiza, yamuta ha mukono gwe ogw'obulyo abe Omwebembezi kandi Omujuni, habw'okwegarukisamu Abaisirairi n'okubaganyiza ebibi. 32Itwe tuli bakaiso b'ebi byona, hamu na Mwoyo Ahikiriire, Ruhanga ou yahaire abo abamworobera.” 33Ab'orukurato obu baahuliire ebi, baabihirwa muno, baagonza kubaita.
Ekihanuuro kya Gamalyeri
34Baitu omu rukurato, hakaba harumu Omufalisaayo arukwetwa Gamalyeri, omwegesa w'ebiragiro, abantu boona ou baatamuga ekitiinisa. Uwe akeemerra, yabasaba abasaija abo babaturukyeho aheeru. 35Hanyuma, ab'orukurato yabagambira ati: “Inywe basaija ba Isirairi, mwegendereze eki murukukora abantu banu. 36Omu biro ebyahingwire, Tehuda, omusaija omubi, akaimuka yayeyeta mwebembezi omukuru, kandi abantu nk'ebikumi bbina bakamukuraatira. Baitu omusaija ogu obu yaisirwe, abaamuhondiire boona baararanga, n'ebyabo byagarukira aho. 37Ogu obu yahoireho, hakaimuka Yuda Omugaliraaya, omu biro by'okubara abantu, yayemesa baingi; baitu nawe akaitwa, na boona abamukuraatiire baararanga. 38Hati amagezi ndukubaha nugo ganu: Abantu abo mubagendeho mpora, mubaleke; habwokuba enyegesa enu n'ebikorwa binu obu biraaba birugire omu bantu, birihwaho. 39#2Mak 7:19.Baitu obu biraaba biri bya Ruhanga, timulisobora kubihwerekereza. Mwerinde mutaikara kuba nimurwana na Ruhanga!”
40Ab'orukurato baikiriza amagezi aga yabahaire. Obu bataahize abakwenda, baaragira babateere enkoba, kandi baabateererra kutagaruka kwegesa omu ibara lya Yesu. Hanyuma baabalekera. 41Abakwenda baaruga omu rukurato baina omuhimbo habw'okugaywa nibaturwa ibara lya Yesu. 42Kandi buli kiro baayegesaaga omunju ya Ruhanga n'omu maka g'abantu nibarangirra abantu Yesu nkooku ali Kristo.
Trenutno odabrano:
Ebik 5: BRR2008
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible in Runyoro/Rutooro Interconfessional Translation © Bible Society of Uganda, 2008.