Ebik 3
3
Petero naakiza omulema
1Kiro kimu Petero na Yohaana bakaba nibagenda omunju ya Ruhanga ha saaha y'okusaba, niyo saaha ya mwenda. 2Baarora abahimbire omuntu nibamurabyaho. Omuntu ogu akaba azairwe ali mulema. Buli kiro baamuhimbaga, baamuta ha irembo ly'Enju ya Ruhanga erirukwetwa Erirungi, asabirize abo abataahamuga. 3Omusaija ogu obu yarozire Petero na Yohaana nibaija kutaaha omunju ya Ruhanga, yabasaba bamuhe akantu. 4Petero ow'akaba ali na Yohaana yamugumyaho amaiso, yamugambira ati: “Turolerre.” 5Nawe yabataho amaiso, naanihira ngu, baramuha akantu. 6Baitu Petero yagamba ati: “Efeeza n'ezaabbu tinyinabyo, baitu ninkuha eki nyinakyo. Omu ibara lya Yesu Kristo owa Nazareeti, imuka orubate.” 7Petero yamukwata omukono gw'obulyo, yamwimukya. Ahonaaho amaguru ge n'ebigere bye byatunga amaani. 8Yabandaatuka, yayemerra, yatandika kurubata, yataaha nabo omunju ya Ruhanga naarubata, naaguruka, kandi naakugiza Ruhanga. 9Abantu boona obu baamurozire naarubata kandi naakugiza Ruhanga, 10baamumanyirra nkooku nuwe ayaikaraga naasabiiriza ha Irembo Erirungi ery'Enju ya Ruhanga, baahunirra muno kandi baatangaara habw'eki ekimubaireho.
Petero naayegesa abantu omu Nju ya Ruhanga
11Omusaija ogu, obu akaba akyagumiireho Petero na Yohaana, abantu boona babaizira nibairuka, bali omu kisasi ky'omulyango ekirukwetwa ekya Solomooni, nibahunirra muno. 12Petero obu yarozire eki, yatandika kubeegesa ati: “Inywe basaija ba Isirairi, kinu nikibahunirizaho ki? Habwaki nimutuhanga amaiso nk'abarukuteekereza ngu, obusobozi rundi oburungi bwaitu nibyo byarubasa omusaija onu? 13#Kurug 3:15.Ruhanga owa Abburahamu, Isaaka na Yakobbo, Ruhanga ow'abaisenkuru itwe, nuwe yanyumiize omuheereza we Yesu, ou mwahaireyo mwamwehakanira omu maiso ga Pilaato, obu akaba amaliriire kumulekera. 14#Mat 27:15-23; Mar 15:6-14; Luk 23:13-23; Yoh 19:12-15.Baitu inywe mukeehakana ogu Arukwera kandi Ahikiriire, mwasaba okuheebwa omwisi w'abantu, 15kandi mwaita ou turukweta endugirro y'obwomeezi. Nuwe ogu Ruhanga ou yahumbwire omu bafu, kandi niitwe bakaiso b'ekintu eki. 16Okwikiriza ibara lya Yesu n'obusobozi bwe nibyo byagarurra amaani omusaija onu, ou murukurora kandi ou murukumanya. Okwikiriza Yesu nukwo kwamukiriza kimu inywena nkooku murukurora.
17“Hati nu bagenzi bange, nimmanya ngu, inywe n'abeebembezi banyu eki mukakikora habw'obutamanya. 18Baitu Ruhanga nukwo yahikiriize ati eki yarangisize abarangi boona ngu, Kristo we alibonabonesibwa. 19Nahabweki mwegarukemu, muhindukire Ruhanga, ebibi byanyu biihweho. Obu nubwo MUKAMA araabaha ebiro eby'okuhuumuzibwamu, 20kandi abatumire Kristo ou yabategekiire. 21Nuwe Yesu anyakwikara omwiguru okuhika akasumi k'okugarurramu buhyaka ebintu byona, Ruhanga nkooku yarangisize abarangi be abahikiriire okuruga kara. 22#Bir 18:15,18.Mazimakwo Musa akagamba ati: ‘Omu bagenzi banyu, MUKAMA Ruhanga naija kubaimukizamu omurangi ondi, nka nyowe oku yanyimukize. Byona ebi araakabagambiraga, mubihikirize. 23#Bir 18:19.Omuntu weena atalihurra murangi ogu, alihwerekerezibwa, aihwe omu bantu ba Ruhanga.’ 24Kandi abarangi boona abaarangire ebya Ruhanga, okuruga hali Samwiri n'abo abaamuhondiire, nukwo baarangire bati ha biro binu. 25#Kub 22:18.Inywe muli baijukuru b'abarangi kandi bagwetwa b'endagaano Ruhanga ei yaraganiize baisenkuru inywe, naagambira Abburahamu ati: ‘Omu ruzaaro rwawe, enganda zoona ez'ensi numwo ziriheerwa omugisa.’ 26Ruhanga obu yahumbwire omwana we, akabanza kumutuma hali inywe Abayudaaya, abahe omugisa naiha buli omu omuli inywe omu ngeso ze ezitahikire.”
Trenutno odabrano:
Ebik 3: BRR2008
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible in Runyoro/Rutooro Interconfessional Translation © Bible Society of Uganda, 2008.