Matiu 26
26
Ram Dari Halana be Rav Wehi Jisas
(Mak 14.1-2; Luk 22.1-2; Jon 11.45-53)
1La mahavana be Jisas mwa bagahi vuvuri huri ginau kera geki, mwa bevea lalainira non roron̄tai be, 2“Gim iloe be atagun gubwen̄ gairua vi vora samsamwaran Halbisḡalau. Haḡe vi lin̄iau Nitun Atatu be rav vohau vai alun volovolo.”
3Haḡe ira muai tataroi mai ira bwatmetua ira Jius ram ḡoḡo utegaituvwa la imwan Kaiavas, Muai Tataroi, 4i ram lol taritari be rav haḡo batugehi Jisas dahuligi ba lol bamatea. 5Haḡe ram bevea be, “Tasav lolia tehe baten samsamwara huri Halbisḡalau, bereva sinombu ram bwalo huria.”
Mwa Burai Jisas Betani
(Mak 14.3-9; Jon 12.1-8)
6Batena Jisas mwa ḡan ginau lol imwan Saemon gabe lepa lol vanua Betani, 7vavine vwate mwa mai abena mai bwelehu vatu. Alolon bwelehu gea hun wai sasasavi bonboni gabe volina nu marahi maragai. Haḡe vavine gea mwa dadan̄ wai sasasavi gea alun bwatun Jisas. 8Take ira roron̄tai ram ḡitae ram lolhoro maragai, ram bevea be, “Huri hano gom lol sabwelei wai sasasavi uhu kunia? 9Mwa du be si saleiana na wai geki huri homu gaivua i homu gea si vano lalai ira hiru.”
10Jisas mwa ilo nora binihiva i mwa bevea lalainira be, “Huri hano gim lol bidoi vavine geki? Kea mwa lol ginau tavuha nu hari lalaiau. 11Ira hiru rav togo mai kimiu tagaro, take inau sigai. 12Batena mwa buraiau gin wai sasasavi uhu, mwa lol vatuvwai rebehiku huri noḡu tavtavigi. 13Nam bev mwasigi lalai kimiu be, halabehe tehe lol ureure duluai be rav toretore huri Roroi Tavuha geki, rai vevuri huri rovoga tavuha geki be vavine uhu nu lolia lalaiau gin binihi mulei huria.”
Judas mwa Binihi Tuhi be vi Lin̄ Jisas Vai Lol Limara Atatu
(Mak 14.10-11; Luk 22.3-6)
14Haḡe tuara vwate ninira han̄vul domwan gairua, kea gabe ihana Judas Iskariot, mwa bano aben ira muai tataroi, 15mwa bevea be, “Giv lai havanau lalaiau be nav lin̄ Jisas lol limamiu?” Kunia ram bolia gin vatlegiga matotobwai n̄avul gaitolu i ram laira lalainia. 16Ataguna gea Judas mwa hiḡe mahavana tavuha be vi lin̄ Jisas lalainira.
Ram Lol Vatuvwai Ginaganianan Halbisḡalau
(Mak 14.12-16; Luk 22.7-13)
17Lol muan Samsamwaran Bereti Vatuga, ira roron̄tai ram mai aben Jisas, ram hudalinia be, “Gom doron be gav lol vatuvwai ginaganianan Halbisḡalau hurigo halabehe?”
18Jisas mwa bevea lalainira be, “Giv vano lol bwatutun vanua aben atatu vwate, giv vevea lalainia be, ‘Vagahi mwa ḡilon be, Mahavana huriau mwa abena huba. Inau nav gan Halbisḡalau la imwamwa.’ ”
19Ira roron̄tai ram lol kun gabe Jisas nu vevea lalainira i ram lol vatuvwai ginaganianan Halbisḡalau.
Jisas mwa Bev Luae be Judas vi Lin̄ia Vai Lol Limara Atatu
(Mak 14.17-21; Luk 22.14,21-23; Jon 13.21-30)
20Haḡe lol ute ravravi Jisas mwa do mahuri mai domwan gairua be ramen gan ginau. 21Lol mahavan ginaganiana Jisas mwa bevea be, “Nam bev mwasigi lalai kimiu be, tuamiu vwate nin kimiu vi lin̄iau vai lol limara atatu.”
22Haḡe lolora mwa biaroi mutaigi, ram bavora ram hudalinia vatvatahara be, “Gom hav vinihia te be inau, Ratahigi?”
23Jisas mwa av korora be, “Wani gabe mwa ruhu bereti lol disi gaituvwa maiau, kea haḡea vi lin̄iau vai lol limara. 24Inau Nitun Atatu nav mate kun mwa ravae tuai huriau lol Ravrava Sabuga. Take vi hantai maragai lalai wani gea be vi lin̄iau Nitun Atatu vai lol limara. Nu tavuha maragai lalai wani gea be si hav vora tehe!”
25Judas gabe vi lin̄ia mwa av lua be, “Gom hav vinihia te be inau, Vagahi?” Jisas mwa bevea lalainia be, “Gom bevea haḡea.”
Ginaganianan Ravravi non Ratahigi
(Mak 14.22-26; Luk 22.15-20; 1Kor 11.23-25)
26Mahavana ram ḡan ginau, Jisas mwa lai bereti, mwa avkari God huria, i mwa biha borae, mwa lai lalainira non roron̄tai, mwa bevea be, “Giv laia ba gania. Geki rebehiku.”
27Haḡe mwa lai laha, mwa avkari God huria i mwa laia lalainira, mwa bevea be, “Giv mwin, kimiu duluai. 28Geki dagaku be men lol tatauleo non God be men tu. Dagaku gea vi rovo huri be God vi tugu kaburai vuron sinombu ivusi. 29Nam bev mwasigi lalai kimiu be nin kekadogaha nasav mom mwin te waen vava vi votu gubwen̄ higea nai mwin waen gara mai kimiu lol rahuan gara gabe Tamaḡu mwa ratahigi alolona.”
30Haḡe ram lol iboi vuvuri ram hae la vusin gai Oliv.
Jisas mwa Seserainia be Pita vi Tugua
(Mak 14.27-31; Luk 22.31-34; Jon 13.36-38)
31Haḡe Jisas mwa bevea lalainira be, “Garigi bon̄i kimiu duluai giv romaragai niniau i nav togo gaheku, bwatuna lol Ravrava Sabuga mwa bevea be, ‘God vi wehi radaiḡoro sipsip, haḡe vatugi sipsip rai visalsala.’ 32Take ataguna be nav tomare mulei nin mateana, nai vano Kalili amua nin kimiu.”
33Pita mwa av lua, mwa bevea lalai Jisas be, “Inau nasav lin̄igo tehe, son̄o be kera duluai ras lol kunia.”
34Jisas mwa bevea lalai Pita be, “Nam bev mwasigi lalainigo be, toa si hav totoreto te radu garigi bon̄i, gov tuguau vatolu.”
35Pita mwa bwaliu Jisas be, “Nasav tugugo tehe, gaituvwa n̄an be nas mate maigo.”
I ira roron̄tai duluai ram bevea n̄an kunia.
Jisas mwa Dataro Ketsemeni
(Mak 14.32-42; Luk 22.39-46)
36Jisas mwa bano maira non roron̄tai lol ute mwa uloinia gi Ketsemeni, i mwa bevea lalainira be, “Giv togo teti, nai van kahaḡa ba dataro.” 37Haḡe Jisas nu lai Pita mai ira nitun Sebedi gairua i ram bano. Binihin Jisas mwa bavora mwa marahia i mwa ron̄ mwahantai. 38Haḡe mwa bevea lalainira be, “Ron̄ mwahantai alolon noḡu binihiva mwa ibi maragaiau, mwa abena be namen mate. Gitol to teti ba mamata maiau.”
39Haḡe mwa mom bano, mwa hiv bahudui, mwa dataro, mwa bevea be, “Tata, be si dumwi, lai dagai lahan ron̄ḡagarasi geki niniau! Take noḡu doroniva vina ta nomwa n̄ano.”
40Haḡe mwa dabagilu mulei huri ira roron̄tai gaitolu i mwa habwera be ram maturu, mwa bevea lalai Pita be, “Kun hanigi? Gitol si hav mamata te dum maiau huri mahavana gaituvwa? 41Giv mamata ba dataro, bere gim hovi lol kalkaliana. Binihiva mwa rihumaragai, take vihogoi nu mandamanda.”
42Jisas mwa mom bano mulei varuana mwa dataro, mwa bevea be, “Tata, be gosav lai te dagai laha geki niniau vai votu be nai mwin aluna, nom doroniva n̄an vi tu.” 43Haḡe mwa mai mulei mwa ḡitara ram dol maturu, huri matara mwa bulu.
44Jisas mwa derainira, mwa mom bano mulei vatoluna, mwa dataro gin avoana mulei n̄an gea. 45Haḡe Jisas mwa dabagilu hurira roron̄tai, mwa bevea be, “Matu gimdol maturu i gimdol mambuharai radu? Gita, mahavana mwa mai be men lin̄iau Nitun Atatu vai la limara atat hantai. 46Gitol tomare ba tamen vano. Gita, wani be mwa lin̄iau mwa mai!”
Ram Haḡo Batugehi Jisas
(Mak 14.43-50; Luk 22.47-53; Jon 18.3-12)
47Jisas mwa avo radu batena be Judas, vwate ninira han̄vul domwan gairua mwa bisirai. Haḡe vatugin sinombu gaivua ram huria mai buan bwaloana i irubwi. Sinombu geki ira muai tataroi mai ira bwatmetua ata Judia ram horara. 48Wani gabe mwa lin̄ Jisas nu vev dovon̄ana lalai sinombu huba, mwa bevea be, “Wani gabe nav rimrimia, kea haḡea. Giv haḡo batugehia!”
49Haḡe Judas mwa mai darihou aben Jisas, mwa bevea be, “Bon̄ tavuha, Vagahi,” i mwa rimrimia.
50Jisas mwa bwaliua be, “Tua, goi vilvilehi huri ginau be gom mai huria!”
Haḡe kera ram mai, ram bwirihi Jisas, ram haḡo batugehia. 51Haḡe tuara vwate ninira be ran la mai Jisas mwa rav lua non buan bwaloana, mwa dai turin rovoga non Muai Tataroi, mwa dai kaburai bwerona. 52Take Jisas mwa bevea lalainia be, “Sogai mulei nom bua vai lol tan̄ana, bwatuna irahei ram haḡo bua rav mate gin bua. 53Matu gim hav iloe tehe be nav hudali dum Tamaḡu huri buluiana i kea vi hora darihou vatugi enjel han̄vul domwan gairua gi atatun bwaloana? 54Take be nav lolia kunia, si hav loliana te seserai dum na avoana mwa bevea alolon Ravrava Sabuga be mwa bevea be vi vora kunia.”
55La mahavana gea Jisas mwa bevea lalai sinombu be, “Matu giv mai huriau mai buan bwaloana i irubwi be gimen vwirihiau, kun gabe inau atatun wehi surai vwate? Vataha gubwen̄i nam dogo mai kimiu, nam bagahi lol Imwa Tataro, take gim hav haḡoau tehe. 56Take mwa loli kungeki be vi lol seserai avoana nora atatun vevsera be ran ravae.”
Haḡe ira roron̄tai duluai ram bis dagai ninia, ram romaragai.
Jisas mwa Du Lolmatan Nora Muai Kansel
(Mak 14.53-65; Luk 22.54-55,63-71; Jon 18.13-14,19-24)
57Haḡe kera gabe ran haḡo batugehi Jisas ram lagoinia vai lol imwan Kaiavas, Muai Tataroi. Aia be ira vagahin Silo matora bwatmetua ram ḡoḡo utegaituvwa abena. 58Pita mwa huri dagutagunai Jisas ban hautu vai lol saran Muai Tataroi. Haḡe mwa dalin̄oro, mwa do mahuri abera atatun bwaloana be vi gita nogonogoi hano be vi loli. 59Haḡe ira muai tataroi maira Kansel duluai ram hiḡe halana be rav tul tenteneana alun Jisas huri be rav lol bamatea. 60Take ram hav habwe te dum non vahalana, son̄o be kera ivusi ran tu i ran tul tenteneana aluna. Nogonana atatu gairua ramuru mai, 61ramuru bevea be, “Wani geki mwa bevea be, ‘Nav salan̄ai dum Ute sabuga non God i atagun gubwen̄ gaitolu nav lol huri muleinia.’ ”
62Haḡe Muai Tataroi mwa domare, mwa bevea lalai Jisas be, “Matu gosav vwaliu te ḡorora huri hano be ram dul bonogai vai alumwa?” 63Take Jisas mwa buhiga. Haḡe Muai Tataroi mwa mom bevea mulei lalainia gin avoan garagara be, “La ihan God rahu nam hudalinigo be goi vev mwasigi lalai kamai be giḡo Kraes, Nitun God sa sigai.”
64Jisas mwa bevea lalainia be, “Gom bevea haḡea. Ta nam bev mwasigi lalai kimiu be, nin kekadogaha giv gitau Nitun Atatu nav togo la mwatuan Mwasin Roron̄o, i nav mai alun ten lan̄i lol ute atamare.”
65Bwatuna gea Muai Tataroi mwa hera gaisagana hurin alen̄ara batena mwa ron̄ avoan hantai vai alun God, mwa bevea be, “Wani uhu mwa av hantai vai alun God. Tasav mom hiḡe te halana mulei. Gim ron̄oe sibomiu be mwa av hantai vai alun God. 66Gim binihi haninia?”
Haḡe ram bwaliua haragaituvwa be, “Nu dadariha be vi mate.”
67Haḡe ram lodov lolmatana, ram wehia, i kera gabe ram rabasia 68ram bevea be, “Visia, Kraes, be ihei mwa rabasigo!”
Pita mwa Dugu Jisas
(Mak 14.66-72; Luk 22.56-62; Jon 18.15-18,25-27)
69Pita mwa dogo radu avare lol aran imwa, batena daulato vwate atatun rovoga non Muai Tataroi mwa mai abena, mwa bevea be, “Giḡo mulei gon togo mai Jisas ata Kalili.”
70Take Pita mwa bisigai lol matara duluai, mwa bevea be, “Nam hav ilo te ginau gabe gim bevea.” 71Haḡe mwa lago vai votu gatavan aran imwa gea. Atatun rovoga vavine vwate mulei mwa ḡitae, mwa bevea lalainira ram do bul maia be, “Wani geki mulei nu togo mai Jisas ata Nasaret.”
72Take Pita mwa mom bisigai waswasigi mulei, mwa bevea be, “Nam len̄ai wani gea!”
73Tiri ḡalia kera gabe ram du aben Pita ram mai abena, ram bevea be, “Mwasigi haḡea, be giḡo tuara vwate ninira, huri be gom avo kunira ata Kalili.”
74Pita mwa dau bwatuna mwa av garagara be, “God na vevegiau be nam hav vev te mwasigi! Nam hav ilo te wani gea.”
Haḡe toa mwa dotoreto darihou, 75i Pita mwa binihi mulei avoana gabe Jisas nu vevea lalainia be, “Tao si hav totoreto te radu, gov tuguau vatolu.” Haḡe mwa bute avare, mwa dei mamaragai.
Trenutno odabrano:
Matiu 26: HNB
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible Society of the South Pacific
