Matiu 27
27
1Haḡe mwa ran mabon̄ gaituvwa, ira muai tataroi mai ira bwatmetua ram lol taritari be rav lol bamate Jisas kun hanigi. 2Haḡe ram haḡo batugehia, ram bauhia gin gao talai i ram lagoi dagainia, ram lin̄ia lalai Tomuai Vevev Paelat.
Mateanan Judas
(Lala 1.18-19)
3Judas, wani gabe nu lin̄ Jisas, mwa ḡitae be ram bevev bamatea, mwa binihileahi, mwa mai mulei mai vatlegiga matotobwai n̄avul gaitolu vai abera muai tataroi mai ira bwatmetua, 4mwa bevea be, “Nam buroga mwasigi, huri nam lin̄ atat vavtutu huri mateana.”
Haḡe ta ram bwaliua be, “Matu mwa bora nomai hanigi aluna? Kea mwa du alumwa sibomwa.”
5Haḡe Judas mwa bohai homu lol Imwa Tataro, mwa bwihavare i mwa bano, mwa ligo bamatea sibona.
6Haḡe ira muai tataroi ram hara ḡoḡo homu gea, ram bevea be, “Mwa hav tu tehe be tav tau muleinia lol tanon homu non Imwa Tataro bwatuna be volin daga.” 7Kunia ram bultai leora, ram bol udui tano gabe mwa uloinia be Tano non Wani gabe mwa lol laha tano, gi tanon tavtavigi huri ira tausala. 8Bwatuna gea ram hui tano gea be “Saran Daga” vai votu garigi.
9Ginau geki mwa lol seserai avoana non atatun vevsera Jeremaia gabe nu vevea be, “Ram lai vatlegiga matotobwai n̄avul gaitolu, tovtovon homu gabe ira Jius ran dame aluna huria, 10haḡe ram bol dagai tano ginia gabe mwa uloinia be Tano non Wani gabe mwa lol laha tano, kun gabe God Ratahigi nu tauleoiau huria.”
Jisas mwa Du La Lolmatan Paelat
(Mak 15.2-5; Luk 23.3-5; Jon 18.33-38)
11Haḡe Jisas mwa du la lolmatan Tomuai Vevev ata Rom. Haḡe kea mwa hudali Jisas be, “Giḡo mwasigi Ratahigi lavoa nora Jius?”
Ta Jisas mwa bwaliua be, “Gom bevea haḡea.” 12Kunia ira muai tataroi mai ira bwatmetua ram dul bonogai avoana ivusi vai aluna, take mwa hav vwaliura tehe gin n̄adun avoana gaituvwa.
13Haḡe Paelat mwa bevea lalainia be, “Kun hanigi? Gom hav ron̄ te ginau duluai uhu gabe ram dul bonogainira vai alumwa?”
14Take Jisas mwa hav vwaliu te nora avoana vwate. Bwatuna gea Tomuai Vevev mwa dan̄an̄a maragai ginia.
Ram Bevegi Jisas huri Mateana
(Mak 15.6-15; Luk 23.13-25; Jon 18.39–19.16)
15Lol vataha Samsamwaran Halbisḡalau Tomuai Vevev ata Rom mwa ribwes hohoigi atat vwate alolora atat vauvauhi gabe sinombu ram hudaligi huria. 16Lol mahavana gea atat vauhi vwate gabe sinombu ram ilo didininia, ihana be Jisas Barabas. 17Mahavana be sinombu ram ḡoḡo utegaituvwa, Paelat mwa hudalinira be, “Gim doron be nav ribwes ihei nin ira tarua uhu lalai kimiu, Jisas Barabas sage Jisas gabe mwa uloinia be Kraes?” 18Bwatuna mwa ilo didininia be ran lin̄ Jisas vai lol limana gin nora sine hantai.
19Haḡe batena be Paelat mwa dogo la tanon vevev, tasalana mwa hora vai abena, mwa bevea be, “Gosav lol te hano lalai atat vavtutu gea, bwatuna nan ron̄ mwahantai maragai kahabon̄i lol noḡu maturubore huria.”
20Haḡe ira muai tataroi mai ira bwatmetua ram suvwai sinombu be rav hudali Paelat be vi ribwes Barabas i vi lin̄ Jisas huri mateana. 21Take Tomuai Vevev mwa bwaliura be, “Gim doron be nav ribwes ihei ninira gairua uhu lalai kimiu?”
Haḡe kera duluai ram bwaliua be, “Barabas!”
22Haḡe Paelat mwa hudalinira be, “Matu nav lol hano lalai Jisas gabe mwa uloinia be Kraes?”
Haḡe kera duluai ram bevea haragaituvwa be, “Vohae vai alun volovolo!”
23Take Paelat mwa hudalinira be, “Matu nu lol hava ute hantai?”
Haḡe ram haharigi haragaituvwa gin silo gaivua be, “Vohae vai alun volovolo!”
24Mahavana be Paelat mwa ḡitae be si hav lol te dum hano, bwatuna mwa avo daligi maira i mwa bwaga limana la lolmatan sinombu i mwa bevea be, “Noḡu nu sigai alun mateanan wani uhu, ta nomiu mahaḡea!”
25Haḡe sinombu duluai ram bwaliua be, “Silo vevegi huri mateanana na to alumai mai ira nitumai!”
26Haḡe Paelat mwa ribwes Barabas lalainira i mwa bivilis Jisas vuvuri mwa mahin̄ainia be ramen vohae vai alun volovolo.
Ira Atatun Bwaloana Ram Lol Leilei Jisas
(Mak 15.16-20; Jon 19.2-3)
27Haḡe atatun bwaloana non Paelat ram lai Jisas vai lol aran imwan Tomuai Vevev i vatugigi duluai huri bwaloana ram ḡoḡo dalisia. 28Haḡe ram dagahi dagai gaisagana i ram sagae gin koti memea raraniga. 29Haḡe ram biri ḡauli gi gaisosorin bwatuna, vuvuri ram daua aluna i ram hagai ariu vwate mwa haḡoe la mwatuana, vuvuri ram hivbwaubwau ḡoroe, ram lol leleia, ram bevea be, “Iso, nora Ratahigi ata Jius!” 30Haḡe ram lodovia i ram lai lua ariu nin limana i ram dal bwatuna ginia. 31Batena ram lol leileia vuvuri, ram lai dagai koti gea i ram saga muleinia gin gaisagana, vuvuri ram lai dagainia huri be vi vohana alun volovolo.
Ram Boha Jisas Vai Alun Volovolo
(Mak 15.21-32; Luk 23.26-43; Jon 19.17-27)
32Mahavana be ira atatun bwaloana ram ban maia la hala, ram habwe ata Saerini vwate, ihana Saemon, i ram lolia be vi tatal volovolo non Jisas. 33Haḡe ram botui ute ram huia be Kolkota, binihiva huria be Tanon Bwatun Atatmate. 34Aia ram lai waen nu lol roiroiana mai hun gai vwate mwa huiana be vatan̄oga be men mwinua. Kea mwa damuhi ron̄ vuvuria, ta mwa barihai didi mwinua.
35Haḡe ram boha vuvuria alun volovolo, i ram hara gaisagana, ram bohai dais huri gaisagana be ihei vi lai hava gaisaga. 36Ataguna gea ram do ataa, ram matainia. 37La ulun bwatuna ran tau ravrava seserai huri tul bonogai vai aluna gabe mwa bevea be, “Geki Jisas Ratahigi Lavoa nora Jius.” 38I mulei ram boha bolvolo atat surasura gairua, vwate la mwatuana i vwate la mwairina.
39Haḡe sinombu gabe ram ḡao la hala ram daltali bwatura aluna, ram bev avoan hantai vai aluna, ram bevea be, 40“Gon vevea be gov salan̄ai Imwa Tataro, i atagun gubwen̄ gaitolu gov lol huri muleinia! Varahugo sibomwa uhu gaha, be giḡo mwasigi Nitun God! Hiv mahuri nin volovolo!”
41Kunia mulei ira muai tataroi maira vagahin Silo maira bwatmetua ram lol leileia, ram bevea be, 42“Nu varahu atat dodolua, ta kea sibona si hav varahu te dum muleinia. Matu be si vora kea nora Ratahigi lavoa ira Jius, si hiv mahuri nin volovolo uhu gaha be tamen binihimwasiginia! 43Be kea mwa butu alun God, nu tavuha be God vi varahua uhu gaha be mwa doronia mwasigi, bwatuna nu vevea be kea Nitun God.”
44Kunia mulei atat surasura gairua gabe ran vohara alun volovolo bul maia kera mulei ramuru av hantai vai alun Jisas.
Mateanan Jisas
(Mak 15.33-41; Luk 23.44-49; Jon 19.28-30)
45Haḡe abobon alo ute mwa metmeto ḡoro vanua duluai huri mahavan alo gaitolu. 46Haḡe kun alo gaitolu Jisas mwa haharigi amare, mwa bevea be, “Eli, Eli, lama sabaktani?” binihiva be, “Noḡu God, noḡu God, huri hano gom do dagara niniau?”
47Atatu rituai ran tu aia ram ron̄oe, ram bevea be, “Wani uhu mwa uloi Elaija.” 48Haḡe tuara vwate ninira mwa rovo darihou mai bwatlumute nu ruhua lol waen garagara nu sisian batugehi alun ariu, mwa hagai luae lalainia be men mwinua. 49Take kera rituai ram bevea be, “Tu huba, tan gitae be Elaija vi mai ba barahua!”
50Haḡe Jisas mwa haharigi mulei amare gin silo gaivua, vuvuri mwa maruruhi.
51Haḡe gavun gatavan imwa lol Imwa Tataro mwa mahera boravora tumu nu tau bwatuna amare vai votui ataa lol ureure. Sogai mwa ruru, vatutu ram datavaga, 52bwarura atatmate ram mahavan, i sinombu non God ivusi be ran mate ran tomare mulei vai lol rahuana. 53Haḡe ram lin̄ bwarura i atagun tomarean mulei non Jisas ram bano vai lol bwatutun vanua sabuga, i sinombu ivusi ram ḡitara.
54Batena tomuai ḡoro atatun bwaloana maira non atatu gabe ram ḡitaḡoro Jisas ram ron̄ sogai mai ginau duluai gabe ran loli, ram matagu, ram bevea be, “Mwasigi, wani uhu Nitun God!”
55Ira vavine ivusi ran tu aia hen hautu lol mahavan gea, ram du ram dalvun̄uinia. Ran mai nin Kalili, ran huri Jisas i ran buluia. 56Alolon vavine kera gea Mere ata Makdala, i Mere gabe ratahin Semes mai Joses, i ratahin ira nitun Sebedi gairua.
Ram Dau Jisas Lol Bwaru Malan̄a
(Mak 15.42-47; Luk 23.50-56; Jon 19.38-42)
57Batena ute mwa ravravi, ratahin homu vwate nin Arimatia mwa botu, ihana Josep, kea mulei roron̄tai non Jisas vwate. 58Kea mwa ban aben Paelat, mwa hudali rebehin Jisas ninia, i Paelat mwa dau avoana lalai ira atatun bwaloana be rav mahin̄ai rebehin Jisas lalainia. 59Haḡe Josep mwa lai rebehin Jisas, mwa nubwae lol gav gara 60i mwa daua lol malan̄ana gea gabe mwa siv taia lol vatu. Haḡe mwa datui vatu gaivua ḡoro matgatavan malan̄a, vuvuri mwa ban dagai. 61Mere ata Makdala mai Mere vwate raru togo aia, ramuru matai ḡoro malan̄a.
Ram Dau Gitaḡoro Ḡoro Malan̄a
62Haḡe lol gubwen̄ vwate atagun gubwen̄ gailimana, gabe gubwen̄ mambuharai, ira muai tataroi mai ira Varise ram ḡoḡo bul mai Paelat, 63i ram bevea be, “Ratahigi, gam binihi dumwia be atat tentene uhu lol gubwen̄ rahuna nu vevea be, ‘Nav tomare mulei vai lol rahuana atagun gubwen̄ gaitolu.’ 64Haḡe gov tau avoana be atatu rav gitaḡoro bwan̄on malan̄a vai votu gubwen̄ gaitolu, huri be non roron̄tai rasav van te dum be rav surai rebehina, i rav vevea lalai sinombu be nu tomare mulei nin mateana. Be kunia, nogonan tenteneana vi hantai liu nin muana.”
65Haḡe Paelat mwa bevea lalainira be, “Giv lai ira gitaḡoro ba ban ba matai didini bwaru.”
66Haḡe ram ban, ram lol wasi gatavan bwaru i ram dau dovon̄a alun vatun gatava, i ram dau ira gitaḡoro be rav matainia.
Trenutno odabrano:
Matiu 27: HNB
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible Society of the South Pacific
