Matiu 25
25
Avoan Dalogai huri Daulato Han̄vulu
1“La mahavana Ute Lavoa atamare vi kun geki. Vavin daulato han̄vulu ram lai nora bulu, ram bano be ramen gita atatu vwate be mwa siv lagi. 2Gailima alolora ran mataisaoga i gailima alolora kera bwaḡele. 3Kera gailima uhu gabe ran bwaḡelega ram lai nora bulu itake ram hav lai te buluin nora keresin. 4I kera gailima gabe ran mataisaoga ram lai botele ram hogon dautau nora keresin alolona i ram haḡora mai nora bulu. 5Atat lagi gea nu ravrava be vi mai, i kera duluai ram matabuluga i ram maturu.
6“Mwa ban abobon bon̄i, atatu vwate mwa ulo be, ‘Atat lagi mwa bisirai. Giv mai ba lai ḡoḡoe!’ 7Haḡe daulato han̄vulu kera gea ram domare, ram bagaha nora bulu. 8Haḡe kera gailima uhu gabe ran bwaḡelega ram bevea lalainira gailima be ran mataisaoga be, ‘Giv mahin̄ai udun nomiu keresin lalai kamai. Huri be nomai bulu ran bweu ram mate.’ 9Haḡe ira daulato mataisaoga ram bevea be, ‘Hagavi, si hav dumwi tehe. Nomai keresin nu hav dadariha tehe huri gida n̄oto. Nu tavuha be giv vano lol imwa tahehei, ba bol nomiu.’ 10Haḡe kera gailima gea be ram bwaḡelega ram bano lol sitoa huri nora keresin. La mahavana be ram bano, atat lagi mwa bisirai i mwa lai kera gailima gea gabe ran mataisaoga ram haroro bulu lol imwa, i gatava mwa ḡoro, i ram ḡan ginau maira lol lagiana gea.
11“Ataguna n̄an daulato bwaḡelega gailima ram bisirai. Ram ulo be, ‘Ratahigi, ratahigi! Havan̄ gatava lalai kamai!’ 12Itake atat lagi mwa bevea be, ‘Nam bev mwasigi be nam hav ilo te kimiu.’ ”
13Haḡe Jisas mwa bev nogonogoinia be, “Kimiu giv mamata, bwatuna be gim hav ilo te gubwen̄i mai mahavan alo be ginau kera geki rav loli alolona.
Avoan Dalogai huri Atatun Rovoga Gaitolu
(Luk 19.11-27)
14“La mahavana gea, Ute Lavoa atamare vi vora kun geki. Atatu vwate mwa sosori be men lin̄ vanuana huri lagoana. Mwa uloi ḡoḡo non Atatun rovoga i mwa daura be rav gitaḡoro non vataha ginau la mahavana be kea vi lago. 15Mwa daura hurin nora mataisao. Lalai vwate nu lai vatan̄oga vasan̄vul valima. Lalai dolua dola vasan̄vul varua i lalai gaitoluna dola vasan̄vul vatuvwa. Mwa lai vuvuri homu lalainira, mwa bano. 16Atatun rovoga be nu lai dola vasan̄vul valima mwa bano, mwa lol rovoga aluna, i mwa lai dola vasan̄vul valima mulei aluna. 17Kunia mulei atatun rovoga gabe nu lai dola vasan̄vul varua mwa bano mwa lol rovoga aluna i mwa lai dola vasan̄vul varua mulei aluna. 18Take atatun rovoga gabe nu lai dola vasan̄vul vatuvwa mwa bano mwa ḡel lulu lol tano i mwa dahuli homu duluai gea alolona.
19“Atagun mahavan n̄ava ratahigi nora atatun rovoga kera gea mwa dabagilu mulei, mwa hiḡehiḡe huri halan homu be nu lai lalainira. 20Atatun rovoga be nu lai dola vasan̄vul valima mwa haroro mai dola vasan̄vul valima mulei, mwa bevea lalai non ratahigi be, ‘Gon lai lalaiau dola vasan̄vul valima. Gitae, nan mom lai mulei dola vasan̄vul valima amare aluna.’ 21Haḡe non ratahigi mwa bevea be, ‘O, nu tavuha maragai! Giḡo atatun rovoga tavuha i binihi marahi! Bwatuna be ginau kolo n̄an gom ḡitaḡoro tavuhainia, kadogaha nav taugo gov gitaḡoro ginau gaivua. Mai teti ba samsamwara bul maiau.’
22“Haḡe atatun rovoga gabe nu lai dola vasan̄vul varua mwa haroro, mwa bevea be, ‘Ratahigi, gon lai lalaiau dola vasan̄vul varua. Gitae, nan mom lai mulei dola vasan̄vul varua amare aluna.’ 23Haḡe non ratahigi mwa bevea be, ‘O, nu tavuha maragai! Giḡo atatun rovoga tavuha i binihi marahi! Bwatuna be ginau kolo n̄an gom ḡitaḡoro tavuhainia, kadogaha nav taugo gov gitaḡoro ginau gaivua. Mai teti ba samsamwara bul maiau.’
24“Haḡe atatun rovoga gabe nu lai dola vasan̄vul vatuvwa mwa haroro, mwa bevea be, ‘Ratahigi, nan iloe be giḡo uhu atat wasi maragai, bwatuna be gom lalai gam ginau lol ute loloara, gabe barabe gon lol rovogana, i gom lai vwae gai alun gai gabe gon hav rivua tehe. 25Bwatuna higea nan mataguinigo, i nam bano nam dahuli nom mwane mwa dogo lol tano. Ia gitae, geki nom mwane mulei nam lai muleinia.’
26“Haḡe non ratahigi mwa bevea lalainia be, ‘O, giḡo atatun rovoga hantai i bwatiḡoru! Gom iloe huba be inau nam lalai gaku ginau lol ute loloara gabe barabe nan lol rovogana, i nam ḡan vwae gai gabe barabe nan rivua. 27Huri hano be gom hav tau te noḡu mwane lol ban̄? Huri be gos lolia kunia, la mahavana be nas tabagilu mulei, nas lai mulei noḡu homu i uduna be ban̄ si laia amare aluna. 28Giv lai lua mwane gea ninia, i giv laia lalainia gabe mwa haḡo dola vasan̄vul vahan̄vul. 29Huri be kera gabe nora ginau abena huba, God vi lai mulei ginau rituai lalainira liu ninia be nu dadariha hurira. Ta kera gabe nora ginau sigai, be si vora nora ginau kolo abena, God vi lai dagainia ninira. 30Huri atatun rovoga bwaḡelega uhu, giv vohainia avare lol ute meto. Aia vi goea i vi gan livona.
Gubwen̄i Gabe Nitun Atatu vi Vevegi Atatu Duluai Alolona
31“La mahavana be inau Nitun Atatu nav mai mulei kun gabe Ratahigi Lavoa maira enjel duluai bul maiau, inau nav togo alun tanon togotogon lavoa, 32i sinombu duluai la ureure rav ḡoḡo abeku. Haḡe nav hara bovorara vai lol tatan̄an gairua, kunia gabe atatun radaiḡoro sipsip ram hara bora sipsip mai nani. 33I nav tau sipsip rav tu la mwatuaku i nani rav tu la mwairiku. 34Haḡe inau siboku Ratahigi Lavoa nai vevea lalainira la mwatuaku be, ‘Gin mai, na kimiu gabe Tamaḡu nu vatavuhai kimiu. Gin mai ba lai rahuan gara gabe Tamaḡu nu lol vatuvwainia huri kimiu la bwatun tauva. 35Huri be batena be maro nu gasiau, gin lai ginaganiana lalaiau. Nan mandou, gin lai wai lalaiau. Nan lago gi tausala, gin lai ḡoḡoau vai lol imwamiu. 36Nan la vuroi, gin saga ḡoroau. Nan haro, gin gitaḡoroau. Nan togo lol imwa vauvauhi, gin mai gin siroau.’
37“Haḡe kera atat vavtutu uhu rai vwaliuau be, ‘Ratahigi, la mahavana behe be gan gitago be maro nu gasigo i gan lai ginaganiana lalainigo, sa gon mandou i gan lai wai lalainigo, 38sa gan habwego gi tausala i gan laiḡoḡogo vai lol imwamai, sa gon la vuroi i gan saga ḡorogo, 39sa gon haro sa gon togo lol imwa vauvauhi i gan sirogo?’ 40Haḡe inau Ratahigi Lavoa nai vwaliura be, ‘Nam bev mwasigi lalai kimiu be, gin lolia kunia lalai tuaku vwate gabe tirigi ninira tuaku duluai, kun gabe gin lolia lalaiau siboku.’
41“Vuvuri nai vevea lalainira la mwairiku be, ‘Giv vis dagai niniau! Silo vevegi non God mwa dogo alumiu huba. Giv vano vai lol gabin ron̄ḡagarasi gabe si hav mate te dum, gabi gea gabe nu lol dautauana huri Setan mai non enjel duluai. 42Bwatuna be maro nu gasiau ita gin hav lai te ginaganiana lalaiau. Nan mandou ita gin hav lai te wai lalaiau. 43Nan lago gi tausala ita gin hav lai te ḡoḡoau vai lol imwamiu. Nan la vuroi ita gin hav saga te ḡoroau. Nan haro i nan togo lol imwa vauvauhi ita gin hav mai tehe be gimen gita ḡoroau.’
44“Haḡe kera gea rai vwaliuau be, ‘Ratahigi, la mahavana behe be gan gitago be maro nu gasigo, sage gon mandou, sage gon lago gi tausala, sage gon la vuroi, sage gon haro, sage gon togo lol imwa vauvauhi, i gam hav buluigo tehe?’ 45Haḡe inau Ratahigi Lavoa nai vwaliu muleinira be, ‘Nam bev mwasigi lalai kimiu be, gin hav lolia te kunia lalai tuaku vwate gabe tirigi ninira tuaku duluai, kun gabe gin hav lolia tehe lalaiau siboku.’ 46Haḡe kera duluai gea rai vano lol silo vevegi gabe si hav nogo te dum, i kera atat vavtutu rai vano lol rahuana vai tuai.”
Trenutno odabrano:
Matiu 25: HNB
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible Society of the South Pacific
