LUKE 6
6
Tabamnai Lamga Maniubo
(Mt 12.1-8; Mk 2.23-28)
1 #
Taj 23.25. Tabamnai khatga Jesu niu chamiu luzamga tadron wang-e. Siga pakhommaidung siniu chamiubui marut lujiu paliu bendi gasu manui lujiu tiu sude. 2Pharisee maidung khangsianiu maniu-e, “Aliugu Tacheng-tajai ganiu kambo suimakge chiubo dekamjiu naliuniu kamjiulo?”
3 #
1 Sa 21.1-6. Jesu niu paliu khuga paokakge, “David niu pah khatdi pamaidung mariu mibo tingga degu kammilo chiubo naliuniu kentao mak jiuma? 4#Lev 24.9.Paniu Charakygase ngut lujiu, Tingwang khuga kadkhai mibo taruakse lulujiu tiumibo-e, khatdi pamaidung lengdi pikhai mibo-e. Sise aliugu Tacheng-tajai gasu singkudung siniu tiurabo sangnu, mai khatniudi tiusui makbo taruakge.”
5Sichiujiu Jesu niu munkomjiu din-e, “Chamai Nahpiu haise Tabamnai gu Rapiu-e.”
Paben Khat Lam Kashaibo piu
(Mt 12.9-14; Mk 3.1-6)
6Tabamnai khatga Jesu niu maduiky khatga meng katikhaijiu bamme. Siga paben majadlam kashaibo piu khat bamme. 7Tacheng-taijaigu katipaodung nai Pharisee maidung khangsianiu Jesu tu kammao khai nibo donniu, Tabamnai kamsui makbo ngamse kamsai chiujiu paliuniu patu phuijiu bamme. 8Sichiudi Jesu niu paliu maningse silujiu sinapiu khuga din-e, “Chapsulo khatdi hailam suanglam wanglo.” Siga sinapiu siniu sulujiu chap khangde. 9Sichiujiu Jesu niu paliu khuga din-e, “Iniu naliu khuga maniubo-e: aliugu Tacheng-tajainiu Tabamnai nde kamra suikhailo? Maitu nkha rama, maksai kam masa ralo? Maitu juringkhai rama, maksai kam maha ralo?” 10Paniu mai hinatu phui ajan lujiu, sibo piu khuga din-e, “Naben ntha padlo.” Sichiujiu paniu ntha padboga, pabense wilan mide.
11Siga paliu lung pomchang pom mide, sichiujiu paliuniu Jesu tu degu kamralo chiubo paliu ronna makhiam thiusude.
Jesu Niu Khommai Kariu-Je-Niakiutu Kadabo
(Mt 10.1-4; Mk 3.13-19)
12Sibo wan-ga Jesu niu luongbut khatga kahumra khanglujiu nchunse Tingwang khuga khengsang-e. 13Tingben padboga, paniu pakhommaidung leng khang kariu-je-niakiutu kada khaide, paliu zandungse: 14Simon (paniu Peter chiu kukhaibo) khatdi pasai kariupiu Andrew; Jacob khatdi John, Philip khatdi Bartholomew, 15Matthew khatdi Thomas, Alphaeus nahpiu Jacob, khatdi Simon (Lungthiubo chiujiu kukhaibo); 16Jacob nahpiu Judas khatdi patu jonbo piu Judas Iscariot.
Jesu Niu Katikhaibo Khatdi Wikhaibo
(Mt 4.23-25)
17Jesu niu luongbut gasu pakhommaidung situ maluang lujiu kiuboga, paniu maidung kakeng khattu paning khatga maluang chap bamme. Siga Judaea lamsu, Jerusalem lamsu khatdi Tyre nai Sidon gu namdi lamsu chiujiu maidung kengkha wang bamme. 18Paniu katikhaibo nkingra khatdi paliu rapotdungse pi wikhaira wangbambo-e. Rasaniu kam chariujiu bammaidungdi wangjiu paliutu wikhai bide. 19Mai hinaniu patu niatao khaira matan bamme, palamra pakhu gasu pumtan padjiu paliu mathiutu wikhai bide.
Sanwibo Nai Sansabo
(Mt 5.1-12)
20Jesu niu pakhommaidung situ phui ajanlujiu din-e,
“Lung kalakmai naliu hai sanwi-e;
palamra Tingwang gu chawangdihse naliu gu-e!
21“Tuhoi mariujiu bammai naliu sanwi-e, palamra naliutu magiukhai rabo-e!
“Tuhoi kapjiu bammai naliu sanwi-e; palamra naliu nuisu rabo-e!
22 #
1 Pe 4.14. “Chamai Nahpiu donniu naliutu maidungniu manihjiu, lukhai maksai, kam mangam khaisai, khatdi naliu kasamai-e chiu dinsai naliu sanwi-e! 23#2 Char 36.16; Tk 7.52.Sichiusai chunwijiu chalen lenlulo, palamra tinggen lam naliuleng tathuon kadibo bamme. Palamra phaimiukakung maidung khugadi paliu paopeh maidungniu sikumjiu kamkhai mibo-e.
24“Chiudi tuhoi kalekwi maidung dejiuga naliu sansalo;
naliu amansaijiu lungkhai mibo-e!
25“Tuhoi magiujiu bammai dejiuga naliu sansalo, palamra naliu mariujiu tadrabo-e!
“Tuhoi nuijiu bammai dejiuga naliu sansalo; palamra naliu kap-kiamjiu tadrabo-e!
26“Maidungniu din thuonjiu bammai naliura dejiuga sansalo; aratbo phaimiukakungdung situ paliu pao-peh maidungniu sichiu dinkhai kamigu-e.
Mikre Maitu Lungsabo
(Mt 5.38-48; 7.12)
27“Chiudi alad nkingjiu bammai naliu khuga Iniu dinbo-e: Naliuniu mikremaidungtu lungsalo, naliutu mareng maileng kawi kam khailo, 28naliutu siangbo maitu thoikhai bilo, naliutu kam masa khaibo maileng kakheng thiu khailo. 29Mai khatniu nabiang khatlam kaphi khaisai, khatlamdi pijiu kaphi khailo; mai khatniu na-ntiang lenbose khoilu sai nungbo ntiang sidi pikhai bilo. 30Nakhuga kheng mai hinaleng wakhatra pikhai bilo, khatdi mai khatniu nagu khoilusai, sise khenglan mane. 31#Mt 7.12.Naliu khuga pi kamkhai nibo kumjiu, maidung lengdi kamkhai bilo.”
32“Naliutu lungsa maitu ronna lungsasai, dechiujiu naliuniu thoidam daoralo? Nuan phungmai niudi paliutu lungsa maitu lungsajiu bambo-e! 33Khatdi naliuleng kawi kamkhai maileng ronna kawi kamkhai sai, naliuniu dechiujiu thoidam daoralo? Nuan phungmaidung niudi sichiujiu bambo-e! 34Khatdi naliuleng daolan lune chiujiu malummaitu ronna apuk khai sai, naliuniu dechiujiu thoidamse daoralo? Nuan phungmaidung karai niudi nuan phungmaitu apuk khaijiu paliugu daolan lu-e! 35Sichiu makjiu, naliu mikremaidung situ lungsa silo khatdi paliuleng kawi kamkhai bilo; daolanra maningson makjiu apuk khai bilo, sichiusai kadibo tathuonse naliuleng bamme, khatdi Kukachangbo Tingwang nahdung naliu thiurabo-e. Palamra paniu thuonkiu simakmai nai kasamaileng kawibo pikhai-e. 36Naliu Piu lungsa sibo kumjiu naliudi lungsa silo.”
Maidungtu Ladjan Thiubo
(Mt 7.1-5)
37“Maidungtu ladjan thiu mane, sichiusai Tingwang niu naliutu ladjan thiulakge; maidungtu din masa mane, sichiusai Tingwang niu naliutu din masa lakge; maidungtu kuak khailo, sichiusai Tingwang niu naliutu kuak khai bine. 38Maidungtu pikhailo, sichiusai Tingwang niu naliuleng pikhai bine. Pachangjiu, kamajaobo madadse naliuniu daolune; naliuniu phungtad ngamdiu then, lungsa sibo nkhase naliutu pikhai bine. Naliuniu maidungleng madadbo kumjiu Tingwang niu naliuleng madad khai bine.”
39 #
Mt 15.14. Sichiujiu Jesu niu paliu khuga din champanbo thiujiu din-e: “Pamik tiatbo khatniu pamik tiatbo khattu jukhai silakge. Panai ajusai, khangniase chakhomga nkhuang khai rabo-e. 40#Mt 10.24,25; Jn 13.16; 15.20.Ariaknah khatniu pagu katipao suang dimakge, chiudi paniu patiense loilu dasai, pagu katipao kummi rabo-e.”
41“Dekamjiu namikga karalik bamlujiu, nasingna mikga karamud situ phuibam jiulo? 42Dechiujiu namikga karalik bamlujiu, nasingna khuga ‘Singna yo, namikga bambo karamudse Iniu lupad bine chiu dinjiulo?’ Wasao kathiubo nang! Raijiu namikga karalik bambose lupad milo, sibo sainiu nasingna mikga bambo karamoise lupadra ngao masan rabo-e.”
Singbang Nai Parasy
(Mt 7.16-20; 12.33-35)
43“Kawibo bang siniu kasabo rasy masi makge, maksai kasabo bang siniu kawibo rasy masi pajai makge.” 44#Mt 12.33.Singbang hinatu parasy masibo gasu si-e; naliuniu ndutbang gasu tathusy raimakge, maksai mumsiken gasu thurengsy raimakge. 45#Mt 12.34.Kawibo mai siniu palungchun gasu kawibo lungchunse phungpadle; khatdi kasabo mai siniu palungchun gasu kasabo lungchunse phungpadle. Palamra palungchun ga phuibambose pamunniu dinpadbo-e.
Chaky Thiubopiu Khangnia
(Mt 7.24-27)
46“Iniu kadinbo naliuniu kammak lujiu, dekamjiu naliuniu atu ‘Rapiu, Rapiu’ kubam jiulo? 47Mai khatniu akhuga wangjiu acham nking lujiu sise majailubo maise dekumbo mailo chiubo Iniu naliu khuga lenkhai bine. 48Sinapiu sira tutong riga katiangkhun chulujiu chaky thiubo piu kumbo-e. Tadui diwangjiu situ naibamdi, sise thiu mawikhai mibo donniu sise malai makge. 49Chiudi mai khatniu acham chiulujiu majai makbo mai sira, pamen habo ky kathiubo piu kumbo-e; sise tadui diwang dasai kaonuangmi rabo-e khatdi sise pakao sarabo-e!”
वर्तमान में चयनित:
LUKE 6: LIANBSI
हाइलाइट
शेयर
कॉपी
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
