LUKE 5
5
Jesu Niu Kuraibo Khommaidung
(Mt 4.18-22; Mk 1.16-20)
1 #
Mt 13.1,2; Mk 3.9,10; 4.1. Naikhat Jesu niu Gennesaret ajai mungga chap bamboga, maidung siniu pakhuga Tingwang chamse nkingra ahi karenjiu bamme. 2Ajai kunglamse aliam nia khinkhai bambo paniu ngaode. Siga chakha minmai siniu paliu aliamse phutkhai lujiu, paliu alang kam masanjiu bamme. 3Jesu niu Simon gu aliam lung gase ngutlujiu singgiu chaphu gasu poinaga tai ngutra din-e. Sichiujiu Jesu niu aliam lung gase ntaolujiu maidung situ katikhai sude.
4Paniu katikhai loi lubo saiga, paniu Simon khuga din-e, “Aliam hai tadui kasukbo jamga tai ngutlujiu nanaigu alangse thonkhailo.”
5 #
Jn 21.3. Simon niu paokakge, “Katipao yo, aliuniu nchunse thonsang mibo-e, siga wadi kamlu makge. Chiudi nangniu dinbo saisuijiu Iniu thonkhaine.” 6#Jn 21.6.Paliuniu thonkhai gapboga chakha kengga thonpadjiu alangse kekra kum mide. 7Sijengniu, paliu maluangmai kakibo aliamga bammai situ paliuniu benjiajiu wang paliutu nkha khaira kukhaide. Siga paliu wangde chiudi paliu aliam sidi phuimijiu, paliudi malim mira kum mide. 8Degu padbamlo chiubo Simon Peter niu siluboga Jesu masuangga khudung kiujiu haichiu din-e, “Rapiu, akhu gasu tadmilo, Ira nuan phungmai-e.”
9Paliuniu chakha kengga thonlubo jengniu paliu mathiu suang hamide. 10Sikumjiu Simon kahmaidung Zebedee nahpiu kania Jacob nai John sidi panai suang hamide. Chiudi Jesu niu Simon khuga din-e, “Ping mane, tuhoi gasu naliu hai chamai minmai thiumi rabo-e.”
11Sichiujiu paliuniu paliugu aliamdung khatdi paliugu mania hinase singgiu chaphuga khaidiak lujiu Jesu sai suitad mide.
Jesu Niu Mai Khattu Wikhaibo
(Mt 8.1-4; Mk 1.40-45)
12Jesu niu namdi khatga wangboga ka-nphenbo piu khat bamniu-e. Paniu Jesu tu ngaoboga, makhum kiujiu kheng-e, “Paohubo yo! Nangniu nachun-e sai, atu masan khaira#5.12: ka-nphenbo: haitu taniabo rapotle chiujiu lukhaibo-e. ngamme!”
13Jesu niu paben henpadjiu patu dikhaijiu din-e, “Iniu achun-e, wimi sulo!” Sibo wan siakga sibopiu rapotse winuang mide. 14#Lev 14.1-32.Sichiujiu Jesu niu patu chamtan pijiu din-e, “Mai khat khugadi din mane, chiudi singku khuga tadlujiu natu pijiu phui khailo; sichiujiu Mose niu dinbo kumjiu charathiu khaijiu mai hinaniu nang wimide chiubo pisi khaimi sulo.”
15Sichiudi Jesu kense mai hinaniu sidiang-diang mide, khatdi mai hinaniu pakhuga wangjiu pacham nkingra khatdi pakhu gasu paliu rapotdung wikhaira wang karen sude. 16Sichiudi mai habo bamlam para kakheng thiura tadmi mi-e.
Jesu Niu Papumphan Kashaibo Piutu Wikhaibo
(Mt 9.1-8; Mk 2.1-12)
17Naikhat Jesu niu katikhaijiu bamboga Galilee, Judaea khatdi Jerusalem namdi hina gasu Pharisee maidung nai Tacheng-tajaigu katipaodungdi wangjiu ntao bamme. Jesu khuga mara-sathiu maidungtu wikhaira Tingwang gu pumtan bamme. 18Siga maidung khangsianiu papumphan kashaibo piu khattu pazi ganiu ponwangjiu Jesu niu bambo ky lung gase, pasuangga khaira matan sude. 19Sichiudi chamai kengju mibo donniu paliuniu patu pon ngutra kamdao lakmide. Sijengniu paliuniu chaky rilam ponkhang lujiu chaky npomse ranput lujiu pazi gasu Jesu masuangga ponkiu sude. 20Jesu niu paliu malumse dejiuga dilo chiubo ngaolujiu, paniu sibopiu khuga din-e, “akabo yo, na-nuanse kuakkhai mide.”
21Siga Tacheng-tajaigu katipaodung nai Pharisee maidung siniu paliu ronna din sude, “Haichiujiu Tingwang tu wajeng simakjiu dinbambo mai hai saolo? Tingwang ronna nuan kuak khai ngambo-e!”
22Jesu niu paliu maning silujiu, paliu khuga din-e, “Naliuniu dekamjiu sichiu maning bamjiulo? 23‘Na-nuanse kuak khai mide,’ chiubo nai ‘Buangsu lujiu tadsulo,’ chiu dinbo desiniu malalo? 24Chamai Nahpiu siniu kadihpiriga nuan kuak khaira pumtan bamme chiubo Iniu naliu khuga masanjiu dinlen bine.” Sichiujiu paniu papumphan kashaibo piu khuga din-e, “Iniu nakhuga dinbo-e, sulo, nazise ponlujiu naky lam wangsulo!”
25Paliu mathiu masuang gasu, sibo piuse sulujiu, pazi ponlujiu, Tingwang tu thuonjiu paky lam wangmide. 26Siga paliu mathiuse paliu suang hamide! Sichiujiu kapingbo siniu phuilujiu, Tingwang tu thuonjiu din-e, “Thainai aliuniu ngaolubo hai maisuang kahabo-e!”
Jesu Niu Levi Tu Kubo
(Mt 9.9-13; Mk 2.13-17)
27Haibo sai, Jesu niu tadpadboga ramkha khabo pazanniu Levi kubo piuniu pagu chakamkyga ntao bam niubo ngaolujiu, Jesu niu pakhuga din-e, “Asai suilulo.” 28Levi niu sulujiu, pagu hina phutlujiu, pasai suilu tadmide.
29Sigasu Levi niu pakyga (kasia gara Jesu kyga chiu din-e) Jesu tu maluang katiu tiude, khatdi sibo giangdung ruangga ramkha khamai kengkha bamme, khatdi katam-tam maidungdi bamme. 30#Lk 15.1,2.Paliu ruangga bambo Pharisee maidung khangsia nai Tacheng-tajaigu katipaodung khangsia siniu Jesu pakhommaidung khuga haichiu dinsude, “Naliuniu dekamjiu ramkha khamaidung nai nuan phungmaidungtu maluang-tiu, maluang-sak jiulo?”
31Jesu niu paliutu paokakge, “Papum kawimai lengra phaimiu pageng ha-e, chiudi mara-sathiu maileng-e. 32Kawimaidungtu kura I wangbo makge, chiudi nuan phungmaidungtu kura wangbo-e.”
Kalum Ribo Lamga Maniubo
(Mt 9.14-17; Mk 2.18-22)
33Maidung khangsianiu Jesu khuga din-e, “John pakhommaidungra kalum rijiu kahum humme, khatdi Pharisee maidungdi sichiu-e, chiudi nakhommaidung sira tiudi tiu-e, sakdi sakge.”
34Jesu niu paokakge, “Naopaopiuniu pagiang maidungtu maluang bamboga, katiu makimjiu bamraleng maningjiu ma? Pachangjiu chiumakge! 35Sichiudi naopaopiu situ puitad mibo nai wangsune, sichiu dasai paliu kalum risu rabo-e.”
36Jesu niu paliu khuga din champanbo thiujiu dinsude: “Mai khatniudi kasanbo ntiangse phetlujiu kaguangbo ntiangga khopkhai makge. Paniu kasanbo ntiangse phetlujiu kaguangbo gase khopkhai sai, sise wadaodi macham lakge. 37Maksai mai khatniudi kasanbo mumjawse kaguangbo mumjaw bungga khai makge, palamra kasanbo mumjaw siniu chamigibungse puakpang padjiu, mumjaw sidi chamigibung sidi hami rabo-e. 38Sibosung, kasanbo mumjawse kasanbo mumjaw lah gase khai rabo-e! 39Khatdi kaguangbo mumjaw saklubo saiga kasanbo mumjaw sakni makbo-e. Palamra “Kaguangbo siniu sakwi nkiu-e” chiujiu naliuniu dinbo-e.
वर्तमान में चयनित:
LUKE 5: LIANBSI
हाइलाइट
शेयर
कॉपी
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
