LUKE 7
7
Jesu Niu Rommai Chakampao Vangpiu Khattu Wikhaibo
(Mt 8.5-13)
1Jesu niu haidungse maidung khuga dinkhai lubo sai, Capernaum lam tadmide. 2Rommai chakampao khatgu vangpiu paniu lungsabo piuse mara matanjiu shaira kum bamme. 3Sibo chakampao siniu Jesu racham hai chiuboga, Jesu niu wangjiu pavangpiu situ wikhaira, Jehudimai katingmai khangsiatu langkhaide. 4Paliuniu Jesu khuga wanglu matanjiu dinsude, “Hainapiutu nangniu nkhabui siakge. 5Palamra paniu aliutu lungsa-e, sichiujiu paniu aliuleng maduiky khat thiukhai bibo-e.”
6Siga Jesu niu paliu saisui lujiu tadsude. Pakyga wang manasuboga, chakampao siniu pakahmaidungtu langkhaijiu pakhuga din-e, “Paohubo, nang chariukhai tulo. Akumbo kyga nang wangra akaji makge, 7maksai apumsiak niudi nakhuga mengra buimakge. Chamtanse pikhaigap talo, chiusai avangpiuse wimi rabo-e. 8Delosai asuang pumtan bammai, chakampaodung hangga Idi bambo-e, sichiujiu ahang gadi riphendung bamme. Iniu khattu ‘Tadlo!’ chiuboga pah tadmi-e; Iniu khattu ‘Wanglo,’ chiuboga pah wang-e; khatdi Iniu avangmai khattu chamtan pijiu, ‘Haise kamlo!’ chiusai paniu sise kamme!”
9Jesu niu haise chiuluboga pasuang hamide; khatdi pasai suikin maidung khulam mariwang lujiu paniu din-e, “Iniu haikumbo malum hai Israel mai ruanggadi daomakge!”
10Sichiujiu walang tadmaidung siniu chakampao kyga malanwang lanboga pavangpiuse wimi bamniu-e.
Jesu Niu Kamipui Nah Khattu Kam Maring Khaibo
11Sibosai siak, Jesu niu Nain kubo namdi gasu, pakhommaidung khatdi chamai mendi khattu maluang lujiu wangde. 12Paniu sibo namdi rengmun-ga wangtang gapboga, kashai ponpad maitu adao-e. Kashaibo piuse kamipui nahpiu khatnaga bambo-e, sichiujiu sibo namdakga maidung siniu patu maluang kin-e. 13Rapiu niu patu ngaoboga, lungsaboniu phuimide, sichiujiu paniu pakhuga din-e, “Kap talo.” 14Sichiujiu paniu tadpat tatingse dikhaiboga, tating ponkin maise chap mide. Jesu niu din-e, “Akhangpiu yo! Iniu nakhuga dinbo-e, buangsu milo!” 15Siga kashaibo piuse sumide, khatdi npao sumide, siga Jesu niu patu papui khuga pikhai mide.
16Siga paliu mathiu pingboniu phuimide, khatdi Tingwang tu thuon sude. Paliuniu din-e, “Aliu ruangga Phaimiukakung khattu lenkhaijiu, Tingwang niu pamaitu rankhaira wang bamme!”
17Haichiujiu Jesu kendi hai Judea ram pakhiangna khatdi sibo luongriangga bambo nam hinaga chiukam mide.
John Baptist Khugasu Ladlangtad Maidung
(Mt 11.2-19)
18John pakhommaidung siniu haibo chamdung hai pakhuga dinboga, paniu pakhommai khangniatu kulujiu, 19Rapiu khuga langkhaijiu maniu-e, “John niu wangkinne chiu dinbose nang dama, maksai aliuniu mai kakimaitu khuanralo?”
20Paliuniu Jesu khuga wangboga paliuniu din-e, “John Baptist niu aliutu langkhaibo-e, paniu wangkinne chiu dinbose nangma, maksai aliuniu mai kakimaitu khuanralo?”
21Sibo wan-ga Jesu niu mara-sathiumai rapotdung, rasa phungmaidung, khatdi pamik tiat maidungtu wikhai bide. 22#Isa 35.5,6;Isa 61.1.Paniu John ladlangtad maidungtu paokakge, “Malanwang sulo, khatdi naliuniu ngaomibo nai chiumibo haise John khuga dinkhai bilo: Pamik tiat mainiu ngao ngamme, pangen tangmainiu tadlan ngamme, ka-nphenmaitu wikhai bi-e, pakuon katidmai chiu ngam bamme kashaimaitu piringsu khai-e, khatdi kawicham hai lung kalakmai khuga dinron khai-e. 23Atu maning masamak maise dejiukha pasan wiralo!”
24John ladlangtadmai wangmibo saiga, Jesu niu palamga maidung khuga dinsude: “Naliuniu ramjingga John khuga tadboga degu ngaora maning jiulo? Chapiuniutu tingkainiu hun malai bambo tuma? 25Naliuniu degu phuira tadjiulo? Papuan katam khaibo piu tuma? Sikumbo kata-tambo pon piumai sira chawangky ningga lung bamme! 26Akhuga dinkhailo, naliuniu degu phuira tadjiulo? Phaimiukakung tuma? Yo, pachangjiu naliuniu phaimiukakung suang monbo situ ngao-e. 27#Mal 3.1.Palamra John haise Masanbo ariakniu dinkhaibo khat si-e: ‘Tingwang niu din-e, namasuangga Iniu agu ladlangtad maitu langkhaijiu naleng npui kadenkhai rabo-e.’ 28Jesu niu dinkiu lan-e, “Iniu naliu khuga dinbo-e, John haise lungkhai mibo chamaina rong gasu dithubo-e, chiudi Tingwang gu Chawangdih gara siamthubo piudi John suang di-nkiu rabo-e.”
29 #
Mt 21.32; Lk 3.12. Mai hina pachamse chiulude; khatdi nkiujiu ramkha khamaidung situ John niu tadui nphum khaijiu Tingwang niu machunbose majai bamme. 30Chiudi Pharisee maidung nai Tacheng-tajaigu katipaodungra John niu tadui nphum khaibo situ lukhai makjiu khatdi Tingwang niu machunbo lukhai makbo maidung-e.
31Jesu niu dinlan-e, “Iniu tuhoi lungbammai haitu dechiujiu din kada khai ralo? Paliu haitu ndeniu pon kada khai ralo? 32Paliu hai senkiga ntao bambo nahmaidung kumbo-e. Mai khatniu mai khat khuga din-e, ‘Aliuniu tanao aruangbo lui thiu-e, chiudi naliu chalen lenkhai makge! Aliuniu kashai baibo lui thiu-e, chiudi naliuniu kapkhai makge!’ 33John Baptist niu tiumakge, khatdi sakmakge, siga naliuniu din-e, ‘Pakhuga rasa bamme!’ 34Siga Chamai Nahpiu siniu wangjiu tiu-e, khatdi sakge, siga naliuniu din-e, ‘Hainapiu haitu phuilo! Pahai patiuni sa-e, khatdi pasakni sa-e, sichiujiu ramkha khamai khatdi nuan phungmaigu chaka-e!’” 35Sichiudi Tingwang gu ningting sira lukhaimai hina khuga majibo-e.”
Jesu Niu Pharisee Maipiu Simon kyga
36Pharisee maipiu khatniu Jesu tu katiu tiura kujiu, Jesu niu pakyga wangjiu tiura ntao kiude. 37#Mt 26.7; Mk 14.3; Jn 12.3.Sibo namdiga nuan phungbo pui khat bamme. Paniu sibo Pharisee maipiu kyga Jesu wang bamme chiubo chiuboga, paniu parimwibo wasa khoilujiu wangde. 38Sichiujiu Jesu saiga chaplujiu, kapjiu pamatui siniu pangen-ga majaokiujiu kam matim khaide, khatdi patham siniu manuk masang khaijiu, kapup khaide, khatdi parimwibo wasase manuk khai sude. 39Haise Pharisee maipiu siniu ngaoluboga, paniu haichiu din-e, “Haina piu haise pachangsiakjiu phaimiukakung khatle sai, patu thinbambo pui haise saolo chiubo silubui-e; sichiujiu pahai nuan phungbo pui-e chiubo paniu sirabo-e!”
40Jesu niu pakhuga haichiu dinsude, “Simon, Iniu nakhuga wakhat dinkhaira bamme.”
Paniu din-e, “Yo, katipao, dinkhailo.”
41Jesu niu haichiu dinsude, “Pawan khatga maipaw kaphungmai khangnia bamme. Khangkhat siniu rangkang kai mangiu phung-e, khangkhat siniu rangkang ringiu phung-e. 42Sichiudi panai khangniase rui ngamlak mide, sijengniu panai khangnia situ paniu kuakkhai mide. Chiusai tuhoira sibo piu siniu, panai khangnia ruangga sao situ lungsa nkiulo?”
43Simon niu paokakge, “Paniu kuak khai makeng mibo piu situ-e, chiujiu Ira maning-e.”
Jesu niu paokakge, “Nang maji-e.” 44Sigasu Jesu niu maipui khulam mariwang lujiu Simon khuga din-e, “Nangniu haibo pui situ ngaoma? Iniu nakyga wangbo-e, chiudi nangra aphi khiura tadui pikhai makge, chiudi para pamatui siniu aphi nkhiu khaijiu khatdi patham siniu manuk masang khai bide. 45Nangra atu kapupjiu adaokhai makge, chiudi para I ngutbo gasuniu kapupsao makha-e. 46Nangra apiga wasa manuk khai makge, chiudi para aphiga wasase manuk khaijiu bamme. 47Sichiusai Iniu nakhuga dinbo-e, paniu lungsa nkiubo jengniu pa-nuan kengbo situ kuak khai mide. Sichiujiu poinakha kuak khai bibo patu sira poinakha lungsabo-e.”
48Sichiujiu Jesu niu maipui khuga din-e, “Na-nuan hina kuak khai mide.” 49Siga chakuangkai mungga taobam maidung siniu paliu ronna dinsude, “Haina hai saolo? Paniu nuandung tudi kuak khaijiu bamme!”
50Siga Jesu niu sibo maipui khuga din-e, “Nagu malum siniu natu ranlude, agi-manaijiu tadsulo.”
वर्तमान में चयनित:
LUKE 7: LIANBSI
हाइलाइट
शेयर
कॉपी
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.
