Yohanes 15
15
Yesus ap, nun ap, talima dukdongobuka kum ubibyopura, nun yuk aniryuk duk kum moupmanto unamabe
1Yesus arye el mapu ati, ayupu nirya nyabuk.
Nara, anggur tapu deiyok atonun unune. Na ni koprop ara, anggur tapu koun wa tuku talina Deiyoknye ulula anya arye, elda parang ya talina deiyoknye ulule. Ara aya arye dobuka atapu sekliba kwa leklamle. 2Nati, diba tenebuka, na ap talima dukdongobuka unyak ninye ara, anggur tapu taruk atonun unyake. Na ni koprop arye, anggur tapu taruk duk kum moulamle ning ara, sekuka batakalule. Bukni, atapu taruk arye duk teleb ubuka moulamle ning ara, ‘Tapu duk pia teleb ubuka, weik arye moupnamle’ tenen, yuk malye tapu koupdongobuk ning ap, talye taruk ap, sekloplirye, moulilule.
3Anggun na mapu ara, na yupu nyalisiniba, kekelamluma ati ara, akunum teleb ubuka diksukumuk kipdeipsisa ati, teleb ululume. 4Anggunda talima dukdongobuka na ap neika umunce, nauk talibuka unamlume. Winipminyopura, na ning ara, anggun talima noutam akuk tuba unamsine. Talye anggur tapu taruk nirya ara, anggur deiyok ap dukdongobuka tuba ulamle talak ara, duk moulul bukni, taruk el yuk uptopura, ataruk ara duk kum mouptue. Aning atonun, anggun ap talima dukdongobuka nauk talibuka, na ap neika kum upmunyopura, anggun bidamnye aneryuk duk kum moupmanto unamlume.
5Na Yesus ara, anggur tapu deiyok atonun unune. Anggun na mapu ara, anggur tapu paplirye, taruk leklamla atonun ululume. Yata ninye do nirya, na ap talima dukdongobuka nauk talibuka unyakba, narye sik talima noutamak tuba unyopura, aninye ara duk weik moupnamle. Bukni, na ap talima dukdongobuka una kum bukni, anggun yuk uk upmunyopura, angguncuk pil teleb ning tonok babye kum doptume. Anggun dem aryuk winipdenamlum ning ara, nong kum upnamle.
6Yata ninye do nirya, na ap talima dukdongobuka, nauk talibuka kum unyak ninye ara, sikda anggur tapu#15:6 Anggur tapu ara, mitik anun yo atonun ulul bukni, tonda tapu atonun ulule. Winilula ara, atapu ya deibicopura, adeice arye mungkapa weik siliklirye, taruk weik kwa leklirye, dana-dana balule. Dana-dana bilyopura, duk weik moulule. Ya deina kumopura, talyeuk balamlya ani, duk tonok-tonokuk moulule. taruk deiplobiceura, sisal lyeplirye, koululamle ning atonun unyake. Akunum koulyamlye taruk ara, ninye arye dobuka uku dongobicopura, uku arye dilamle.
7Bukni, anggunce na batakana kumce, na ap talima dukdongobuka, nauk diba tenebuka, na yupu kekemunce, ayupu anggun kanye talima noutamak tuba uplyopura, yata ning do nirya, anggun patapsilye touk moropnumunyopura, kekepsinirye aninguk arenamsine. 8Anggur tapu duk teleb ubuka moulamle atonun, na mapu anggunda, duk pia weik mounamsile. Teleb ubuka winimunya deice arye, yuk ninye nirya arye, ‘Kume anang ara, Yesus el mapu unyake’ tenen, kel kipnamake. Ninye weik akunum kel kibicopura, winimunya deice arye, na Ni Koprop Allah ati, ‘Allah ara pia telebe,’ nyabuka, el si erebikirye, elti, kinamake.
9Na Ni Koprop Allah arye, nati kanye talima deipnukce arenulul touk, narye anggun na mapu ati, talima aresunune. Wini talak ara, narye anggunti bico tenebuka melisunun noutamuk, tuba unamlume. 10Narye anggunti, “Aning wininamlume, aning ara kum wininamlulume,” nyabuka nyasinye yupu nirya kekepmunce, ayupu talibuka dobolbimunyopura, adeice narye anggunti, bico tenebuka melinauk unamsine. Aning atonun, na Ni Koprop Allah arye, “Wininalyame,” nyabuka nyanilye touk, ayupu uk kekebuka dobolbaniba, na ni birye tuba talima arinulule.
11Ayupu nirya laka nyapmasina deiyok ara, ‘Sikda, pia teleb kanye bobuka pin-pin aryuk unamake. Tonok ning atibuk ikin kanye kum bonamake’ tenen, ayupu nirya akunum laka nyapsine. Pin-pin arye, una deiyok ning arilul deiyoknye bira, na ununa ati, na nyapmasin touk winipmunyopura, kanye deibuka unamlume. 12Narye anggunti, “Aning wininamlulume, aning ara kum wininamlulume,” nyapdeipsin yupu weik deiyoknye bira, ani. Ara, narye anggunti, bico tenebuka melinauk ulamse touk, anggun babye, adiparyuk bico tenebuka melilanauk unamlulume.
13Narye anggunti bico tenebuka melisunun ning ara weik mambule. Ara, narye na kayapu nang anggunti, anggun malye winin ning ap, anggun ap, pununa ati dipnamsine. Yuk ninye nirya arye, yuk nang ati bico tenebikirye, melinyak ning nirya ara, mitik mambule. Sikce sik kweitcapu nang yok pununa ati, kum dibinyake. Bukni, narye anggun yok pununa ati dipnamna ara, weik mambule.
14Narye anggunti, “Aning wininamlulume, aning ara kum wininamlulume,” nyalisinye yupu, dipkoprop kekebuka winipmunyopura, narye, “Anggunda na weitcapu nang koprop,” nyanamsine. Narye nyasinye yupu kum kekepmunce, batakmunyopura, ‘Anggunda na weitcapu nang,’ nyabuka kanye kum delinamsine. 15Ura, talye pil melin ninye ara, sik deiyok nang arye tenenyak ning ap, wininyak ning nirya ap, kum kel bikinyake. Ati wini talak arye diprongobuka, dolyanamsil talak noutamak ara, narye sikti, “Na amu tam pil melin ninyeuk unyake,” kum nyanamasine. Na Ni Koprop Allah arye nyapdeiyamnukba, bikamse ning nirya ara, narye anggunti akunum laka peterelamsise ati, wini talak ara, narye anggunti, “Aninye na weitcapu koprop unyake,” nyabuka akunum nyapsine.
16Anggunce nati kum wipdeiamnulume. Aning kum bukni, narye anggunti, ‘Aninye ara melisiniba, pia teleb ubica deice arye, duk moupnamle ning ara, pia unamle’ tenen, wipdeiamsise. Ati anggunce anyapmasin touk akunum winipmunyopura, anggunce na si deice arye moropmunyopura, na ni koprop kekepsilirye, aning-aning moropmunye touk arenamsile. 17Narye anggunti, “Wininamlulume,” nyapdeipsin yupu ara, ani. Ara, anggun nirya adiparyuk yuk nang ati, bico tenepdanuka melilanauk unamlulume. Yesus arye nyabuk.
Yesus arye, “Diba tenena kum ninye arye, anggun na mapu ati, ‘Nun like,’ tenenamsiyake,” nyabuk yupu
18Yesus arye el mapu ati nyabuk. “Sik diba tenena kum, talye unyak ninye arye anggunda na mapu ati, ‘Anang ara nun lik,’ tenenamsiyake. Winipsicopura, anggunda luba kina kume. Anggunce tuba tenenamlulume. Minop talak ara, sik diba tenena kum ninye arye na Yesus ati, ‘Anye bira nun lik,’ tenelamnike. Minop talak bataklamiknye bira, na atia. 19Diba tenena kum, talye unyak ninye arye wininyak ning atonun winin ning ap, tenena ap, winipmunyopura, atalye nang arye sikti, ‘E, anang ap, nun ap ansinibuka unyabe. Sikda, nun wininyap atonun wininyake. Ati nunce anang ati kanye delinyabe,’ tenepnamsiake.
Bukni, dipkoprop ning ara, na mapu anggun winilulum ning ap, anggun tenelulum ning ap ara, talye wininyak ninye atonun pia kum ati, anggun ansinibuka kum ululume. Talye tukwak ninye kan-kan noutamak, narye wipdeiamsisa ati, anggun na mapu ululum nang ap, talye nang ap, ansinibuka kum ululume. Anggun kanye tenelulum ning ap, anggun winilulum ning ap ara pia yuke. Sik diba tenena kum, talye unyak ninye pia yuk anya arye, aninye arye na mapu anggunti, ‘Nun lik,’ tenesinyake.” Yesus arye nyabuk.
20Nyabukce, ayupu dukdongobuka nyabuk.
Na akunum nyapdeiyamsise yupu ara, tuba tenenamlulume. Ara, talye pil melin ninye ara, mitik mambul bukni, sik deiyok nang ara, weik mambul unyake. Yuk nang arye deiyok nang ati wininyak atonun, adeiyok nang sik amu tam unyak ninye ati ara, atonun wininamake. Ati, na talye kum nyapsine. Sik malye nang arye, nati, malye yupu nyabuka na nong deice ikin ning weik delilamnike.
Aning atonun, anggunda na amu tam ululum ninye ati ara, malye nang arye anggunti, ‘Anang ara, nun lik’ tenen, malye yupu nyabuka, ikin ning anggun nong deice delinamsiake. Bukni, na yupu kekebuka dobolbalamak ninye ara, anggun na mapu nyalulum yupu babye, kekebuka dobolbanamake. Na yupu kum kekenyak ninye ara, anggun na mapu nyalulum yupu babye kum kekepnamake.
21Sik diba tenena kum, talye unyak ninye arye, anggunda na mapu ululum ninye ati, ‘Anang ara, nun lik’ tenen, malye yupu nyabuka, “Ikin ning anggun nong deice delinamsiake,” nyabuka laka nyapmasin touk, wininamake. Wininamsiaka deiyok ara, ani. Na dopdeipnukce, tukwak mutuku dopdeipnuknye, na Ni Koprop Allah ati ara, diba tenebikirye, el ap talima dukdongobuka kum unyaka anya arye, na si erebuka talilulum ninye ati, ‘Anang ara nun lik,’ tenebuka wininamsiake. 22Na kum yatinirye, aninye ati na yupu kum nyapmatinyetoura, sik malye winilamak ning anggun nong deice tuba kum uptopura, aninye ati kum wenepnamtinye. Bukni, wini talak na yupu akunum nyamsiba, sik akunum kekeplopnika ati, “Naio, nun mangkau kanye arye malye winilamubu,” kum nyapnitinge.
23Yata ninye do nirya, na Yesus ati, ‘Anye bira nun lik’ tenen, batakaninyak ninye ara, wininyaka deice arye, na Ni Koprop Allah babye ati, ‘Elda nun lik’ tenen, batakanyake. 24Na yasirye, sik kan-kan noutamak, yuk nang pia kum winilamik ning, ninye winipmanto kum ning, pil kum doptinyopura, kum elilamtingtoura, sik malye winin ning sik nong deiceuk tuba kum uptue. Bukni, wini talak akunuma. Narye ninye kum winipmanto ning, winipman kum pil weik arye domsiba, sik elilamik bukni, na ap, na Ni Koprop Allah ap ati, ‘Nun lik,’ tenesinyake.
25Bukni, aninye arye na batakaninyaka deice arye, minop talak Allah yupu laka nyalamik ninye sekuka deiamik yupu ara, nong akunum laka uple. Minop sekik yupu ara ani.
‘Deiyok kum ubuk bukni, deiyok kum ubuk babye, nati, ‘Nun lik,’ tenelamnike.’ (Mazmur 35:19)
“Ayupu aubuk touk, dipkoprop deiyok kum upmal bukni, sik anang arye na Yesus ati, ‘Nun lik,’ tenenyaka deice arye, minop talak nabi nang arye nyalamik ning ara, nong akunum upmale.” Yesus arye nyabuk. Nyabukce, ayupu ton nyabuk.
26“Narye, na Ni Koprop Allah, el un dam arye dopdeipnamsinanye bira, Allah El Dib Kanye ulule. Elda anggun talima melina ati, melinanye unamsile. Dopdeipnamsinanye bira, Allah El Dib Kanye ara, Allah arye dopdeipsilba balule. Elda, Dib Koprop Yupu nyalulnye ulule. Anye bira Allah El Dib Kanye arye, na Yesus ati, yupu nyabuka peterenamsile. 27Elce nati laka nyapnamle bukni, anggunda na mapu ababye, ‘Yuk ninye nirya kekenamak’ tenen, nati adiparyuk laka nyalbinamlume. Na pil deiyok kipse talak arye diprongobuka, wini talak nirya ara, na ap neika unyaba ati, anggunce tonap nati, laka nyalbinamlume.” Yesus arye el wipdeiamuk nang ati nyabuk.
נבחרו כעת:
Yohanes 15: EIPA
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© 2023, Wycliffe Bible Translators, Inc. All rights reserved.
