Yohanes 16

Yesus arye el mapu ati, “Malye nang arye, anggun nong deice ikin ning weik delinamsiake,” nyabuk yupu

1Yesus arye ayupu tonap dukdongobuka el mapu ati nyabuk. Arup nyapmasin yupu nirya ara, ‘Na mapu yuk bisik kirikuka bakirye, malye winibicak’ tenen, anggun kel bikna ap, yupu sekeldongona ap ati, nyapmasine. 2Sik dib tenena kum ninye arye, anggunda na mapu ati, yu upliba, “Nun Allah yupu peterenyap aik ara, anggun ap kum bitume,” nyabuka bataksikirye, bai tam dopkwetepnasiyake. Aninguk kum bukni, aminyan talak ara, amalye ninye arye, ‘Kume. Yesus ati dib tenenyak ninye opmabya deice arye, Allah el si erena ati teleb pil donyabe. Anang obibyeura, Allah arye kanye deipnamsil’ tenen, wininamake. 3Pia malye wininamsiyak bukni, aning atonun wininamsiyaka deiyok ara, sik anang arye na ni Allah ap, na ap ati, dipkoprop diba kum tenesinyake. Diba tenena kumce, nun kum bikamsika ati, nun ap talima dukdongobuka kum unyake.

4Aning-aning nirya min kum winipmalye talak ara, “Aminyan talak ara, yu nang arye winipnamsiake,” nyabuka akunum laka nyapmasina ati, aminyan talak aning nirya nong akunum upsilyopura, na mapu anggunce, ‘E, awinisinyak ning nirya ara, Yesus arye “Wininamsiaka anya arye, kanye moupnamlulume,” nyapdeiamsuk touk, wini talak akunum winipmasil atia’ tenen, tuba tamubuka tonap tenepnamlulume. Ati, min kum winyamsilye talak akunum laka nyapsine. Minop talak ara, na ap, anggun ap neika tuba ulamubu ati, ayupu nirya kum laka nyapdeiyamsise. Yesus arye el wipdeiyamuk nang, el mapu sik 12 nang, ati nyabuk.

“Allah El Dib Kanye arye, pil donamsile,” nyabuk yupu

5Yesus arye el mapu ati ayupu ton nyabuk.

Na dopdeipnukce, tukwak mutuku dopdeipnuknye, Allah el dam benamne bukni, anggun kan-kan tonoknye birye, “Naie, dan tam bilam do?” nyabuka kum asipdenamnulume. 6Min laka nyapmasin yupu kekepmalumce, anggunda, ‘Se, nun ni bilirye, bataknamsil ati, yata wiripnamap do?’ tenen, mambul kanye bobuka unmalume. 7Winilulum bukni, na dipkoprop nyapsine. Na yukak binamna ara, anggun teleb kilina ap, anggun melina ap ati benamne. Na kum bitinyopura, min nyapmasinanye, anggun Melinanye bira, anggun talima melina ati, anggun dam kum yatue. Bukni, na akunum binyopura, Allah El Dib Kanye, narye dopkwetepnibuk, anggun dam melilyanamsile.

8El yalyopura, diba tenena kum, mutuku nirya talye tukwak unyak ninye nirya ati ara, yupu bokeiplirye, sik talima noutamak weneplyopura, sik malye nang arye, ‘Se, dib nyapmasile, nunda pia malyeuk wininyabe’ tenen, biknamake. Sik talima noutamak ara, nyanamle. “Anggunda malye ninyeuk ululuma anya arye, Allah arye wenepnamsile. Anggun malye winin ning ap, malye tenena ap weik winilulume. Diksukum winina ara, anggun pia kum winilulume. Amalye winina nirya ara, anggun nong deice tuba upmasila ati, Allah arye anggun nirya ati, yupu bokeipnamsile,” nyabuka wenenamsile.

9Anyapnamle yupu nirya deiyok ara, laka nyapnusine. Tukwak ninye arye, nati diba kum tenenyaka anya arye, malyeuk wininyake. Wininyaka anya arye, Allah El Dib Kanye arye, aninye ati weneplibuk, moubuka biknamake. 10Tukwak mutuku noutamak, diksukum unanye bira, na tonok ununa anya arye, na ni dam bindopnyopura, aminyan talak kum eipnamluluma ati, tukwak mutuku diksukum unanye tonok babye kum unamle. Ati, Allah El Dib Kanye arye, tukwak malye wininyak ninye ati, ‘Anggunda diksukumuk pia kum winilulume,’ nyabuka wenepnamle. 11Ura, na ni birye, weik malye winina deiyoknye, Isa Mutuku Dongonye ati, yupu lipsisikuka wenepnamle. Isa Mutuku Dongonye, tukwak mutuku nirya talibuka, weik malye deiyoknye, ulamle bukni, na pil dopnamna deice arye, Isa Mutuku Dongonye bisibuka opnyopura, el kum danamle. Ati Allah El Dib Kanye arye, Isa Mutuku Dongonye el amu tam unyak ninye ati, wenepnamle. Yesus arye nyabuk. Nyabukopura, ayupu tonap nyabuk.

12Na mapu, anggunti yupu weik tonun tonap dukdongobuka nyapsitinye bukni, kekepmunce, ‘Se,’ tenen, mambul kanye bobuka bouku sukupsilyak ati, wini talak anggun min kum kekeptuma anya arye, kum nyapnusine. 13Bukni, min nyapmasinanye, Dib Koprop Yupu nyalulnye, Allah El Dib Kanye dopdeipsinyopura, anggun dam yalyopura, elce dipkoprop yupu nirya kel bikna ati, ‘Winipnamlum,’ nyabuka peteresilyopura, kel biknin banamlume. El kanye aryuk kum nyanamsil bukni, narye nyapnyopura, el kekeplye yupu uk, peterenamsile. Elce aminyan talak winipnamle ning ati, laka nyabuka, peterenamsile.

14Na yupu nyapnyopura, elce na yupu ap, na wininun ning ap dobuka, anggunti laka peterepsiliba, anggunce kel biknin banamlume. Winibuka wininmalye deice arye, na si weik arye ereipnamnile. Tonda, wininamla deice arye, ninye nirya arye na pia teleb winin ning ara, kel bikikirye, na si erepdeipnamniyake.

15Na Ni Koprop Allah arye talilul ning nirya ara, dipkoprop na ninguk ulule. Adeiyok ati ara, min nyapmanue. Ara, Allah El Dib Kanye arye, na yupu ap, na wininun ning ap dobuka, anggunti laka peterenamsile. 16Like tonok talak mitik anun ton akunum uplyopura, nati tonap kum eipnamnulume. Daulamunye bukni, aminyan talak tonap eipnamnulume. Yesus arye el mapu ati nyabuk.

Yesus arye, “Na mapu wini talak kanye imun asa unamlum bukni, aminyan ara, kanye deibuka unamlume,” nyabuk yupu

17Yesus arye wipdeiyamuk nang, sik kan-kan arye, ton nang ara nyabik. “Kume, Yesus arye, ‘Like tonok talak mitik anun ton akunum uplyopura, nati tonap kum eipnamnulum bukni, aminyan talak tonap eipnamnulume.’ Tonda, ‘Na ni dam binamna atia,’ nyapmasila ara, yata deiyok ati nyapmasil do? Ayupu nyapsil ning ati, walwal upsilaba, nun walwal upsile,” nyabuka asipdeyik. 18Tonda sikce, “Yesus arye, ‘Like tonok talak mitik anun tonap,’ nyapmasila ara, ‘Deiyok anye’ tenen, kum kipmabe. Yata deiyok ati nyapmasil do? Nun walwale,” nyanmek.

19Yesus arye sik walwal upmok ning ap, ‘Se, deiyok laka nyapsute’ tenen, patanmok ning ap, bikuk. Kel bikuka ati, Yesus arye el mapu ati nyabuk.

Arup ara narye, ‘Like tonok talak mitik anun ton akunum uplyopura, kum eipnamnulum bukni, aminyan talak tonap eipnamnulume,’ nyapmanu ara, ‘Deiyok dan do?’ tenen, tuba asilanmalum do? 20Dipkoprop nyapsine. Sik diba tenena kum, talye unyak ninye mutuku-mutuku nirya kanye deibuka pin-pin arye unamak talak noutamak arye, anggun na mapu ara mambul kanye bobuka engenamlume. Anggunda, imun kanye bobuka engenamlum bukni, aminyan ara anggun engenamlum ning ara, kum daliba, kanye deibuka pin-pin asauk unamlume.

21Winipmanto ning ara, nyapnusine. Yata kilapu do nirya, sik mi delin talak akunum uplyopura, mi deiyokuk weik arye dilamle bukni, sik mapu akunum deibikcopura, akunuma. Min uk dinmalya ning ati, tuba tamubuka tonap tenena kumce, ‘Na mi akunum deipmane’ tenen, pia kanye deibuka pin-pin asa arye unyake.

22Aning ara atonun, wini talak ara na mapu anggun kanye imun usilye talak ara, wini talak akunum upsil bukni, aminyan tam na ap, anggun ap ansinibuka eipdabirye, anggun pin-pin asa arye unamlume. Winipmunyopura, yuk ninye arye anggun kanye pin-pin asa unamlum ning ara, kume, kum daneipsitinge. 23Atalak ara, anggunce nati, tuba tamubuka tonap kum moronamnulume. Na dipkoprop nyapsine. Yata ning do nirya, anggunce na ni Allah ati, na si deice arye moropmunye ning nirya ara, na ni Allah kekepsilirye, arenamsile. 24Nati, diba tenepnulum talak arye diprongobuka, wini talak noutamak nirya ara, aning-aning na si deice arye kum moronululume. Bukni, wini talak ara moronamnulume. Moropmunyopura, dolonamlume. Dopropmunyopura, kanye deibuka pin-pin asa arye unamlume. Yesus arye el mapu ati nyabuk.

25Yesus arye ayupu tonap dukdongobuka nyabuk.

“Arup ara, domon yupu deice arye peterepmasin bukni, aminyan yanamle talak noutamak ara, domon yupu tonap kum nyanamne. Atalak ara, na Ni Koprop Allah el winilul ning ati, laka noutam aryuk nyanamsine. 26Atalak ara, anggunce na si deice arye Allah moronamlume. Narye, ‘Na mapu ara, sik bidamnang Allah kum moroptinge’ tenen, narye anggun melina ati, ‘Allah moronamsine,’ kum nyapsine.

27Kume, na ni Allah el kanye aryuk talima aresulule. Ara, anggunce nati, ‘Allah arye Yesus dopdeibukura, yasuke. Elti nun diba tenepmabe’ tenen, diba akunum tenyamnuluma ati, Allah arye anggunti kanye talima aresulule. 28Na ni Allah arye dopdeipnukba, el dam im deice arye tukwak mutuku noutamak yase. Wini talak ara, tukwak mutuku batakuka, tuba tamubuka tonap na ni dam tamubuka im deice benamne.” Yesus arye el mapu ati nyabuk.

29Nyabukura, el mapu arye, “Naio, winira lakak anyuk nyapsilame. Domon yupu deice arye kum nyapmasilame. 30Winira, nunce moubuka kel bikape. Anda, aning-aning nirya akunum kel bikamlume. Ance, ‘Ninye arye nati asipdenitingopura, weik kel yupu nyaptinye’ tenen, kum patakilyebuk, kum ulyame. Aning ati ara, anda dipkoprop Allah el un dam arye yasuluma ara, nun diba tenebuka kel bikmakiyabe,” nyabik.

31El mapu arye nyabikba, Yesus arye tamubuka nyabuk. “Min arye kum bukni, winira, anggun akunum diba tenepmanulume. 32Bukni, aminyan yanamle talak noutamak ara, malye nang arye anggun nong deice ikin ning deipsicopura, anggun nirya na batakuka, yuk-yuk bindopnamnulume. Nati, bataknumunce, anggun aik ap, anggun mutuku koprop ap, batakuka yuk-yuk benamlume. Ilil ati, anggun nirya arye na batakuka, yukak bindopmunyopura, na yuk unamne. Na ni Allah ap, na ap neika tuba unyama anya arye, dipkoprop na yuk kum unune.

33Aning-aning nirya, min nyapmasina deiyok ara, ‘Sikce nati diba tenepnikirye, na ap, na mapu ap, kanye talima dukdongobuka neikauk ubibyopura, sik ikin kanye bona kumce, kanye deibuka telebuk unamak’ tenen, ati nyapmasine. Tukwak mutuku noutamak unamlum talak nirya ara, ikin ning ap, kanye imun ning ap, unamsile. Bukni, bouku sukuna kumce, kanye deibuka lamapdongobuka unamlume. Ara, tukwak mutuku ulul ning ap, tukwak mutuku unyak ninye ap nirya ara, narye akunum malye kibuka bisipsirye, sik deice tam akunum ununa ati nyapsine.” Yesus arye el wipdeiyamuk nang, sik 12 nang ati nyabuk.

נבחרו כעת:

Yohanes 16: EIPA

הדגשה

שתף

העתק