פסוקים פופולריים מ- Yohanes 15

שתף

Na Yesus ara, anggur tapu deiyok atonun unune. Anggun na mapu ara, anggur tapu paplirye, taruk leklamla atonun ululume. Yata ninye do nirya, na ap talima dukdongobuka nauk talibuka unyakba, narye sik talima noutamak tuba unyopura, aninye ara duk weik moupnamle. Bukni, na ap talima dukdongobuka una kum bukni, anggun yuk uk upmunyopura, angguncuk pil teleb ning tonok babye kum doptume. Anggun dem aryuk winipdenamlum ning ara, nong kum upnamle.

Anggunda talima dukdongobuka na ap neika umunce, nauk talibuka unamlume. Winipminyopura, na ning ara, anggun talima noutam akuk tuba unamsine. Talye anggur tapu taruk nirya ara, anggur deiyok ap dukdongobuka tuba ulamle talak ara, duk moulul bukni, taruk el yuk uptopura, ataruk ara duk kum mouptue. Aning atonun, anggun ap talima dukdongobuka nauk talibuka, na ap neika kum upmunyopura, anggun bidamnye aneryuk duk kum moupmanto unamlume.

Bukni, anggunce na batakana kumce, na ap talima dukdongobuka, nauk diba tenebuka, na yupu kekemunce, ayupu anggun kanye talima noutamak tuba uplyopura, yata ning do nirya, anggun patapsilye touk moropnumunyopura, kekepsinirye aninguk arenamsine.

Anggunce nati kum wipdeiamnulume. Aning kum bukni, narye anggunti, ‘Aninye ara melisiniba, pia teleb ubica deice arye, duk moupnamle ning ara, pia unamle’ tenen, wipdeiamsise. Ati anggunce anyapmasin touk akunum winipmunyopura, anggunce na si deice arye moropmunyopura, na ni koprop kekepsilirye, aning-aning moropmunye touk arenamsile.

Narye anggunti bico tenebuka melisunun ning ara weik mambule. Ara, narye na kayapu nang anggunti, anggun malye winin ning ap, anggun ap, pununa ati dipnamsine. Yuk ninye nirya arye, yuk nang ati bico tenebikirye, melinyak ning nirya ara, mitik mambule. Sikce sik kweitcapu nang yok pununa ati, kum dibinyake. Bukni, narye anggun yok pununa ati dipnamna ara, weik mambule.

Nati, diba tenebuka, na ap talima dukdongobuka unyak ninye ara, anggur tapu taruk atonun unyake. Na ni koprop arye, anggur tapu taruk duk kum moulamle ning ara, sekuka batakalule. Bukni, atapu taruk arye duk teleb ubuka moulamle ning ara, ‘Tapu duk pia teleb ubuka, weik arye moupnamle’ tenen, yuk malye tapu koupdongobuk ning ap, talye taruk ap, sekloplirye, moulilule.

Narye anggunti, “Aning wininamlulume, aning ara kum wininamlulume,” nyapdeipsin yupu weik deiyoknye bira, ani. Ara, narye anggunti, bico tenebuka melinauk ulamse touk, anggun babye, adiparyuk bico tenebuka melilanauk unamlulume.

Anggur tapu duk teleb ubuka moulamle atonun, na mapu anggunda, duk pia weik mounamsile. Teleb ubuka winimunya deice arye, yuk ninye nirya arye, ‘Kume anang ara, Yesus el mapu unyake’ tenen, kel kipnamake. Ninye weik akunum kel kibicopura, winimunya deice arye, na Ni Koprop Allah ati, ‘Allah ara pia telebe,’ nyabuka, el si erebikirye, elti, kinamake.

Yesus arye el mapu ati, ayupu nirya nyabuk. Nara, anggur tapu deiyok atonun unune. Na ni koprop ara, anggur tapu koun wa tuku talina Deiyoknye ulula anya arye, elda parang ya talina deiyoknye ulule. Ara aya arye dobuka atapu sekliba kwa leklamle.

Yata ninye do nirya, na ap talima dukdongobuka, nauk talibuka kum unyak ninye ara, sikda anggur tapu taruk deiplobiceura, sisal lyeplirye, koululamle ning atonun unyake. Akunum koulyamlye taruk ara, ninye arye dobuka uku dongobicopura, uku arye dilamle.

Ayupu nirya laka nyapmasina deiyok ara, ‘Sikda, pia teleb kanye bobuka pin-pin aryuk unamake. Tonok ning atibuk ikin kanye kum bonamake’ tenen, ayupu nirya akunum laka nyapsine. Pin-pin arye, una deiyok ning arilul deiyoknye bira, na ununa ati, na nyapmasin touk winipmunyopura, kanye deibuka unamlume.

Narye anggunti, “Aning wininamlume, aning ara kum wininamlulume,” nyabuka nyasinye yupu nirya kekepmunce, ayupu talibuka dobolbimunyopura, adeice narye anggunti, bico tenebuka melinauk unamsine. Aning atonun, na Ni Koprop Allah arye, “Wininalyame,” nyabuka nyanilye touk, ayupu uk kekebuka dobolbaniba, na ni birye tuba talima arinulule.

Narye anggunti, “Wininamlulume,” nyapdeipsin yupu ara, ani. Ara, anggun nirya adiparyuk yuk nang ati, bico tenepdanuka melilanauk unamlulume. Yesus arye nyabuk.

Diba tenena kum, talye unyak ninye arye wininyak ning atonun winin ning ap, tenena ap, winipmunyopura, atalye nang arye sikti, ‘E, anang ap, nun ap ansinibuka unyabe. Sikda, nun wininyap atonun wininyake. Ati nunce anang ati kanye delinyabe,’ tenepnamsiake. Bukni, dipkoprop ning ara, na mapu anggun winilulum ning ap, anggun tenelulum ning ap ara, talye wininyak ninye atonun pia kum ati, anggun ansinibuka kum ululume. Talye tukwak ninye kan-kan noutamak, narye wipdeiamsisa ati, anggun na mapu ululum nang ap, talye nang ap, ansinibuka kum ululume. Anggun kanye tenelulum ning ap, anggun winilulum ning ap ara pia yuke. Sik diba tenena kum, talye unyak ninye pia yuk anya arye, aninye arye na mapu anggunti, ‘Nun lik,’ tenesinyake.” Yesus arye nyabuk.