Yohanes 14
14
Yesus arye el mapu, sik kanye talima mikip kilina ati, nyabuk yupu
1Yesus arye el wipdeiamuk nang ati nyabuk. “Anggunce mambul kanye bobuka talima bouku sukuna kum unamlume. ‘Allah elce, melinamsil’ tenen, diba tenebuka anggun kanye talima el deice delinamlulume. Tonda aning atonun, nati, ‘Elce melinamsil’ tenen, dib tenebuka, anggun kanye talima na deice delinamnulume. 2Na ni ulul aik pum ara, aik yuk-yuk wilibuk aik weik arye kintineiamuk. Aik weik kum uamtopura, akunum nyapdeiyamsitinye. Nara, na ni asik binirye, anggun aik ati, kintipnamsine. 3Anggun asik kintinilbinamna anya arye, dipkoprop tuba tamubuka tonap dolyamsine. Ara, ‘Na ap, na mapu ap, tonok akuk neika pia unamap’ tenen, dolyasinirye, na unamnak dobinamsine. 4Na binamne mutuku bana ati, ‘Bisik ara ani’ tenen, akunum kel bikamlume.” Yesus arye nyabuk.
“Allah el dam bana ati, bisik ara nauk unune,” Yesus arye nyabuk yupu
5Yesus arye, “Abisik ara, anggun kele,” nyabukba, Tomas birye tamubuka nyabuk. “Naio, an binalam mutuku ara, nun walwal anya arye, yata wiribuka, ‘Bisik ani’ tenen, kel biktibye do? Nun walwale,” nyabuk. 6Tomas arye nyabukba, Yesus arye tamubuka nyabuk. “Diksukum Bisik ara, nauk unune. Tonda, Dib Koprop Yupu Nyananye unune. Tonda, Kam Una Deiyoknye bira, na tonok unune. Yata nang do nirya, na Ni koprop el dam bana ati, na deice aryuk binamake. Yuk bisik ton pia kum ulule. Yata ninye do nirya, na deice kum yaicopura, na ni Allah un dam kum binamake. 7Dipkoprop nati moubuka kel bikamtumtoura, na Ni koprop babye akunum moubuka kel biknamtume. Bukni, wini talak ayupu nyapsine. Wini talak arye diprongobuka, doyanamle talak nirya ara, na Ni Koprop Allah akunum kel bikamlume, akunum na elinululuma ati nyapsine,” Yesus arye nyabuk.
8Nyabukura, Pilipus arye nyabuk. “Se, Naio, an Ni Koprop Allah laka kipdeipsutumba, eiptibyopura, ‘Aning ara akunuma,’ teneptibye,” nyabuk. 9Nyabukura, Yesus arye nyabuk.
“Pilipuso, anggun ap, na ap, asum-asum yupa weik neika akunum ulamubu bukni, anda moubuka min kum kel bikamnulum do? Yatanye do nirya, na elilamnuknye birye, na Ni Koprop Allah ati akunum elilamuke. Nun bitinye ara neika ati, ance, ‘An Ni Koprop Allah laka kipdeipsutume,’ nyapmanilama ara, yata ati do?
10Na ap, na Ni ap talima dukdongobuka unyame. Nun neika unyama ara, diba kum tenepmasulum do? Na nyasinye yupu nirya ara, na kanye aryuk kum nyasunune. Aning kum bukni, na Ni Koprop Allah, na talima noutamak unilya deice arye, el pil donulule. 11Ati, narye, ‘Na ap, na Ni Koprop Allah ap, talima dukdongobuka unyame. Nunda neika unyame’ nyapmasin yupu ara, anggun adiparyuk dib tenepmanulume. Na yupu uk diba kum teneptumopura, narye ninye kum winipmanto ning, weik mambul pil dolamsiba, elilamlum deice arye, diba tenenululume.”
12“Dipkoprop nyapsine. Yata ninye do nirya, nati diba teneninyak ninye arye, na pil dolamse touk pil donamake. Tonda, narye na Ni Koprop Allah, el un dam binamne anya arye, nati dib teneninyak ninye arye donamak pil ara, weik mambul weik pil donamake. Narye atalak dolamse ning ara, mitik mambuluk ulule. 13Na Ni dam binyeura, anggunce na si deice arye, nati moropnumunyopura, anggunce moronamnulum touk, aninguk arenamsine. Ara adeice arye, ‘Na ni Allah ati, si erebuka el si erenamlum’ tenen, Allah el Mi Koprop narye, anggun moropnumunye touk arebsinyopura, anggunce Allah el si pia erenamluma ati, nyapsine. 14Ati, yata ning do nirya, na si deice moropnumunyopura, kekepnirye, aninguk melibuka arenamsine.” Yesus arye nyabuk.
Yesus arye, “Allah arye, El Dib Kanye arenamsile,” nyapdeibuk yupu
15Yesus arye ayupu ton dukdongobuka nyabuk. “Anggunce nati, dipkoprop dib tenebuka kanye talima deipnumunyeura, na nyasinye yupu nirya kekepmunce, ayupu uk talibuka wininamlulume. 16Winipmunyopura, narye na Ni Koprop Allah ati moropnyeba, elce anggun talima barina ati, yuk Melinanye ton arepnamsile. Arepsiliba, aMelinanye ap, anggun ap, pia neikauk unamlume.
17Anye bira, Allah El Dib Kanye arye, dipkoprop yupu uk peterenamsile. Diba tenena kum, talye tukwak unyak ninye arye, Allah El Dib Kanye ara, dib tenebuka kum doproptinge. Sik atalye ninye arye, elti, kum elikirye, elti, moubuka kum kel bikinyaka ati, kum doproptinge. Bukni, anggunce dib tenelulum ninye, na mapu anggun ning ati ara, Allah El Dib Kanye ara, anggun ap neika ululume. Aminyan talak, anggun talima ak wekuka unamsile. Aning ati ara, anggunce el akunum kel bikuka ululume.”
18“Anggunda na mapu ululuma anya arye, narye anggun batakseneba, talye kwaknan mapu atonun kum unamlume. Aminyan talak, narye anggun dam yanamne.#14:18 yanamne – Yesus arye ayupu nyabuk ning ara, ‘Allah El Dib Kanye aresilya deice arye, nun talima pum neika unamabe tenenamak’ tenen, nyabuk. 19Like mitik anun talak ton akunum uplyopura, dib tenena kum, talye tukwak ninye arye kum eipnamniyake. Bukni, anggunuk ara, eipnamnulume. Na pia kam unanye ununa ati, anggun babye kam unamlume.
20Ara, na ap na Ni Koprop Allah ap, talima dukdongobuka neika unyame. Tonda, anggun ap na ap, talima dukdongobuka unyabe. Anggunda na noutamak ululume. Nara, anggun talima noutamak unune. Aning nirya ara, na ni tenyamuk talak, sirya talak akunum uplyopura, anggunce aning nirya moubuka kel biknamlume.” Yesus arye nyabuk.
21Nyabukce ayupu ton dukdongobuka nyabuk. “Yata ninye do nirya, na yupu dobuka kekebikirye, ayupu uk talibuka pia dobolbanyak ninye ara, dipkoprop nati dib tenebuka talima arinyake. Nati, talima arilulnye bira, na Ni Koprop Allah arye anye biti, bico tenebuka, kanye deiplirye, melinauk unamle. Atonun, naryuk anye biti bico tenebuka, kanye deipnirye, melinamne. Tonda, ‘Atonye birye na wininye ning kel biknamnil’ tenen, laka kipdeipnebuk, kel biknamle.” Yesus arye nyabuk.
22Yesus arye nyabukba, Yudas Iskariot kum bukni, yuknye el si ati, Yudas nyalamiknye birye nyabuk. “Bukni, naio ance nunti, ‘Na wininye ning laka kipdeipnebuk, kel biknamlume,’ nyapmasilam bukni, yata deiyok ati sik talye daunyak ninye ati, ance an bidamnye ati, laka kum kipdeipdanalam do?” nyabuka asipdeyuk. 23Asipdeyukura, Yesus arye nyabuk.
“Na ti diba tenebikirye, kanye talima deipnikcopura, aninye dipkoprop na yupu kekepnikirye, anyuk talibuka dobolbanamake. Na yupu pia talibuka diksukumuk unyak talak noutamak nirya ara, na Ni Koprop Allah arye sikti, bico tenebuka melinamle. Winiplirye, na ni Allah ap, na ap, aninye sik un dam yanimirye, aninye ap kanye talima dukdongobuka neika unamabe. 24Bukni, yata ninye do nirya, nati diba tenena kumce, kanye talima kum deipnice ninye ara, na yupu talibuka kum dobolbinamake. Talye kekeltakanauk unamake. Narye nyasinye yupu nirya ara, na kanye aryuk kum nyasunune. Na nyasinye yupu ara, na dopdeipnukce, tukwak mutuku dopdeipnuknye Allah, el yupu uk nyasunune. Ayupu nirya ara, el yupu ulula anya arye, elce nyanilye touk nyasunune.” Yesus arye nyabuk.
25Nyabukce ayupu ton nyabuk. “Anyapmasin yupu nirya ara, na ap, anggun ap, neika tuba unmap talak noutamak arye nyapmasine. 26Bukni, Allah El Dib Kanye, anggun talima melina ati, Melinanye bira, Allah arye, na si deice arye el Dib Kanye dopdeipnamsile. Aripsiliba, Allah El Dib Kanye arye aning-aning nirya ati, peterenamsile. Tonda, na nyapdeiyamsise yupu nirya, ‘Tuba tamubuka tenepnamak’ tenen, Allah El Dib Kanye arye tonap nyanamsile.” Yesus arye nyabuk.
27Nyabukce, ayupu ton nyabuk. “Ikin kanye bona kumce, kanye deibuka yuk nang ap neika teleb una ati, deiyok ning aresunune. Sik diba tenena kum, talye tukwak ninye arye, yuk nang ati, tenebuka arye arenyak touk, kum aresunune. Ikin kanye bona kumce, teleb kanye bobuka, teleb una deiyok ning aresunun ning ara, na ninguk aresunune. Aning ati ara, anggunce, ‘Se,’ tenen, ikin kanye bona ap, ilil una ap, ikin kanye bobuka bouku sukuna ap, aning nirya kum unamlulume. Ilil asa kum aniryuk, kanye deibuka telebuk unamlulume.” Yesus arye nyabuk. 28Ayupu nyabukopura, ayupu ton nyabuk.
“Wini talak ara, narye, ‘Na benamne bukni, tamubuka dolyanamsine,’ nyabuka nyanmanu yupu ara, anggun akunum kekepmanulume. Nara, mambulnye unun bukni, na Ni Koprop Allah ara, weik mambulnye ulula anya arye, anggun kanye talima na deice deibuka, nati talima dukdongopnutumtoura, na ni dam binamna ati ara, ‘Ara teleb’ tenen, kanye deipnamlulume.
29Na ni dam min kum binye talak, “Na benamne,” nyabuka akunum laka nyapmasine. Ati, aminyan talak ara dipkoprop anggun batakuka yukak binyopura, anggunce, ‘E, elce nyapdeiamsuk touk akunum winipmale’ tenen, dib tenepnamlulume. 30Tukwak mutuku talibuk, Isa deiyoknye yanamala ati, atalak ara yupu weik tonun ton, kum nyapnusine. Ayanamal malye deiyoknye bira, nati kum malye kibuka bisipnuturye, nati kum talipnutue.
31Bukni, tukwak ninye mutuku-mutuku nirya, ‘E, Yesus ara, el Li Koprop Allah ati dipkoprop kanye talima deibukce, el li koprop arye nyalye touk, aninguk kekebuka winilule, biknamak’ tenen, na naminuk upniba, malye deiyoknye birye el pil dopliba, malye nang arye ikin ning weik, na deice deipnamniyake. Winira akunuma, winira amutuku batakuka bendopnuyabe.” Yesus arye el mapu ati nyabuk.
נבחרו כעת:
Yohanes 14: EIPA
הדגשה
שתף
העתק
רוצים לשמור את ההדגשות שלכם בכל המכשירים שלכם? הירשמו או היכנסו
© 2023, Wycliffe Bible Translators, Inc. All rights reserved.
