Luk 6
6
Sabat deɗnu ɗonu nai
1Aria, Sabat deɗ laappa Jesus Nug nuhikkud ippunittak awak danab ele ag ibppa wit keekenu dad laala ooppa gonana, ippunittak awak danab nuhikkud ag wit ikkilkad laippu laippu aon, aelkad aon lakkulagnu eppelagppa oɗoɗadna lappig. 2Aon laeg amu ɗo gumak danab-Parasia ag heppig, ag amunu inam appig. “Ag aɗinu ɗo nug danab laa Sabat deɗppa ee dattanu ii aoma ippunigtte amu, ag Sabatnu ɗo amu tippalna, ee aon latteb,” aon appig. 3Ag anam aeg amu, Jesus Nug amelagppa aum. “Ag Dawit nug nuhikkud danab ele ag enug aqe daanna, Dawit aɗi heum amu, ag amu iite ebqeppig? 4Haen amuppa Dawit nug Kayak laug ooppa noa, bret Kayaknu tituana mettak daatte, mana mettak danab agib lakkulagnu elele, nug amu awa lana, nuhikkud danab ele mattom,” awa aum. 5Anam awowa Jesus Nug nai tuɗitta ag amelagppa aum. “Danab Bekkalag da, da Sabat deɗnu ikki daattem,” awa aum.
6Deɗ laa, Sabat deɗppa, Jesus Nug Juda dilag nai doyak lakka noa, danab ah nai ippuanattatta, danab laa eppeg naɗiap mauhak ele appa dayeye anttom. 7Ɗo gumak danab-Parasia amu ɗo mehuqak danab ele ag appa daana, Jesus Nug aɗi heeb anidkkulagnu meidppig. Nug Sabat deɗppa danab eppeg mauhak ele ehanitteb, elele dayeb amu, ag Jesus hettoɗiak abenppa mekkulagnu oolag dayom. 8Anam daaegeg, Jesus Nug ahilag dabmak doyaya, Nug danab eppeg nau ele amegppa aum. “Na ahan, danab ah noolagppa hippaidna daye!” awa aum. Nug anam a, danab nug hibaitta dayeye, 9Jesus Nug ɗo gumak danab-Parasia amu ɗo mehuqak danab ele oɗ mattom. “Ɗo ihinig aɗi atte? Ig Sabat deɗppa ena hekkunig am enatai o iitta ig Sabat deɗppa eheɗ hekkunig am enatai? Ig hepput danab mauhkku, amuam enatai o iitta ig hepput, danab laa nug mauhkkunu hette ele, nug elele daakku, amuam enatai?” awa aum. 10Nug anam awowa, Nug neekka, danab oh anattowa, Nug danab eppeg mauhak ele amegppa aum. “Na eppen taiette!” awa aum. Jesus Nug anam a, danab amu nug eppeg taiette, eppeg eɗua, laih bia, ena dayom. 11Aria, danab ag Jesus meidna daappig ele, ag anam anidna, ag Jesusnu oppoɗilag be amelag kokoɗ eppe, akka akka mattinna appig. “Ig Jesus nuhigppa attem hekkunig?” aon appig.
Jesus Nug ippunittak awak danab 12 diiom
12Haen amuppa Jesus Nug tuqan Kayak unuqidkunu qaukoppa nakok teum. Ta, Nug tuqan amu oh unuqittette ukke, wagɗom. 13Wagɗe, aam be, nuhikkud ippunittak awak danab diikkunu oo daye, Nug ag onilagppa e, gumidna uɗieg, Nug danab 12 tituanatta, ag onilag totol danab ataɗom. 14Laa am Saimon. Amu Jesus Nug onig laa, Pita ataɗom. Laa am Andru; nug Saimon ele, aa am eamag. Aria, Jems, Jon ele amu Pilip, Bartolomyu ele. 15Matyu, Tomas ele, amu Jems laa nug Alpius bekka. Amu Saimon laa, nug am Selot. 16Laa am Judas, nug Jems bekka, amu Judas Iskariot ele, nug dimppa Jesus awa, kekeɗ eppelagppa meum.
Jesus nai mehuqaqa, oɗe danab bappalattom
17Amu Jesus Nug nuhikkud totol danab ele ag oh nona gona, Nug wan uɗem enappa hibaitta dayom. Nuhikkud ippunittak awak danab kuɗumnab, amu danab ah kuɗumnab laa, ag Judanu, Jerusalemnu amu, aab okkai aɗit Tair Saidon ele, amu dilah wanppanu ele oh uɗieg daappig. 18Ag nai nuhig dooglagnu, Nug ag oɗe ahilag bappaidkkunu ele uɗippig. Ag uɗin daaegeg, danab laa ag ouɗi nau ele amu, Jesus Nug ouɗi nau amu lamatte ena daappig. 19Danab ah oh ag eppelag bahin, Jesus beɗu aɗaglagnu oolag dayom. Aɗinu? Ag aɗaegeg, nuhig ɠagattag amu beɗulagppa ukka he, danab amu oh ag ena daappig.
20Ag anam heeg amu Jesus Nug ameg huma, nuhikkud ippunittak awak danab amu neekkattatta, Nug aum.
“Ag gemu enulag iitta, ag itittak ena aoppig daatteb.
Aɗinu? Ag Kayaknu ɗo maɗoɗ ooppa daatteb.
21Ag gemu enug aqatte ele, ag itittak ena aoppig daatteb.
Aɗinu? Kayak Nug heeb, ag oolag didikku.
Ag gemu oolagppa uug doon gaatteb ele amu, ag itittak ena aoppig daatteb.
Aɗinu? Ag oolag gamag ahakku.
22Ag Danab Bekkalag da, ag da dim lamiɗtteb ele amu, ag da dim lamiɗtteb amunu, haen danab ag amu dabmetteb, ag ahilagnu oolagppa nau ninig ele doon, ag geɗadna, nai nau ahilagnu anana, ag am danab nau ele atteb amu, ag dahilad amu ag itittak ena aoppig daatteb. 23Danab kobol nau amu hetteb ele, anukka ag mamelkad aɗi, ag Kayaknu propet dilagppa ele anam heppig amunu, ag ahilagnu ele anam heppeg amu, aria ag gamalag huana ahebeb, oolag enaib dayaɗ!
Aɗinu? Nob ahilag hab aabppa am okkainab.
24Amge o gadonnab gadon ag danab enulag ele. Ag dabmeig!
Aɗinu? Ehanittak laala, ag oolag ena daakkunu amu, ag wan imuppa aakku aon malappig.
25O gadonnab gadon ag danab ag gemu ee laeg, oolag diditte ele. Ag dabmeig!
Aɗinu? Geha dimppa ag enug aqakku.
O gadonnab gadon ag danab ag gemu imatteb ele. Ag dabmeig!
Aɗinu? Geha dimppa ag uug doon gaappeg, amelag leb nekku.
26O gadonnab gadon ag danab ag gemu daaegeg, danab ah laa oh ag ag binalag metteb. Ag dabmeig!
Aɗinu? Anukka ag alalkad ag anamib propet hambuppuak dilagppa heppig.
27Amge ag dahil nai dootteb ele, da amelagppa attem. Ag ahilag kekeɗnu amu, ag oolag mauhaɗ! Amu aun aɗi ag ahilagnu oolagppa nau ninig ele dootteb amu, ag kobol ena ahilagppa heig! 28Danab ag na eheɗ laa awaknu anak waappa daakkutnu appeg, ag dahilad amu, ag ahilagnu eɗun anam aib heppig. Iitta! Ag itittak ena matteg! Amu aun laala ag eheɗ hadatteb amu, ag Kayak ahilagnu unuqitteg! 29Am danab laa nug na hippen laih ob, na eɗun nob nau aib mettame. Iitta. Na eɗun hippen laih ele medakkut. Am danab laa nug ⌊na hettoɗiakppa meitta,⌋ lamen elab nahip aweb, na wagai aib meme. Iitta! Na lamen nakok elab nahip ele medakkut. 30Am danab laa nug keeke medakkutnu oɗ metteb amu, na nug mette! Aria, danab laa nug aɗi keeke nahip aweb, na aib eɗua medakkunu wagai meme. 31Amu ag dahilad ag danab ag kobol atten ahilagppa hekkulagnu oolag daatte, ag kobol amuib ahilagppa heig! 32Amge ag danab ag ahilagnu oolag mauhtte ele, ag amu dilagib oolag mauheb, ag kobol amuppa Kayak Nug ag binalag mekkute? Iitta! Hipunin danab ag ele danab ag ahilagnu oolag mauhtte ele, ag amu dilag oolag mauhtte. 33Amu ag danab laa ag kobol ena ahilagppa hetteb ele, ag amu dilagppaib kobol ena heppeg amu, kobol amuppa Kayak Nug ag binalag mekkute? Iitta! Hipunin danab ag ele anam hetteb. 34Amu ag danab lon madappeg, danab lon aoppig ele ag nob eɗun mattaglagnu dabmetteb dayeb, kobol amuppa Kayak Nug binalag mekkute? Iitta! Hipunin danab ag ele anam hetteb. Yo, hipunin danab ag hipunin danab laa nob oh eɗun mattaglagnu dabmenan, lon madatteb. 35Amge ag kekeɗ ahilkadnu ag oolag mauhaɗ! Amu ele ag ahilagppa kobol ena heig! Danab ag ahilagnu lon aoglagnu appeg amu matteg! Mattona, dimppa ag ahilagppa keeke amu eɗun aoglagnu aib dabmeppig. Ag anam heppeg amu, nob ena ahilag am okkai daakku. Ag Kayak Attannab Laa Oh Eɗattak, ag Nug bekkod daaglag. Aɗinu? Nug nuhig oo doyakppa danab laala, ag danab nau, danab nuhignu dab-ii-metteb ele, ag akka ahilagib dabmetteb ele, Nug amu dilag ele keeke ena madatte. 36Amunu ag Mamelag, Nug danab dilagnu oo gai-iitta doya oo metta ehanadtte, amubia ag laa dilagnu oolag gai-iitta doon oolag mattan ehanatteg!” awa aum.
Lailkad epeɗiattaknu nai
37Jesus Nug anam ana, Nug baula aum. “Ag laa dilag ⌊oo ɠagattagppa⌋ aib epeɗiadppig. Ag anam epeɗiadkkulag dayeb amu, ag ele epeɗiak amubia aoglag. Ag nai laa beɗulkadppa aib yaappig. Ag anam hekkulag dayeb, laa ag nai ag beɗulkadppa ii yaamna. Ag laa dilag hipunin uhuqna matteg! Ag anam hekkulag dayeb amu, laa ag ahilag hipunin uhuqna mattaglag. 38Ag danab keeke madappeg amu, laa ag eɗun ag keeke mattaglag. Ag keeke ambeeb, ye noak dayeb, baubau ineb amba gokkaɗebeb aoglag. Ag lailkad dilagnu aɗi melemelppa keeke hetteb, ag melemel amuppaib geha keeke aoglag,” awa aum.
39Jesus Nug anam ana, Nug nai tuɗitta keeke danab ag dootteb ii dootteb ele ouaqata ippuanatta, nai laa inam ele amelagppa mattia aum. “Danab ameg gaɗuak, nug layag ele ameg gaɗuak amu, laa nug laa ib ippunidkkunu elelete? Iitta. Nug anam heeb, aa oh goya, moɗppa neya qekkulah. 40Ippunittak awak danab nug ippunittak danab nuhig ii eɗidtte. Nug ippunittak nai oh awa malowa amu, nug ippunittak danab nuhig bia daakku.
41Aɗinu na layap amegppa ad huppu nagnag gikkiakppanu daatte, na amunu neegttem, amge na nakka amenppa ad imuag laa daatte, na amunu dab-ii-mettem? 42Na dabmak attem aona, na layap amegppa, ‘Lai, da ad huppu nagnag gikkiakppanu na amenppa daatte amu aokkulnu hettem,’ attem? Na anam attem, amge na nakka amenppa ad imuag dayakib daatte amu, na ii anidttem. Na am hambuppuak danab! Tatam na ad imuag na amenppa daatte mautppe na ukkeb, na pehettan neegnana, na layap amegppa ad huppu nagnag gikkiakppanu amu maute!” awa aum.
43Ana amu, Nug baula aum. “Ad ena nug meu nau ii otte, amubia ad nau nug meu ena ii otte. 44Danab ag nuhig meuppa ad anidna dootteb. Danab ag ad fig meu ad naunau qaun eleppanu ii aotteb; ag grep meu amu uud qaun eleppanu ele ii aotteb. 45Am danab ena, nug ooppa dabmak ena kuɗum niitte, amuppa nug kobol ena he bette, amge eheɗ hak danab nug ooppa dabmak eheɗ kuɗum niitte, amuppa nug kobol eheɗ he bette. Aɗinu? Danab nug ooppa aɗi dabmak ambak niitte, amuib amu oɗeppa ele maditte.
Jesusnu nai awa oiyaknu ippunittak nai
46Aɗinu ag dahilnu, ‘O Naɗi, O Naɗi,’ aon atteb, amge ag dahil nai dim ii lamidtteb? 47Amu danab laa nug da gumiɗa uɗia, nai dahil doya dim lamidtte ele, da nuhig kobol amunu ag inam ippunadppi anidna oolag maidkku. 48Nug am danab laa nug lag buukkunu ha, nug tatam moɗ awe, uma noa ukke, wan ooppa men qaɗeppa lag ukku aɗe, men aɗa dayeye, aria dimppa nug amu attan lag heum bia daatte. Danab amu nug lag anam heum amunu, dimppa le ui na duttune, lag na qekkunu elele iitta dayom. Aɗinu? Danab nug lag ena elele heum. 49Amge danab nug nai dahil doya ii dim lamidtte ele, nug am danab laa lag hamu wanppaib he dayom bia. Nug wan ooppa men qaɗeppa lag ukku ii aɗom amunu, dimppa le ui na, lag amu duttune, pahanab na qa, loppaɗa iitta meum,” awa aum.
હાલમાં પસંદ કરેલ:
Luk 6: NB
Highlight
શેર કરો
નકલ કરો
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
