Luk 5
5
Jesus a amu Pita nug kakai kuɗumnab awom
1Deɗ laa Jesus Nug le ameg Genesaret, le amu ihippa hibaitta dayeye, danab ah kuɗum ag Kayak nai dooglagnu uɗin itun daaegeg, 2Nug uub nakok aɗit laa le ameg ihippa eeɗya daaeheh anatom. Kakai awak danab ag uub aɗit amu uuatna nena, uhui ihaladna daappig. 3Amu Jesus Nug uub aɗit daapiɗ oolahppa laippu laa, uub amuam Saimonnu, amuppa oola teum. Nug ta, Saimon nug uub le ihippanu duttuneb, nakok wakkunu amegppa a, nug anam he amu, Nug uub attan dayaya, danab ah nai mattom.
4Nug nai matta malowa, aria nug Saimon amegppa aum. “Uub el qeppe, le gamag okkaippa wab, ag uhui kakai aoglagnu ewatteg!” awa aum. 5A amu Saimon oɗeppa awa aum. “Danab Naɗi, tuqan imu ohppa ig uɗat naɗi hemut, amge ig kakai laa ii aomut, amge na ame amunu da uhui ekkul,” awa aum. 6Nug anam a amu ag Jesus aum bia heeg, kakai huanak noeg, uhui pagukkunu heum. 7Anam anidna, ag ahilkad uɗat laippu, uub laappa daappig amu, ag dona ehanadkkulagnu eppelagppaib onilagppa eppig. Eeg doeg, uub aɗit ohppa kakai amu inappig. Inaeg, uub aɗit amu oh tuadiglahnu hepiɗ.
8Anam amu, haen Saimon Pita nug kakai anam aona antta amu, nug Jesus baegppa laippun gateg qaun o, nug aum. “Naɗi, na da uuiɗna ukke! Da hipunin danabde,” awa aum. 9Nug kakai huanak aoppig amu anttom amunu nug ottaia dabmak kuɗum awom. Danab laa nug ele oh daappig, ag ele anamib dooppig. 10Sebedi bekoɗ aɗit, Jems, Jon ele, aa Saimon ele layam batan uɗat laippu heppig ele amu, aa ele ottaiya, dabmak kuɗum aopiɗ, Jesus Nug Saimon amegppa aum. “Na aib baɗame, geha dimppa ele uɗat laappa na danab ah anam bia diiadkkut,” awa aum. 11Aria ag uub eeɗateg, audam teeh, ag keeke amu oh uuadna, ag gona, Jesus dim lamidppig.
Jesus danab aɗit bappalatom
12Jesus Nug aab laappa oiyeye, danab laa gaɗa oɗe nau ambak ele, nug ele appa oiyom. Nug oiyaya, haen nug Jesus antta amu, nug Jesus noobppa laippun gateg qaun o, gomela, iɗu wanppa ma, unuqa aum. “Naɗi, na oot heeb, na heppe, oɗe dahil iitta mekkunu amu, na elele daattem,” awa aum. 13A amu Jesus Nug eppeg bahia, danab aɗa, amegppa aum. “Da ool anam daatte, na ena daye!” awa aum. Aria, geha aakku pahanab gaɗa oɗe nau amu uuittom. 14Uuitte amu Jesus Nug danab amu amegppa aum. “Na danab laa amegppa da na bappaidminu aib ame! Iitta. Na gona, na beɗun mana mettak danab ippunidna, na Mosesnu ɗo atte bia, na doɗ main, Kayak mette! Aɗinu? Danab oh ag amuppa dooglag, na oɗe amu iitta,” awa aum. 15Nug anam aum, amge Jesus Nug keeke heumnu nai amu ukke, ag tuɗitteg ukke, oh doona, danab ah kuɗumnab ag ahan, Jesusnu nai dooglagnu, Nug oɗe ahilag bappaladkkunu ele uɗippig, 16amge Nug haen kuɗum aben laih, danab ii daattebppa ukka, Nug unuqidttom.
Jesus nug danab eppeg baeg ele mauhak dayom amu, Nug nug babaittom
17Deɗ laa Jesus Nug danab ah nai ippuanattatta dayeye, ɗo gumak danab-Parasia amu ɗo mehuqak danab ele, ag Galilinu aab ohppanu, Judanu, amu Jerusalemnu ele uɗin daaegeg, Jesus Nug nai mehuqom. Naɗinu ɠagattag am Jesus Nug oɗe danab heeb ena daaglagnu ele nuhigppa dayom. 18Dayeye, danab laala ag lailag oɗe ele, nug baeg eppeg mauhak ele, ag nug qaɗaqaɗppa maon uɗippig. Ag maona, lag ooppa nona, Jesus gumidna wana mekkulagnu heppig, 19amge lag ooppa aben oh danab ah kuɗum ituak daaegeg, ag oɗe danab maon nokkulagnu ib iitta amunu, ag lag attan tena, lag amu koɗokko uɗem ukkak ele amunu ag tena, lag koɗokko loppaɗna, danab qaɗaqaɗppa niieye, ag nug paɗaeg, danab oh oolagppa Jesus noobppa meeg, noa dayom.
20Meeg dayeye, Jesus Nug ahilag ooppa genab doyak antta, Nug oɗe danab amegppa aum. “Layal, nahip hipunin oh amu da uhuqe medattem,” awa aum. 21Nug anam a amu ɗo mehuqak danab amu ɗo gumak danab-Parasia ele appa daana, ag akka akka dabmakppa inam appig. “Danab imu amu Nug am aun? Nug nai umu atte amu Nug Kayaknu dabittak nai maditte. Kayak Nug nukka hipunin uhuqa megakkunu elele,” aon appig. 22Aeg, Jesus Nug nuhig dabmakppa ahilag dabmak amu doya, Nug ag amelagppa aum. “Aɗinu ag dabmak anam ele? 23Aɗi nai am anaknu uug iitta? Hipunin uhuqa mettaknu nai, amute am uug iitta o iitta aha tappa ukkaknu nai, amutai am uug iitta? ⌊Amu oh iitta. Danabib am aɗit oh hekkunu elele iitta⌋ 24amunu, ag Danab Bekkalag da, da wan imuppa hipunin uhuqen madakkulnu ɠagattag ele, ag amu dooglagnu amu da heppi, aha gokku,” awa aum. Jesus Nug anam ana amu Nug eɗua, oɗe danab amegppa aum. “Na ahan, qaɗaqaɗ nahip aon, lakka ukke!” awa aum. 25Nug anam a amu oɗe danab nug paha aha, niiak qaɗaqaɗ nuhig awa, ag noolagppanu dimittim ukka, laugppa taata, Kayak binag meum. 26Ugekke amu danab ah oh ag dabmak kuɗum aona, Kayak binag mena, ag nuhignu ebehilkad oh bodoetta le me, ag appig. “Gemu ig kobol imu laanab anidmut,” aon appig.
Jesus Lewi onigppa eum
27Aria, dimppa Jesus Nug aha oiyaya, Nug takis awak danab laa, onig Lewi, nug takis awaknu lakka dayeye anttom. Jesus Nug antta, amegppa aum. “Na dona, da dim lamiɗe!” awa aum. 28Nug anam a amu Lewi nug aha, nuhig keeke oh uuattowa, Jesus dim lamittom.
29Dim lamitta, nug Jesusnu ee naɗi laugppa he, amu takis awak danab laala kuɗum ele ag uɗieg ag ele daanna, ee lappig. 30Laegeg amu ɗo gumak danab-Parasia amu ɗo mehuqak danab laala, ag ɗo gumak danab-Parasia huuppa daappig ele amu, ag ele Jesusnu ippunittak awak danab noolagppa nai hena, amelagppa appig. “Aɗinu ag takis awak danab, danab ag ihinig ɗo oh ii dim lamidtteb ele, ag ele oh daanna ee, le ele latteb?” aon appig. 31Anam aeg amu Jesus Nug ag amelagppa aum. “Danab nug oɗe iitta, nug dokta toppa ii gotte. Iitta. Danab oɗe ele nug gotte. 32Amubia amu da heppi, genab tutukku hak danab ag oolag eɗukkunu ii uɗimi. Iitta. Da heppi, hipunin danab ag oolag eɗukkunu uɗimi,” awa aum.
Ee ohnu kud ma dayaknu nai
33Amu laala ag Jesus amegppa appig. “Layattak Jonnu ippunittak awak danab ag am deɗ kuɗum ee ohnu kud mena daanna, hanhan unuqidtteb. Amu ɗo gumak danab-Parasia dilag ippunittak awak danab ag ele anamib hetteb, amge ippunittak awak danab nahipad ag amu anam ii hetteb, ag hamu ee le ele latteb,” aon appig. 34Ag Jesus amegppa anam appig amu Jesus Nug aum. “Da am danab nug ah aotte bia. Aria, dahil ippunittak awak danab, ag am da lailad. Amu ig doottem, ewau matulak haen am oo gamag ahak ele amunu, danab nug ah aotte, nug daatte haenppa nug laikkud ag ee ohnu kud mena daaglagnu am iitta. Ag oolag gamag ahak ele amunu, ag ee ii uumna; ag lakkulag. 35Anam aakku daatte, amge deɗ laa dimppa ag lailag, ah awom ele amu, nug laih ukkeb, haen amuppa ag oolag uug ele amunu, ag ee ohnu kud mena daaglag. Amu da ami, amubia. Da am danab ah aotte bia. Dahil ippunittak awak danab ag am da lailad bia. Da gemu ag ele daattem amunu, ag ee ohnu kud mena daaglagnu elele iitta. Dimppa da goppi, ag anam hekkulag,” awa aum.
36Amu Jesus Nug tuɗitta, keeke danab ag dootteb ii dootteb ele ouaqata ippuanatta, nai laa inam amelagppa aum. “Danab nug lamen qatti bau awa, lamen alagnu giɗo amuppa tona ii koit-tte. Iitta! Nug anam helo amu, dimppa nug lamen iheb, lamen qatti bau nug eɗua nakok eppa, lamen alag eeɗeb, giɗo okkai ele daakku. Ele amu lamen bau, lamen nau alag ele am nakok laippu iitta,” awa aum. 37Anam ana amu Nug nai baula inam ele aum. “Laa ele amu, danab nug grep leppu bau doɗ gaɗa nippud alagppa ii inatte. Nug anam helo amu grep leppu nug eɗua wain baaba, titiɗa heebeb, doɗ gaɗa nippud alag nug ɠagattag eppom, okkai mekkunu elele iitta amunu, nug aoɗeb, wain amu doɗ gaɗa nippud ele oh iitta mekkulah. 38Ag anam ii hetteb. Danab nug grep leppu bau am doɗ gaɗa nippud bauppa inaglagnuib daatte. Ag anam hekkulag dayeb amu, grep leppu amu doɗ gaɗa nippud ele am ena daaglah,” awa aum. 39Jesus Nug anam ana, Nug nai tuɗitta aum. “Amu danab nug wain alag lanana amu, nug wain bau hak amu lakkunu oo uutte. Uua nug atte. ‘Wain alag nug lanak ena,’ awa atte,” awa aum.
હાલમાં પસંદ કરેલ:
Luk 5: NB
Highlight
શેર કરો
નકલ કરો
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
