Luk 7
7
Jesus ban daup 100 dilag ikkinu maɗi nid he, ena dayom
1Jesus Nug danab ah keeke amu oh amelagppa awowa, aria Nug Kaperneam ukkom. 2Amu Rom danab laa, nug ban daup 100 dilag ikki amu, nuhig maɗi nid laa, nuhignu oo huan hette ele, nug oɗe ma mauhkkunu heum. 3Nug anam dayom amu ban daup 100 dilag ikki nug Jesus appa uɗiom doya, nug Juda dilag ikki danab laala ag gona, Jesus oɗ medappeg uɗia, maɗi nid nuhig amu heeb ena daakkunu he goppig. 4Ag Jesus gumidna gona, ban daup ikkinu oolag unuqagppanu unuqnana appig. “Nug am danab ena, na nug ehanidkkutnu elele. 5Aɗinu? Nug am ig Juda ihinignu oo mauhtte. Nug nukka ihinig nai doyak lag amu buuom,” aon appig. 6Anam aeg amu Jesus ahe, oh gona guguittegeg, ban daup 100 dilag ikki nug laikkud laa Jesus appeg dookkunu amelagppa a, ag gona, nug aum oɗe Jesus amegppa appig. “Naɗi, na uɗat okkai aib heme. Da am danab enate na uɗin, da laul ooppa nekkut? 7Am da ele da doottem, da danab ena iitta amunu, da na gumitten gokkulnu da elele ii doomi, amge na uɗat nid dahil eɗua ena daakkunu na amunu naiib appe amu, maɗi nid dahil nug eɗua ena daakku. 8Da amu doottemnu diig am, da ele uɗat imunu danab okkai waalagppa daaiyi, ag da gumiɗegeg, amu dahilad daup ag da waalppa ele daatteb. Amu da laa amegppa, ‘Na ukke!’ ai, aria nug gotte. Amu da laa amegppa, ‘Na do!’ ai, aria nug dotte. Da dahil maɗi nid ele amegppa, ‘Na uɗat imu he!’ ai, aria nug hette amunu, na naiib appe, keeke amuam bekku doottem.” Danab amu ag okkai ahilag oɗe amu aon, Jesus amegppa appig. 9Ag anam aeg, Jesus Nug doya, Nug dabmak kuɗum awawa, Nug eɗua, danab ah kuɗum Nug dim lamidppig ele amu, Nug ag amelagppa inam aum. “Da ag amelagppa attem. Da Israel danab oolagppa ooppa genab doyak imubia amu, da laa ii anidmi,” awa aum. 10Aria, danab ban daup ikki nug he, ag Jesus toppa goppig ele, danab amu ag eɗun nug laugppa gona, maɗi nid nuhig amu eɗua ena dayeye anidppig.
Jesus Nug Nain nid maɗettom
11Amu nakok dimppa Jesus Nug aab laa onig Nain ukke, nuhig ippunittak awak danab amu danab ah kuɗumnab ag Nug ele oh goppig. 12Nug ukka, aab amunu aɗnu od okkai amu guguitta noono, ag danab mauhak laa maon doppig. Danab mauhom nug anig am ah qab, nug bekka laippu amu aakkuib. Amu danab ah kuɗumnab aab amuppanu ag ah amu, nug ele uɗippig. 13Haen Jesus Nug ah amu antta, nuhignu oo bodoetta le me, Nug ah amu amegppa aum. “Na aib gaame,” awa aum. 14Anam ana, Nug qaɗaqaɗ maoppig amu gukkuitta wana, eppeg bahia, danab mauhak niiom ele qaɗaqaɗ amu aɗe, danab qaɗaqaɗ maoppig ele, ag hippaidna daappig. Daaegeg Jesus Nug aum. “Nid bau, da attemde, na ahe!” awa aum. 15Anam a, danab mauhom amu eɗua aha dayaya, nai mattie, Jesus Nug eɗua awa, anig mettom. 16Danab ah oh ag amu anidna, ag Kayaknu ebehilkad oh bodoetta le me, ag Kayak binag mena appig. “Propet naɗi laa ig oonigppa uɗiom. Kayak Nug ig ehanigkkunu uɗiom,” aon appig. 17Amu danab ag Jesus keeke heum, ag amunu mattieg ukke, Juda wan ohppa, amu wan laala Juda talilittak ele ukke, appan danab ag dooppig.
Jonnu danab aɗit Jesus gumidya gopiɗ
18Ag Jesus heumnu mattiegeg amu, Jonnu ippunittak awak danab ag keeke amu ohnu nug amegppa aeg doyom. Doya amu Jon nug nuhikkud ippunittak awak danab aɗit onilahppa e, gumidya doeh, 19aa goya Jesus inam oɗ mettaglahnu aum. “Danab laa uɗikkunu aeg doomut am na aakkute o iitta ig laate ameg mekkunig?” Nug anam amelahppa ana, nug he gopiɗ. 20Anam amu, danab aɗit amu aa Jesus gumidya goya apiɗ. “Layattak Jon nug he, i na oɗ mettagnihnu gumidɗa uɗimuɗ. Oɗmak am inam. ‘Danab laa uɗikkunu aeg doomut am na aakkute o iitta, ig laate ameg mekkunig?’ ” aoya apiɗ. 21Haen amuppanab Jesus Nug danab ah kuɗum ag oɗe digdig ele amu he ena daaegeg, Nug ouɗi nau kuɗum lamattatta, ameg gaɗuak kuɗum Nug he, ag amelag oppate ag neegppig. 22Amunu Jesus Nug ahilah nai amu eɗua nob ma amelahppa aum. “Aa goya, gemu aa aɗi anidpiɗ, aɗi daulahppa doopiɗ ele aakkude Jon amegppa apeɗ doyaɗ! Danab ag amelag gaɗuak ag eɗun neegtteb, baelag nau autaut oitteb amu, ag ena oitteb, gaɗalag oɗe nau ele amu, oɗe amu iitta mette, daulag ituak amu, ag eɗun nai dootteb, danab mauhppig ele, ag eɗun bau daatteb, amu daɗek danab ag Nai Ena dootteb. 23Amu danab aun nug nuhig ooppa genab doyak dahilnu ii paɗe nette amu, nug itittak ena awom daatte,” awa aum.
24Am danab aɗit Jonnu nai aoya uɗipiɗ ele aa eɗuya ukkaeheh, Jesus Nug danab ah kuɗum appa daappig amelagppa Jonnu aum. “Ag anukka Jon gumidna atu taɗakppa goppig amu, ag aɗi keeke anidkkulagnu goppig? Ag keeke gai-iitta, qaittobttob bia, ulah he uɗaltte amu anidkkulagnu goppigte? Iitta. 25Anam daatte dayeb, ag aɗi anidkkulagnu goppig? Ag gona danab laa lamen enanag, kobol ele takkom anidkkulagnu goppigte? Iitta. Danab ag lamen enanagnab, kobol ele tagatteb, ag enulkkadppan keeke kuɗumnab aon latteb ele amu, ag king laulkad enanagnabppa daatteb. 26Anam daatte dayeb, ag aɗi keeke anidkkulagnu goppig? Ag Kayaknu propet laa anidkkulagnu goppigte? Da ag amelagppa attem, ao, ag propet anidkkulagnu goppig, amge nug propetib iitta. Nug propet uɗat aakkuib haknu iitta. Nug uɗat laa ele. 27Nug am laa, Kayak Nug nuhignu a, propet laa nug Kayak oɗe awa, Kayak naippa yom daatte. Nai amuam inam. ‘Antte! Da heppi, dahil nai awa ukkak danab laa nug anuqa ukka, nahip ib na noomppa bappaidkku.’ ” 28Jesus Nug anam awowa, Nug nai tuɗitta aum. “Da ag amelagppa attem. Danab oh ah oolkadppanu doppig elenu laa nug Jon ii eɗittom, amge danab laa nug Kayaknu ɗo maɗoɗ ooppa danab nakokib daatte, nuhig itittak ena amu Jonnu eɗidtte,” awa aum.
29Danab ah oh, amuam takis awak danab ele, ag Jonnu nai dooppig amunu ag, “Kayak Nug tutukkuib hette,” aon anana, ag Jon eppegppa layattak aoppig. 30Amge Juda dilag ɗo mehuqak danab amu ɗo gumak danab-Parasia ele ag amu, ag Kayak Nug ib ena ippuanattom amu ag uun dimettan, Jonnu layattak ii aoppig.
31Jesus Nug anam ana amu Nug nai tuɗitta aum. “Da danab ah haen geha imunu da ahilagnu aɗi bia akkul? Ag am aɗi danab? 32Ag am nid naunau ee oɗiak abenppa daanna, ameg laa amu ameg laa amelagppa enana, ‘Ig ahilagnu dumuttum iwalmut, amge ag ahi ii edappig. Ig ahi oo doyak ele ettamut, amge ag ii gaappig,’ atteb amubia hetteb. 33Aɗinu? Layattak Jon nug uɗia, nug ee digdig ii laum, wain ele ii laum amunu ag, ‘Nug beɗuppa ouɗi nau ele,’ aon atteb. 34Aria Danab Bekkalag da, da uɗien, ee le ele lattem amunu, ag atteb. ‘Antteg, nug ee huanak lanana, wain ele huanak latte. Nug laikkud am takis awak danab, amu danab laa ag ig Juda, ihinig ɗo oh ii dim lamidtteb ele,’ aon atteb. 35Amge doyak dabmak ena ele am keeke genab amu, ag nuhig hakppa genab anidkkulag,” awa aum.
Ah Jesus baegppa goɗen gokkaɗom
36Amu ɗo gumak danab-Parasia laa nug Jesus ele ee lakkulahnu Jesus onigppa e, nug laugppa ukke, aa ee lakkulahnu daapiɗ. 37Daaeheh, aab amuppanu hipunin ah laa nug “Jesus uɗia, ɗo gumak danab-Parasia laugppa ee latte,” amu doya, nug men id enanag leppu muttuɗig enanag inak ele laa awa uɗia, 38Jesus baegppa, guguitta dimugppa hibaitta gayaya dayom. Ameg leb gokkaɗa, Jesus baegppa ne amu, ikki uɗugppa oppiaya, Jesus baeg ootuqittowa, leppu muttuɗig enanag ele Jesus baeg gokkaɗ qettom.
39Amu haen ɗo gumak danab-Parasia, Jesus onigppa e uɗiom ele, nug keeke amu antta, nug inam dabmakppa aum. “Danab umu Nug genab propetlob amu, ah umu eppeg bahia aɗatte amu, Nug nuhig kobol ele doolo. Ah umu nug hipunin ah,” awa aum. 40A amu Jesus Nug danab amu nuhig dabmakppa anam aawo doya, Nug nai mattia aum. “Saimon, da nai laa madippi na dookkutnu ool daatte,” awa aum. Awa a Saimon nug aum. “Ippunittak danab, nahip nai amu mehuqe!” awa aum. 41Anam a amu Jesus Nug nai imu mattia aum. “Danab aɗit laa aa danab laanu lon aopiɗ. Danab laa nug nuhig lon amu silwa men doɗo 100, amu laa nuhig lon am silwa men doɗo 10 ele. 42Amu aa oh lon ahilti amu eɗuglahnu elele iitta amunu, danab amu nug ahilah keeke nob amu eɗua aokkunu uua, uhuqa matom. Aria, aa oolahppa danab aun nug danab lon matom, nuhignu oo okkainab mauhkku?” awa aum. 43Awa a amu Saimon nug Jesus nai mattie doya, oɗeppa awa aum. “Dahil dabmakppa amu, danab okkai nug danab laa lon okkai uua, uhuqa mettom ele, nug am anam dookku,” awa aum. A amu Jesus eɗua amegppa aum. “Dabmak amu tutukku, na nob elenab meme,” awa aum.
44Jesus Nug anam ana amu, Nug eɗua, ah neekkittatta, Saimon amegppa aum. “Na ah imu anidttem. Da na laut ooppa nemi amu, na le aon dona, da bael ihaknu ii meɗame, amge ah imu nug ameg lebppa da bael iha, nug ikki uɗugppa oppiom. 45Na da ii ootuqilme, amge da lag ooppa nei, haen amuppa ah imu nug digma, da bael ootuqittatta daatte. 46Amu na da ikkil goɗen ii laaidme, amge ah imu nug leppu muttuɗig enanag ele awa uɗia, da bael gokkaɗ qettom. 47Amunu da na amenppa attem. Nug hipunin kuɗum heum amu, nug amunu uhuqak awom daatte amunu, Nug dahilnu oo huanak mauhtte. Amge danab nug hipunin nakok ha, hipunin uhuqa mettak aotte amu, nug oo mauhak nakokib dootte,” awa aum. 48Nug anam ana amu, Nug ah amegppa aum. “Na hipunin nahip uhuqa mettak aome daattem,” awa aum. 49Jesus Nug ah amegppa nai anam a amu, danab nug ele oh balalppa daappig ag akka akka nai mattin appig. “Nug am danab aun; Nug hipunin uhuqa mettak danabte?” 50Anam aeg amge Jesus Nug baula ah amu amegppa aum. “Na ootppa genab doome amunu, na Padal ii maknu ehanittak aome daattem. Na maɗoɗ ele ukke!” awa aum.
હાલમાં પસંદ કરેલ:
Luk 7: NB
Highlight
શેર કરો
નકલ કરો
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
