Luke 17
17
1Sui nia ka soree isana toa ne toleda, Kera tooa u boo sa si do ni faataofai la ki kai fula: sui taa la kai thauṉia wane eri, na si do eki kai fula sulaania! 2E lea ana wane eri mada sa kera tarufai nia gwa fau ni maga lana uiti i luana, ma keka naṉa ania i la amali, una eri e lea ka tatha ana sa nia kai adea ta wela ana wela faekwa nei ki kai taofai nia. 3Muki beta suli kamulua: mada sa dooramu e abula taa iamu, oki sore nia; ma mada sa nia akeletania manatana, oki manata lubea. 4Ma mada sa nia abula taa iamu fiu si maṉa afa thato, ma fiu si mana afa thato eri kai akele uri oe, kai una eri, Nau ku akeletania manataku; oki manata lubea boo.
5Ma aposela ki kera soree isana ṉa Lord, Oki safua fitooa kamilia. 6Ma ṉa Lord ka sorea, Mada sa amulua fitooa ka ’uria ta foee masitata, do muki soree isana sikamine nei, Keki lafu fa laila ani oe, ma keki fasi oe i la amali; ma do eri kai ade sulia ṉata lamulua. 7Ma ni tei iamulua, ne ana ta wane ni ra kai nia theegano mado kai fono toi kalia sifi, na kai soree isana, si maṉa eri u boo ne fula faisia i la ra, Lae mai, oki teoreri isana faṉa la; 8Me ai si soree isana, Oki naarea si do kwai ania i thaulafi, ma oki kania liitamu, oki fale iaku, kwai faṉa ma kwai kuu; sui iburiana oki faṉa ma oki kuu? 9Nia kai sore lea ana wane ni ra eri uria ne ilia si do na kera soree isana? Manataku soso e ai. 10Una eri lau boo ni kamulua, lalae mulu ilia naa si do eki sui bana na kera soree isamulua, muki sorea, Kamilia toa ni ra na misi lea uria ta si do; mili ilia bamilia si do ne lea na miki ilia maana si do.
11Ma lalae mai, si maṉa nia kai lae uri Jerusalema, nia ka tatha i maalutana i Sameria ma i Galili. 12Ma si maṉa nia kai lae i la tee toaa faekwa, tee akwalee wane na uru e thauṉida keka toda ania, keki takwe da mai: 13Ma keka ’ai baita, keka sorea, Jesus, Wane Inoto, oki tatakomi kamilia. 14Ma si maṉa ne rikida, nia ka soree isada, Lae, muki fatai kamulua isana wane ni foa ki. Ma lalae, si maṉa na keki lae, kera faafaluda. 15Ma tee wane iada, si maṉa ne rikia na nia maruki naa, ka oli buri, ka ’ai faamau, ka taṉoa tha God; 16Ma nia ka aru fafia maana isana aaena, ka sore lea iana: ma nia wane i Sameria. 17Ma tha Jesus e luua, ka sorea, Ta na sa akwalee wane kera faafaluda na ba, mado? ma sikwa nonii wane ba ki kera nifei? 18E ai kesi rikia lau ta wane si oli mai uria sore lea la talea tha God, talitoona boo wane kwaita nei? 19Ma nia ka soree isana, Tatae, oki lae amua: fitooa oe e faamaruki oe.
20Ma si maṉa na Farisi ki keki soetoona, uria si maṉa na tooa tha God kai fula, nia luuda, ka sorea, Tooa tha God e ai si fula mai ana lae la na keki rikia: 21Me ai kesi sorea lau boo, Lio fasi, ni kunei! mado, Ni kula loko! uria rikia fasi, tooa tha God ni maalutamulua.
22Ma nia ka soree isana toa ne toleda, Fa boṉi ki kai fula, na toto muki thathamii rikia ta tee fa boṉi afa boṉi Kaluwane imole ki, ma musi rikia. 23Ma toto keki soree isamulua, Rikia fasi, kunei! mado, Rikia fasi, kula loko! musi lalae kau, ma musi lae iburiada: 24Sulaania e ’uria na manu, si maṉa ne manu mai ata bali ifara thalo, e sina ka fula ata bali ifara thalo; Kaluwane imole kai una eri lau boo afa boṉi nia. 25Ma totonao nia kai to ana taa la oro ki e ai si ei boo, ma unii wane nei maṉa eri keki lalakwatania. 26Ma ’uria si do ne fula asi maṉa na tha Noa e toto na ba, kai una eri lau boo asi maṉa Kaluwane imole. 27Kera faṉa, kera kuu, kera tolekini, kera toowane, ka fula ana fa boṉi na tha Noa e tae i la aka, ma kafo ka olo fafia fanua, ma ka labatanida ka sui. 28Una eri lau boo e ’uria si do ne fula asi maṉa na tha Lota e toto na ba; kera faṉa, kera kuu, kera usisia do ki, kera usisi asi do ki, kera fafasi, kera kakasia biu ki; 29Ma afa boṉi eri na tha Lota e lae kau faisia Sodoma si era bia fau na thasune makwa fifi ka aru mai faisia thalo lo, ka labatanida ka sui: 30Kai una eri lau boo afa boṉi na keki fatai nia Kaluwane imole. 31Afa boṉi eri, wane ne ni fafo biu, ma do nia ki ka ni la biu, nia si sifo uria ṉali lana: ma una eri lau boo wane ne ni la ra si oli lau mai. 32Manatatoona kwai tha Lota. 33Ni tei bana na kai rofe uria faamaruki lana maṉona, maṉona kai aana: ma ni tei bana na kai faaaana maṉona kai faamarukia. 34Nau ku soree isamulua, Afa rodo eri ro wane keki ni la tee thamataia; ta wane keki ṉalia, ma ta wane keki akwasia. 35Toto ro kini keki ra ofu ana maga lana uiti; ta ai keki ṉalia, ma ta ai keki akwasia. 36Toto ro wane keki ni la ra; ta wane keki ṉalia, ma ta wane keki akwasia. 37Ma kera luua, keka soree isana, Ifei, Lord? Ma nia ka soree isada, Kula eri bana na do mae ni iei, kula eri afa ki keki ofu mai iei.
હાલમાં પસંદ કરેલ:
Luke 17: MLU1949
Highlight
શેર કરો
નકલ કરો
Want to have your highlights saved across all your devices? Sign up or sign in
British and Foreign Bible Society 1949, 1951
