Luke 16
16
1Ma nia ka sorea lau boo isana toa nia ne toleda, Tee nonii wane rikii do, ne ana tee wane na nia kai takofale nia asi do ki; wane eri kera faaroṉo ania na nia e fakoka si do nia ki. 2Ma nia ka aili nia, ka soree isana, Nifana ade lana na nau ku roṉoa si do eri suli oe? faaroṉo fasi asi do eki na kera takofale oe ania; uria na kera lufia osi ra lau asi do eki. 3Sui wane eri na kera takofalea asi do ki ka sorea i ruruuna, Si ta na kwai ilia, uria na wane inoto nau kai ṉalia si ra eri faisi nau? e ai kwasi talaana ili lana theegano; gani la seeku e noni ania. 4Ku thaitoomana si do na kwai ilia, fasi, lalae kera lalakwatai nau faisia ra ba, keki thathagoni nau i biu kera ki. 5Mania nia ailia toa eki sui boo na kera ṉali laṉa ana wane inoto nia, ma ka soree isana wane totonao, Fita si do no ṉali laṉa ania ana wane inoto nau? 6Ma nia ka sorea, Tee talanee mae do ana gwai. Ma nia ka soree isana, Nalia leta ana do no ṉali laṉa ania, ma oki ono fofoa, oki keda lima tafulu do. 7Ma nia ka soree isata wane lau, Ma ni oe, fita si do no ṉali laṉa ania? Ma nia ka sorea, Tee talaṉee mae do ana uiti. Nia ka soree isana, Ṉalia leta oe, oki keda kwalu tafulu do. 8Ma wane inoto nia e taṉoa wane eri ne ai si kokoto na kera takofale nia asi do ki, uria nia abula ana liotooa: uria na kaluwane ana kada nei ki liode too ka tatha ana kaluwane ana lalaa la ki asi do ana unii wane kera ni u boo. 9Ma nau ku soree isamulua, Muki ilia si do ana inotoa ne ai si kokoto fasi keki ado bi kamulua fafia; fasi, lalae e sui, keki thathagoni kamulua i la biui maku ki na kai to tatha. 10Wane ne mamana asi do faekwa asia boo e mamana lau boo asi do oro: ma wane ne ai si kokoto asi do faekwa asia boo e ai si kokoto lau boo asi do ne oro. 11Mania mada sa musi mamamana ana inotoa ne ai si kokoto, ni tei na kai takofale kamulua ana inotoa ne mamana? 12Ma mada sa musi mamamana asi do ta imole eeta, ni tei na kai falea si do kamulua ki ni u boo ifamulua? 13Ta wane ni ra sa ka ra ata ro wane inoto ki e ai: uria na mado e ai nia kai rikia ta wane ka taa bana, ma kai liothau ana ruana wane; mado nia kai roo ata wane, ma kai fare faekwa ata wane. Kamulua sa muki ra ifatha God ma inotoa e ai.
14Ma Farisi ki lau boo, toa na kera liothau ana malefo, kera roṉoa si do eki sui boo; ma keka sumakwa ania. 15Ma nia ka soree isada, Kamulua toa na mulu tala sorea inaofana imole na mulu kokoto; ma tha God e thaitoomana ruruumulua: uria si do na kera faabaita i maalutana imole ki si do na tha God e rikia ka mamagu ania. 16Na lo bia porofeta ba ki kera toto ka fula asi maṉa na tha Jone ka fula: too asi maṉa eri keka ṉata sulia si faaroṉoa lea ana tooa tha God, ma wane ni sui keki kwaisuuwai, keki lae iei. 17E suka afetai ana thalo lo ma fanua nei iano kai tatha, me afetai ka tatha so ta kasi kula ne faekwa asia boo ana ṉa lo kai sui. 18Ni tei bana na kai arasia kwaina, sui kai tolea lau ta ai, nia kai oe: ma wane na kai tolea ai eri na kwaina e arasia kai oe.
19Tee nonii wane ne rikii do e toto, ne tooni ana maku momothelaa ma maku kwakwaoa ne lea, kai seethathala sulia to lana ne lea faamau sulia boṉi: 20Ma tee wane na kai gani, thatana tha Lasarasi, kera alua kai teo isana maethaka nia, seena e magara ana mamae, 21Me thathamia keki thare nia ana oretana faṉa ne asia faisia tatafe wane eri ne rikii do; iu, ma kui ki kera fula keka midia mamae nia ki. 22Ma lalae mai, wane eri ne gani ka mae, ma angel ki kera ṉali nia uria ruruuna tha Aberahamo: ma wane eri ne rikii do e mae lau boo, ma kera alua. 23Ma nia to i fanua toa mae ki ka tafoa maana ia, si maṉa na seena e fi faamau, ma nia ka rikia tha Aberahamo asi kula da mai, ma tha Lasarasi i ruruuna. 24Ma nia ’ai, ka sorea, Maka Aberahamo ae, oko tatakomi nau, ma oko arasia mai tha Lasarasi, fasi kai toonia maana kukuna i la kafo, kai faagwaria meaku; uria ne taa asia naa iaku i la lamalamana era nei. 25Ma tha Aberahamo ka sorea, Kaluwane nau, oki manatatoona fasi si maṉa nosi mae u o ṉaṉalia si do lea oe ki, ma tha Lasarasi ka una eri lau boo asi do taa ki: ma sui si maṉa eri kera faainamaruki nia naa, ma ni oe e taa asia naa iamu. 26Ma ta si lau boo bia si do eki sui, tee kurua baita e ṉado i maalutakulua, ma toa na kera thathamia keki to kunei keka tatha isamulua keka dora ania, bia toa na kera to kula ena keka dora ana lae la folo mai isamilia. 27Sui nia ka sorea, Mania ku ṉata kwaitakoi isamu, maka ae, fasi oko arasi nia uria biu maka nau; 28Uria na akua lima doora; fasi nia lae kai faamamanea si do ne thaitoomana isada, ada keki lae lau bomai uria si kula ana seefia nei. 29Tha Aberahamo ka soree isana, Adalua tha Mosesi bia porofeta ba ki; keki roṉoa ṉata lada. 30Ma nia ka sorea, E ai, maka Aberahamo: mada sa ta wane e lae isada faisia toa mae ki, keki akeletania manatada. 31Ma nia ka soree isana, Mada sa kesi roṉoa tha Mosesi bia porofeta ba ki, sa keka bulasia ruruuda ka ai lau boo, mada sa ta wane ka tatae faisia toa mae ki.
હાલમાં પસંદ કરેલ:
Luke 16: MLU1949
Highlight
શેર કરો
નકલ કરો
Want to have your highlights saved across all your devices? Sign up or sign in
British and Foreign Bible Society 1949, 1951
