Luke 15
15
1Sui toa eki sui bana ni ṉali lana takisi ki bia toa na kera abula taa keka idu karaṉi nia fasi keki roṉoa ṉata lana. 2Ma Farisi ki bia wane ni kekeda ki keka ubulutai nia, keka una eri, Wane nei kai thathagonia toa na kera abula taa, ma kai faṉa bida.
3Ma nia ka ṉata asi tarifula eri isada, ka una eri, 4Nifana wane iamulua, ana ta talaṉee sifi, mada sa tee do iada ka aana, si ekwa ana sikwa tafulu sifi ma sikwa sifi eki la fanua kwasi, si lae iburiana do ne aana, ma rorofe kai rikia boo? 5Ma lalae e rikia naa, nia ka alua i gwauna abana, kai seethathala. 6Ma lalae e fula naa i la toaa, nia ka ailia toa ne ado bida ma toa nia ki keki ofu, kai una eri isada, Muki seethathala bi nau, uria na ku rikia naa sifi nau ba ne aaana. 7Nau ku soree isamulua, una eri lau boo seethathala la kai ni thalo lo fafia tee wane ne abubula taa ne akeletania manatana, kai tatha ana sikwa akwalee imole ma sikwa imole kokoto ki, ne ai ada ta si do fasi keki akeletania manatada faisia.
8Mado nifana kini ne ana akwalee malefo ana silifa, mada sa ta tee fa do e aana faisi nia, e ai si faatharua laeta, si kaofia i la maafera eri, si rofe taiṉei, rorofe kai rikia boo? 9Ma lalae e rikia naa, nia ka ailia toa ne ado bida ma toa nia ki keki ofu, kai una eri, Muki seethathala bi nau, uria na ku rikia naa do nau ba ne aaana. 10Una eri lau boo, nau ku soree isamulua, seethathala la ni inaofana angel tha God ki fafia tee wane ne abubula taa ne akeletania manatana.
11Ma nia ka sorea, Tee nonii wane ana ta ro kaluwane: 12Ma ai buri ani keroa ka soree isana maka nia, Maka ae, oko falea si do thataku ki na kera talua naa ifaku. Ma nia ukalia do nia ki faisidaroa. 13Me ai tei fa boṉi si oro iburiana, kaluwane buri eri ka ofua si do ki sui bana, ma ka lae ana laea nia uria ta fanua da; ma i kula eri nia ka faakoka si do nia ki ana abula la ne taa ka thasiasia. 14Ma iburiana ne arua si do eki ka daṉa, unii thaofa fualaṉaa ka liufia fanua eri; ma nia ka to ana rofe la. 15Ma nia lae ka adomai nia bia ta wane i fanua eri; ma nia ka arasi nia i la ra nia ki kai fale ana botho ki. 16Ma nia thathamia faamau sa kai abusu ana foana ’ai na botho keki ania: me ai ta wane si fale iana. 17Ma lalae e manata naa, nia ka sorea, Toa ni ra maka nau na nia kai usida kera oro mena, berede kera e talaada ma kai teo, ma nau kwai mae ana thaofa! 18Nau kwai tatae, kwai lae isana Maka nau, ma kwai soree isana, Maka ae, nau ku abula taa ana thalo, ma ku abula taa ani oe: 19Me ai kwasi farana naa sa keki alaṉi nau ana kaluwane oe: oko alu nau kwai ’uria ta wane ana wane ni ra oe ki noki usida. 20Ma nia tatae, ka lae mai isana maka nia. Ma si maṉa ne ni da u mai, maka nia ka riki nia, ma ka tatakomi nia, ma ka fita, ka kalilua bia, ka nonoia. 21Ma kaluwane eri ka soree isana, Maka ae, nau ku abula taa ana thalo, ma ku abula taa ani oe: me ai kwasi farana naa sa keki alaṉi nau ana kaluwane oe. 22Ma maka nia ka soree isana wane ni ra nia ki, Ṉalia mai tooni ne lea ka tatha, muki faatooni nia ania; ma muka alua ta kome ana abana ma butu ki ana aaena: 23Ma muka tolea mai kalee buloka ne gwagwarurutaa, muka kwaia, kuki ania, kuka seethathala: 24Uria na kaluwane nau nei e mamae, ma ka maruki lau; e aaana naa, ma keka rikia lau. Ma keka bii seethathala. 25Ma ulunao nia e to i la ra: ma si maṉa ne lae mai ka fula karaṉia biu, nia ka roṉoa aga ma wae la. 26Ma nia ka ailia ta wane ana toa ni ra, ma ka soetoona uria maalutana si do eki. 27Ma nia ka soree isana, Dooramu e fula; ma maka oe e kwaia kalee buloka ba ne gwagwarurutaa, uria ne riki nia lau, ta si do si uria. 28Ma nia rakeiri, ma ka lalakwee kotho i biu: mania maka nia ka kotho i maa, ka mamasoroa. 29Ma nia luua, ka soree isana maka nia, Lio fasi, fa ṉali oro eki nau ku ra iamu, ma kwasi ade faisia ṉata lamu ta si maṉa: ma sui osi falea ta kalee gota ifaku ta si maṉa, fasi kwa seethathala bia toa na ku ado bida: 30Ma si maṉa u boo na kaluwane oe nei e fula, ne labatania si do oe ki bia sesele ki, oko kwaia bamua kalee buloka ba ne gwagwarurutaa ifana. 31Ma nia ka soree isana, Kaluwane nau, o to ṉado bi nau, ma si do nau ki sui bana si do oe ki. 32Si do e lea na kuki seethathala ma kai lea iakulua: uria na dooramu nei e mamae, ma ka maruki lau; e aaana naa, ma keka rikia lau.
હાલમાં પસંદ કરેલ:
Luke 15: MLU1949
Highlight
શેર કરો
નકલ કરો
Want to have your highlights saved across all your devices? Sign up or sign in
British and Foreign Bible Society 1949, 1951
