Yohané 13

Mba Yésu sôg nku ghazi'te nu i là

(Mat. 26.19-20; Luk. 22.14-18)

1Ndùlala lé'njù jùa Pasa lo be ku'u, Yésu be lèn ndù ze ngelaṅ ku' nelo ntùm yen njù li nèn ntèt Tà; a kô tse ben tse bo be ntùm njù là, nkô yub tà nèn miagte. 2Bo lo be to' nejù jujù ndù Satan à ma' ntùm ntù Yuda mén Simon ze Iskariot, nu neswèn i. 3Yésu be lèn ndù Tà lo fà njoṅ tshu fa ntùm mbu mi, ndù a fe à Nsi, mbèn nke nèn tèl à Nsi, 4ndo téblé, nsô nzwe tse, ndo' kam nzwe ntaṅ tun i, 5naṅ ntse ntùm ka, nto' nesôg nku ghazi'te nu i, nke ndo' kam nzwe z'a taṅ tun i là, ntshwétte yi.

6Ndùlala a kum num Simon Pétro, Pétro tshob yi ndù: Tshùaben, o bèn sôg nku màm ké? 7Yésu bùnte ntshob yi ndù: Ju ze me tshwèt ngù là, a b'o ke lèn ndonni, là o nsi ju' à ngelaṅ mànjam. 8Pétro tshob yi ndù: Nga, a b'o ke na' nzi nsôg nku màm, Yésu bùnte yi ndù: A be ze me ke' sôg o là, mb'o ke ghù yu bag i bag wù. 9Simon Pétro tshob yi ndù: Tshùaben, ke b'a nda' nku màm, mba mbu màm, mba tu àm. 10Yésu tshob yi ndù: Mèn z'a sôg wul i là ke' bèn mbe sôg, k'a ke nda' nku mi, là njoṅ wul i fa làn, mba bin nà, bin làn, là ke b'a njoṅ zin fa. 11Nummbe a lo lèn mèn z'a swèn i là, a num ndùlala z'a tshob ndù: Njoṅ zin fa ke' làn nà.

12Ndùlala #Luk. 22.27ngelaṅ z'a sôg nku mub mbèn ndo' nzwe tse, ntswe num téblé là, a tshob bo ndù: Bin ju' ju ze me lo neghù bin nà ké? 13Bin be ntsiaṅ àm ngatswite mba Tshùaben, bin tshob a bwô, nummbe me b'a yi. 14Ndùlala, a be ze me sôg nku mine, me ze me b'a Tshùaben mba ngatswite là, mb'a bwô ndù mba bin ke nsôg nku min bin bin. 15Nummbe me lo nef'a mfi' bin, ndùlala ndù mba bin zin ghù be ndaṅndaṅ mba me ghù num bin nà. 16Kua' #Mat. 10.24; Luk. 6.40; Yoha. 15.20nenùne, kua' nenùne, me tshob bin ndù: Ngafa' ke' b'a mèn ndùb ntshùa Tshùaben i, ke ngantum no ke bèn mbe mèn ndùb ntshùa mèn z'a tum i là. 17Bin nsi b'a ghafen, a be ze bin lèn tshen tshu li mbèn nke nze là.

18Me #Yobk. 41.9ke' tshob à njoṅ zin fa; me lèn ben tse m'a tsho' yub là, là, a b'a ndù ṅwa'ni Nsi bumte: Mèn z'a num njù bàn àm nà tsho' tun ku i nsi num àm. 19Fe ndonni me tshob bin kà yen nu là se'e, ndùlala ndù ngelaṅ z'a nsi se' là, bin bam ndù me b'a yi. 20Kua' #Mat. 10.40; Mark. 9.37; Luk. 9.48; 10.16nenùne, kua' nenùne, me tshob bin ndù: Mèn z'a lo' mèn ze me nsi tum i là, lo' àm; là mèn z'a lo' àm nà, lo' mèn z'a tum àm nà.

Mba Yésu soṅ mba Yuda nsi swèn i là

(Mat. 26.20-25; Mark. 14.17-21; Luk. 22.21-23)

21Yésu tshob tshen nu là, mvètte ntùm Ywèt tse, nkwé nta ntshob ndù: Kua' nenùne, me tshob bin ndù: Mo' mèn netèt bin nsi swèn àm. 22Ghazi'te nu i lôte wut tshob bo bo, nu tshùa yube, bo ke lèn mèn z'a tshwèt ntshob là! 23Mo' mèn netèt ghazi'te nu i, yen nà ze Yésu ke nkô i là lo be téblé mbaṅ Yésu. 24Ndùlala Simon Pétro tshob yi lèn ndù: Bètt'é mèn z'a tshwèt ntshob là! 25Yen ni ben wul i num ndàntù Yésu, ntshob ndù: Tshùaben, a b'a we? 26Yésu bùnte ndù: A b'a yen ni ze me nsi tshe' nke' bàn fà yi là. Ndùlala a tshe' bàn ndo' mfà Yuda mén Simon ze Iskariot. 27A kwé nke' bàn be ngelaṅ mbile, Satan tsho num i; Yésu tshob yi ndù: Ju z'o tshwèt ngù là, ghù kua' ndende.

28Là sàm mèn netèt tse bo be téblé là ke ju' ju z'a tshwèt ntshob yi là. 29Nummbe tsemo' lo ke nkwate ndù mba Yuda na' mbèn nke ndé' mfe' là, Yésu ke ntshob yi à ndù: Jun ju z'a bwoṅ ben mum lé'njù jùa là ke ndù a fà ju bwoṅbwoṅ lo. 30Ndùlala a be kwé nke' bàn, ntum be ndùse. Là, a na' mb'a tèttswe'.

Ntshù' nswe

31Ndùlala, ngelaṅ ze Yuda tum nà, Yésu tshob ndù: Ndonni Mén mèn tsho ntùm nkuni mi, nkuni Nsi tswite wul i num i. 32A be ze nkuni Nsi tswite wul i num i là, mba Nsi kuni tu wul i, mb'a nsi kuni i be kua' ndende. 33Bontsit #Yoha. 7.34bônke', bag à bin bèn mbe num mo' mén ngelaṅ; bin nsi diag àm; mba me na' ntshob ba Yuda là: Bin ke' ku'ni nese' dù' ze me tshwèt nèn nà, me tshwèt ntshob mba bin zin ndonni.

34Me #Yoha. 15.12,17; 1 Yoha. 3.23; 2 Yoha. 5fà ntshù' nswe bin ndù: Bin ke nkôni bin bin; mba me kô zin nà, mba bin zin, bin ke nkôni bin bin. 35A num yen nà ze njoṅ benntùn fa nsi lèn ndù bin b'a ghazi'te nu àm nà, a be ze bin ghù nkôni bin bin nà.

Nebètte Pétro

36Simon Pétro tshob yi ndù: Tshùaben, o nèn à yà? Yésu bùnte ndù: Dù' ze me tshwèt nèn nà, o ke' ku'ni ndonni netam njam àm, là o nsi tam njam àm ngelaṅ mànjam. 37Pétro tshob yi ndù: Tshùaben, numke be me ke ku'ni ndonni netam njam o à? Me nsi fà yôg sàm num o. 38Yésu bùnte ndù: O nsi fà yôg so num àm à? Kua' nenùne, kua' nenùne, me tshob wù ndù: Kù'ngab ke nsi tô, ke be ndù o gha àm yoṅ tat.

હાલમાં પસંદ કરેલ:

Yohané 13: BMa

Highlight

શેર કરો

નકલ કરો